|
 Bakı
şəhər 51 nömrəli tam orta məktəbdə ibtidai sinif
müəllimi Səkinə Sadıqovanın IV "a" sinfində
riyaziyyatdan "Həndəsi fiqurlar" mövzusunda "açıq
dərs"i olub.
Müəllim bu ümumiləşdirici dərsdə böyük və kiçik
qruplarla iş təlim formasında və interaktiv təlim
metodlarından istifadə edərək, şagirdlərin fəallığının
artırılmasını, həndəsi fiqurlara aid anlayışların və
qaydaların onlar tərəfindən şüurlu surətdə dərk
edilməsini ən vacib hal kimi diqqət mərkəzində
saxlayıb. Dərsin müəllim-şagird dialoqu əsasında
interaktiv təlim ruhuna uyğun təşkili keçilən mövzunun
sinfin əksəriyyəti tərəfindən yüksək səviyyədə
mənimsənilməsinə şərait yaradıb.
Səkinə Sadıqova yeni dərsin izahı ilə yanaşı,
riyaziyyat fənnindən bu günə kimi keçilən mövzuların
mənimsənilmə səviyyəsini yoxlamaq məqsədilə şagirdləri
slayd vasitəsilə hazırlanmış testlərlə sorğu-sual edib.
Şagirdlərdən Züleyxa Əliyeva, Mütalib Əsgərov, Nəriman
Şirinli və Xəlil Nəsirov verilən sualların
cavablandırılması ilə yanaşı, həm də yeni dərsin maraqlı
keçməsində fəal iştirak ediblər.
Sonda S.Sadıqovanın keçdiyi "açıq dərs" müzakirə
olunub. Məktəbin direktoru Lətafət Səmədova əvvəlcə
müəllim haqqında məlumat verib. Bildirib ki, Səkinə
Sadıqova məktəbin qabaqcıl müəllimlərindəndir. O,
müəllimlərin sınaq qiymətləndirilməsində 54 bal
toplayıb. Dərs dediyi şagirdlər hazırda yüksək peşə
sahibidirlər. Məktəb rəhbərliyi tərəfindən dəfələrlə
əməyi qiymətləndirilib.
Direktor onu da qeyd edib ki, təhsil ocağında sinif
müəllimləri arasında qarşılıqlı dərsdinləmə və "açıq
dərs"lərin keçirilməsi artıq bir ənənə halını alıb. Bu
da ibtidai siniflərdə təlimin keyfiyyətinin
yüksəlməsində mühüm əhəmiyyət kəsb edir. Keçilən hər bir
"açıq dərs" pedaqoji şura iclaslarında geniş müzakirə
olunur və yaradıcı müəllimin yaxşı işi digər məktəblər
arasında geniş yayılır.
Bu gün qabaqcıl sinif müəllimlərimizdən biri olan
Səkinə Sadıqovanın keçdiyi "açıq dərs" bu deyilənlərə
əyani sübutdur. Müəllim dərsin gedişində şagirdlərdə
təlimə maraq hissi yaratmaq üçün müxtəlif vasitələrdən
istifadə etdi və dərsdə əyaniliyə, texniki vasitələrə
və xüsusən didaktiv oyunlara geniş yer verdi.
İbtidai siniflər üzrə metodbirləşmənin sədri Solmaz
Mustafayeva bildirib ki, müəllim dərsdə şagirdlərin
zehni fəallığını təmin etdi, qazandıqları bilikləri
sistemə salıb və öyrənilən mövzunun şagirdlər
tərəfindən dərindən mənimsənilməsində pedaqoji
ustalığını göstərdi.
"Açıq dərs" də iştirak edən müəllimlərdən Gülnaz
Əmiraslanova, Məsumə Musayeva, Fatma Cavadova və
Zəriyə İbrahimova dərsin yaxşı təşkil olunduğunu və
şagirdlərin riyaziyyat fənnindən yüksək bilik nümayiş
etdirdiklərini bildiriblər. Qeyd ediblər ki,
müəllimin "açıq dərs"i metodiki baxımdan milli
kurikulumların tələb etdiyi standartlar əsasında
yüksək səviyyədə keçdi. S.Sadıqova dərs prosesində
şagirdlərin fəallığını təmin edə bildi və keçdiyi
mövzuya dair əyani vəsaitlərdən istifadə etməklə,
fənlərarası inteqrasiya yaratdı.
"Açıq dərs" diskussiya şəklində başa çatdı.
Şakir CƏFƏROV,
"Azərbaycan müəllimi" |
