|
 Müəllim adı ali, müqəddəs bir müraciət
forması olmaqla yanaşı, həm də şübhəsiz, daşıyıcısının
üzərinə böyük məsuliyyət qoyur. Müəllimlik peşəsinə
gəlincə isə bu təkcə elm öyrədən, gəncləri, insanları
elmin sirlərindən hali edən demək deyil. Müəllim öz
şəxsi nümunəsi ilə hamıya həyat dərsi keçir, ali insan
fenomeni formalaşdırır, bir ömürlə neçə ömrə örnək olur.
Deyirlər, dünya elmin nuru ilə ziyalanır, əqldən qüvvət
alır, mənəvi dayaqlar üzərində möhkəmlənir. Professor
Akif Abbasovun ömür yoluna nəzər salsaq, mübaliğəsiz
dünyanın məhz belə insanların, alimlərin, müəllimlərin,
ataların, oğulların çiynində dayandığına şübhə etmərik.
Bu gün dünya alimlərinin ən çox maraq göstərdiyi elmlər
sırasında dayanan pedaqogika elmi Azərbaycanda məhz belə
alimlərimizin əməyi sayəsində parlaq bir dövrünü
yaşamaqdadır.
Akif müəllimi tanıyanlar onun barəsində həmişə xoş
sözlər söyləyirlər. Birmənalı şəkildə deyirlər ki, o,
bilikli alimdir, mehriban insandır. Bu təcrübəli pedaqoq
kollektivdə qayğıkeşliyi, sadəliyi, təvazökarlığı,
saflığı, yüksək təşkilatçılıq qabiliyyəti ilə seçilən
adamdır.
Professor Akif Nurağa oğlu Abbasovun mayın 28-də 65 yaşı
tamam olur.
65 illik ömrünün 40 ildən çoxunu gənc nəslin
təlim-tərbiyəsinə həsr etmək, bu illərdə öz pedaqoji
ustalığını daim təkmilləşdirmək, adi qəzet müxbirindən
tanınmış alim-pedaqoqa çevrilmək, təlim verdiyi on
minlərlə insanın sevimlisi olmaq, həqiqətən də, böyük
zəhmət və fədakarlıq tələb edir. Belə yaşamın bir adı
var - şərəfli pedaqoq ömrü.
Belə ömür yaşayır Akif müəllim. Şərəfli pedaqoq ömrünü o,
indi də davam etdirir: yazır, yaradır, müəllimlərin,
elmi işçilərin daim köməyinə gəlir, tədris və təlimdə
yenilikləri, pedaqoji innovasiyaları öyrənməkdə, işdə
tətbiq etməkdə onlara yardımçı olur.
Həyatda elə insanlar var ki, onlarla ünsiyyətdə olmaq
həmişə insana zövq verir, hər dəfə onlardan nəsə
öyrənirsən, səni narahat edən suallara cavab tapırsan.
Belə insanlara həyatın bütün sahələrində rast gəlinir -
istər siyasətdə, istər mədəniyyətdə, istərsə də elmdə.
Tanınmış ziyalı, minlərlə tələbəyə elm öyrətmiş insan
haqqında yazmaq həm məsuliyyətlidir, həm də şərəfli. Axı
alimin böyüklüyü onun mənəviyyat dünyası ilə
intellektual aləminin harmoniyasıdır. Digər tərəfdən isə
bu məsuliyyət həmin alimin nüfuzu, elmə verdiyi
töhfələri, insanlara, vətənə, millətə, dövlətə
münasibəti ilə bağlıdır.
Akif Abbasov 1950-ci il mayın 28-də Əli Bayramlı (indiki
Şirvan) şəhərində anadan olmuşdur. Burada N.Nərimanov
adına 2 nömrəli orta məktəbi bitirdikdən sonra
1967-1968-ci illərdə "İşıq" şəhər qəzetində müxbir
işləmişdir. 1968-1973-cü illərdə M.F.Axundov adına
Azərbaycan Pedaqoji Dillər İnstitutunun ingilis və
Azərbaycan dilləri fakültəsində təhsil almışdır.
Təyinatla Sabirabad rayonunun Şıxsalahlı və Qaragünə
kənd orta məktəblərində ingilis dilini tədris etmişdir.
