|
I Avropa Oyunlarında ölkəmizi 299 idmançı təmsil edəcək
 Bu
il iyunun 12-dən 28-dək Bakıda keçiriləcək ilk Avropa
Oyunlarında Avropanın 50 ölkəsindən 6200 idmançı iştirak
edəcək. Yarışlarda mübarizə aparacaq idmançılarımızın
sayı da artıq məlumdur. Gənclər və İdman Nazirliyi
Mətbuat xidmətinin rəhbəri Səmayə Məmmədovadan aldığımız
məlumata görə, qarşıdan gələn oyunlarda ölkəmizi 299
idmançı təmsil edəcək. İdmançılarımız I Avropa
Oyunlarının proqramına daxil edilmiş 20 idman növünün
hamısında mübarizə aparacaqlar.
12 gündən sonra start götürəcək I Avropa Oyunlarında
ayrı-ayrı ölkələrdən Bakıya gələcək idmançıların sayı
da, təxminən, məlumdur. Aşağıda onların bəzilərini
təqdim edirik.
Rusiya Federasiyası.
Rusiya I Avropa Oyunlarında böyük sayda idmançı ilə
təmsil olunacaq. Bu ölkədən Bakıya ən məşhur idmançılar
gələcək. Rusiya Olimpiya Komitəsinin prezidenti, Rusiya
Dövlət Duması sədrinin müavini Aleksandr Jukovun
bildirdiyinə görə, onun rəhbərlik etdiyi qurum hələlik
siyahını təsdiq etməsə də Rusiyadan Bakıya 350
idmançının gələcəyi məlumdur. Onlar, demək olar ki,
bütün idman növlərində mübarizə aparacaqlar.
Serbiya.
Serbiya Milli Olimpiya Komitəsinin ölkə ictimaiyyətinə
açıqladığı ilkin siyahıya görə, bu ölkədən "Bakı - 2015"
I Avropa Oyunlarına 79 idmançı gələcək.
İtaliya.
Birinci Avropa Oyunlarında İtaliyadan 295 idmançı
iştirak edəcək.
Türkiyə.
Türkiyə Milli Olimpiya Komitəsi I Avropa Oyunlarında
iştirak edəcək idmançıları müəyyənləşdirib. Qardaş
ölkəni yarışlarda 191 idmançı təmsil edəcək.
Gürcüstan.
I Avropa Oyunlarında iştirak üçün Gürcüstandan Bakıya
200 nəfərlik nümayəndə heyəti gələcək. Onların 110-u
oyunlarda iştirak edəcək idmançılardır. Gürcüstan
idmançıları 13 idman növündə mübarizə aparacaqlar.
Litva.
Litva komandasının da heyəti açıqlanıb. Bu ölkədən 72
idmançı oyunlara qatılacaq. Litva Milli Olimpiya
Komitəsinin "Bakı-2015" üçün elan etdiyi komandanın
heyətində beynəlxalq uğurlara imza atmış bir çox
idmançının, o cümlədən 2012-ci il London Olimpiya
Oyunlarının boks üzrə bürünc mükafatçısı Petrauskas və
avarçəkmə üzrə üçqat Avropa çempionu Suklinin adları
var.
Polşa.
Polşa Olimpiya Komitəsi Birinci Avropa Oyunlarına 214
idmançıdan ibarət heyətlə gəlir. Onların arasında
2008-ci il Pekin Olimpiya Oyunlarının gümüş medalçısı,
2009-cu ildə Avropa, 2010-cu ildə isə dünya çempionu
olmuş 31 yaşlı velosipedçi Maya Vloşovska da var.
Belçika.
Belçika 117 idmançı ilə I Avropa Oyunlarında iştirak
edəcək. Belçika heyətində 13 nəfər cüdo idman növündə
mübarizə aparacaq. Onların arasında Dünya Kuboku
oyunlarının üç mükafatçısı, 2 dəfə Belçika çempionu
olmuş, Avropa Çempionatında gümüş medal qazanmış Lola
Mansur da var.
"Bakı-2015. İlk Avropa Oyunlarına dəstək"
Bakı Dövlət Universitetində "Bakı-2015. İlk Avropa
Oyunlarına dəstək" adlı tədbir keçirilib. Tədbiri giriş
sözü ilə açan universitetin rektoru, akademik Abel
Məhərrəmov ilk Avropa Oyunlarının təşkili və görülən
işlər barədə danışıb və Bakının Olimpiya oyunlarına tam
hazır olduğunu bildirib. Qeyd edib ki, bu hazırlığın
kökündə Prezident İlham Əliyevin və Azərbaycanın birinci
xanımı, "Bakı-2015" I Avropa Oyunlarının Təşkilat
Komitəsinin sədri Mehriban xanım Əliyevanın davamlı
olaraq olimpiya oyunlarının keçiriləcəyi obyektlərə,
idman saraylarına baş çəkməsi, eyni zamanda
idmançılarımıza göstərdikləri diqqət və qayğı dayanır.
Rektor onu da bildirib ki, Avropa Oyunlarının ölkəmizdə
keçirilməsinə əsas səbəblərdən biri güclü beynəlxalq
nüfuzumuz, Azərbaycan əhalisinin Olimpiya Oyunlarının
Bakıda keçirilməsini arzulaması və dəstəkləməsi, eyni
zamanda ölkəmizdə yaradılmış idman infrastrukturunun
dünya səviyyəsinə, dünya standartlarına cavab verməsi
ilə bağlıdır.
