|
Əziz məzunlar! Bu gün siz məktəbi bitirməklə,
həyatınızın növbəti mərhələsinə qədəm qoyursunuz.
Hər bir ölkənin xoşbəxt gələcəyi onun vətəndaşlarının
intellektual potensialına və bacarığına bağlı olması ilə
bərabər, müasir çağırışlar şəraitində onlardan fərdi
məsuliyyət və təəssübkeşlik tələb edir. Bu baxımdan siz
tükənməz gənclik enerjinizlə fəal vətəndaş nümunəsinə
çevrilməlisiniz.
Bu gün qarşımızda duran mühüm vəzifələrdən ən önəmlisi
vətəndaşlıq mövqeyindən çıxış edərək, müstəqil
dövlətçiliyimizin daha da qüdrətlənməsi naminə
yorulmadan çalışmaqdır. Ölkə Prezidenti cənab İlham
Əliyevin qeyd etdiyi kimi, müstəqilliyimiz bizim ən
böyük dəyərimiz, ən böyük sərvətimizdir.
Sizin məzun olmağınızla əlamətdar olan bu il bütün
Azərbaycan üçün mühüm hadisələrlə yadda qalacaq. Cəmi
iki həftədən sonra ölkəmizdə I Avropa Oyunlarına start
veriləcək. Bu möhtəşəm tədbirdə hər birimizdən yüksək
vətəndaşlıq mövqeyi tələb olunur.
Siz seçəcəyiniz həyat yolunda dəyişən dünyanın
tələblərinə uyğun olaraq yetişməli, seçimlərinizdə
düşünülmüş qərarlara üstünlük verməlisiniz. Müstəqil
həyatınızda uğur qazanmaq üçün daim öyrənməli, istedad
və bacarığınızı yeni biliklərlə cilalamalı və
təşəbbüskar düşüncə daşıyıcısı olmalısınız.
İndi sizin qarşınızda duran əsas məsələlərdən biri
gələcək həyatınızın bağlı olacağı peşəni
müəyyənləşdirməkdir. Peşə seçimi insanların həyatında
verdiyi ən əhəmiyyətli qərarlardan biridir. İstəyə və
məhəbbətə əsaslanan seçim insana uğur qazandırır, öz
sənətinin əsl peşəkarına çevirir.
Əziz məzunlar! Sizi "Son zəng" münasibətilə bir daha
ürəkdən təbrik edir, gələcək həyatınızda uğurlar
arzulayıram! |
