|
 Bakıdakı
15 nömrəli Uşaq-Gənclər İdman Məktəbində Bakı Şəhər
Gənclər və İdman Baş İdarəsi və Bakı Şəhəri üzrə Təhsil
İdarəsi tərəfindən paytaxt məktəbliləri arasında XXVII
spartakiadanın proqramına daxil olan "Cırtdan" növü üzrə
yarış keçirilib. İdman məktəbinin direktoru Cəmil
Fətullayevdən aldığımız məlumata görə, yarışın açılış
mərasimində Bakı Şəhər Gənclər və İdman Baş İdarəsinin
baş məsləhətçisi, XXVII spartakiadanın baş hakiminin
müavini Salman Əbdülov və Bakı Şəhəri üzrə Təhsil
İdarəsinin məsul işçisi, XXVII spartakiadanın baş katibi
Valentina Sultanova iştirakçıları salamlayıb, onlara
müvəffəqiyyətlər arzulayıblar. İbtidai sinif şagirdləri
arasında yarış 5 növ üzrə - kütləvi gimnastik
hərəkətlər, yerindən uzunluğa tullanma estafeti,
topların və halqaların istifadəsi ilə qarşılıqlı estafet,
basketbol topunun aparılması estafeti və qapıya qol
vurma növləri üzrə keçirilib. Yarışın nəticəsinə görə I
yeri Nərimanov rayonunu təmsil edən Bakı Modern
Məktəbinin komandası, II yeri Xətai rayonunu təmsil edən
269 nömrəli tam orta məktəbin komandası, III yeri Səbail
rayonunu təmsil edən 160 nömrəli klassik gimnaziyanın
komandası tutublar.
XXVII spartakiadanın dama, şahmat, stolüstü tennis,
basketbol (qızlar), basketbol (oğlanlar), voleybol
(qızlar), voleybol (oğlanlar), dördnövçülük (qızlar),
dördnövçülük (oğlanlar), mini-futbol, güllə atıcılığı və
"Cırtdan" növləri üzrə yarışlarından sonra Nərimanov
rayonu I yeri, Xətai rayonu II yeri, Sabunçu rayonu III
yeri, Səbail rayonu IV yeri tutublar.
Rəşad RAMAZANOĞLU,
"Azərbaycan müəllimi" |