Daha sonra Bakı Avropa Oyunları Əməliyyat Komitəsinin
baş əməliyyat direktoru Saymon Kleq, Bakı Dövlət
Universitetinin könüllüləri adından tarix fakültəsinin
1-ci kurs tələbəsi Səadət Qarayeva və coğrafiya
fakültəsinin 3-cü kurs tələbəsi Eltac Cəbiyev çıxış
ediblər.
Bildirilib ki, "Bakı-2015" Avropa idman tarixində yeni
səhifə açacaq. Bu tarixin açılmasına və yazılmasına ölkə
Prezidenti İlham Əliyev, xanımı Mehriban Əliyeva,
Azərbaycan ictimaiyyəti və minlərlə könüllü Azərbaycan
gənci dəstək verəcək.
Tədbirdə "Bakı-2015" ilk Avropa Oyunları ilə bağlı
videoçarxlar nümayiş edilib və Saymon Kleq "BDU-nun
Fəxri qonağı" mükafatı ilə təltif olunub.
Mətbuat və informasiya şöbəsi
Böyük
Britaniyanın Qlazqo Universitetində təqdimat
Böyük Britaniyanın Qlazqo Universitetində "Bakı-2015"
1-ci Avropa Oyunlarının təqdimatı keçirilib.
"Qlazqo" Azərbaycan Cəmiyyətinin təşkilatçılığı ilə
keçirilən Azərbaycan gecəsində baş tutan təqdimat
Xaricdə Təhsil üzrə Dövlət Proqramı çərçivəsində Qlazqo
Universitetində maliyyə iqtisadiyyatı üzrə magistr
təhsili alan Mehman İsmayıllı tərəfindən həyata
keçirilib. Tədbirdə həmyerlilərimizlə yanaşı, Türkiyə,
Çin Xalq Respublikası, Rusiya, Almaniya, İsrail, Fransa,
ABŞ və İtaliyadan olan 70-dən çox tələbə iştirak edib.
Təqdimat zamanı iştirakçılara Avropanın ən əlamətdar
tədbirlərindən biri olan "Bakı-2015" 1-ci Avropa
Oyunları haqqında məlumat verilib. Qeyd olunub ki, Bakı
şəhərində təşkil olunacaq ilk Avropa Oyunlarında
Avropanın 50 ölkəsindən 6200-dən çox idmançı medallar
uğrunda mübarizə aparacaq. Oyunlar zamanı 4-ü
qeyri-olimpiya, 16-sı olimpiya idman növü olmaqla,
ümumilikdə 20 idman növü üzrə 253 yarışın keçirilməsi
haqqında məlumat iştirakçılar tərəfindən böyük maraqla
qarşılanıb. Həmçinin, Avropa Oyunlarının keçiriləcəyi
idman tikililəri haqqında fotoşəkillər və Avropa
Oyunlarına dair hazırlanmış videoçarx iştirakçıların
nəzərinə çatdırılıb.
Təqdimatda 40 ölkənin tələbələri
iştirak edib
Niderlandın Roterdam şəhərində yerləşən Roterdam Erasmus
Universitetində "Bakı-2015" 1-ci Avropa Oyunlarının
təqdimatı keçirilib. Təqdimat Xaricdə Təhsil üzrə Dövlət
Proqramı çərçivəsində bu universitetin beynəlxalq
biznesin idarəolunması və beynəlxalq iqtisadiyyat və
biznes fakültələrində təhsil alan Yusif Əzimov və Toğrul
Eyvazovun təşəbbüsü ilə təşkil olunub. Təqdimatda
azərbaycanlı tələbələrlə yanaşı, Niderland, Belçika,
Lüksemburq, Fransa, İspaniya, Portuqaliya, İtaliya,
Böyük Britaniya, İrlandiya, Almaniya, Avstriya, İsveçrə,
İslandiya, Norveç, Polşa, Rusiya, Ukrayna, Çexiya,
Bolqarıstan, Moldova, Rumıniya, Macarıstan, Serbiya, Çin,
Tayvan, Koreya, Yaponiya, İndoneziya, Vyetnam, Hindistan,
Nepal, Gürcüstan, Qazaxıstan, İran, Türkiyə, ABŞ, Kanada,
Surinam, Braziliya və Kolumbiyadan olan 100-dən artıq
tələbə iştirak edib.
Təqdimat zamanı iştirakçılara tarixdə ilk dəfə
keçiriləcək "Bakı-2015" 1-ci Avropa Oyunları, oyunların
mahiyyəti və oyunlarda əhatə olunacaq idman növləri
haqqında məlumat verilib. Qeyd olunub ki, Bakı şəhərində
təşkil olunacaq ilk Avropa Oyunlarında Avropanın 50
ölkəsindən 6200-dən çox idmançı qızıl medallar uğrunda
mübarizə aparacaq. Oyunlar zamanı 4-ü qeyri-olimpiya,
16-sı olimpiya olmaqla, ümumilikdə 20 idman növü üzrə
253 yarışın keçirilməsi iştirakçılar tərəfindən böyük
maraqla qarşılanıb. Təqdimatın gedişinda Avropa
Oyunlarının keçiriləcəyi idman tikililəri haqqında
fotoşəkillər və Avropa Oyunlarına dair hazırlanmış
videoçarx iştirakçıların diqqətinə çatdırılıb.
Azərbaycan, onun tarixi və dəyərləri, eləcə də burada
Oyunlar zamanı turistlər üçün yaradılacaq imkanlar
haqqında məlumat verildiyi təqdimat iştirakçılarla fikir
mübadiləsi ilə davam edib. İştirakçıların Avropa
Oyunları ilə bağlı sualları cavablandırılıb və Avropa
Oyunları iştirakçılar tərəfindən yüksək
qiymətləndirilib. |