1975-ci ildə Azərbaycan Elmi-Tədqiqat Pedaqoji Elmlər
İnstitutunun Tərbiyənin ümumi problemləri şöbəsinə
müsabiqə yolu ilə kiçik elmi işçi qəbul olunmuşdur.
Sonra orada elmi işçi, baş elmi işçi, şöbə müdiri
vəzifələrində işləmişdir.
1987-ci ildə namizədlik, 1995-ci ildə isə doktorluq
dissertasiyaları müdafiə etmişdir. 1992-1998-ci illərdə
Bakı Ali Pedaqoji Qızlar Seminariyasında (indiki Bakı
Qızlar Universiteti) elmi işlər üzrə prorektor olmuşdur.
2003-cü ildən Bakı Dövlət Universiteti nəzdində
psixologiya elmləri üzrə dissertasiya şurasının elmi
katibi təyin olunmuşdur. Azərbaycan, rus və ingilis
dillərində nəşr edilən "Təhsil, mədəniyyət, incəsənət"
elmi-nəzəri və metodik jurnalının redaktorudur. 2000-ci
ildən Azərbaycan Respublikası Təhsil Problemləri
İnstitutunun elmi katibidir.
Akif Abbasov ədəbi-pedaqoji fəaliyyətə 1966-cı ildən
başlamışdır. İlk mətbu yazısı Əli Bayramlı şəhər qəzeti
- "İşıq"da çıxmışdır. Bundan sonra dövri mətbuatda bədii
və elmi-kütləvi əsərlərlə vaxtaşırı çıxış etmişdir. Rus
və ingilis dillərindən tərcümələri "Dünya", "Bağban"
almanaxlarında, jurnallarda dərc olunmuşdur. Orta və ali
məktəblər üçün bir sıra dərslik, elmi-metodiki əsər və
proqram yazıb çap etdirmişdir.
Akif Abbasov bir çox pyesləri rus dilindən
Azərbaycancaya tərcümə etmiş və onlar respublika
radiosunun "Firuzə" tələbə teatrında səslənmişdir.
Professorun 1986-cı ildə tərcümə etdiyi "Andro və Sandro"
pyesi (müəllif: Georgi Xuqayev) 1987-ci ildə respublika
radiosunun "Ədəbi-dram verilişləri" redaksiyasında
səsləndirilmişdir. Radiotamaşanın rejissoru görkəmli
sənətkar Həsən Əbluc olmuşdur. Bu tamaşanı tanınmış
Azərbaycan aktyorları səsləndirmişdilər.
A.Abbasov Azərbaycan Maarif Nazirliyinin "Qabaqcıl
maarif işçisi" döş nişanına və fəxri fərmanına layiq
görülmüşdür.
Akif Abbasova 2004-cü ildə professor elmi adı
verilmişdir. O, 26 dekabr 2006-cı il tarixində "Tərəqqi"
medalı ilə təltif edilmiş, 2007-ci ildə "Qızıl qələm"
mükafatına layiq görülmüşdür.
A.Abbasov 24 aprel 2009-cu ildən etibarən Rusiya
Pedaqoji və Sosial Elmlər Akademiyasının həqiqi üzvüdür.
Azərbaycan Respublikası Prezidentinin 1 oktyabr 2012-ci
il tarixli Sərəncamı ilə "Azərbaycan Respublikasının
əməkdar müəllimi" fəxri adına layiq görülmüşdür.
Uca Tanrı alimi xoş gündə-saatda yaratmışdır. Ona parlaq
istedad, fenomenal yaddaş, bitib tükənməyən səbr, iradə,
yüksək daxili mədəniyyət bəxş etmişdir.
Hər günü müxtəlif elmi, ictimai-siyasi tədbirlərə
qatılmaqla, o cümlədən rəhbərlik etdiyi doktorant,
dissertantlarla fikir mübadilələri, məsləhətləşmələr
aparmaqla başa vuran tanınmış alim ayları, illəri arxada
qoyaraq artıq ömrünün yuvarlaq 65-ci ildönümündədir.
Təbiətən sadə, təvazökar insan Akif Abbasov yubiley
ərəfəsində də ümumi məqsədə bağlı fəaliyyəti ilə məşğul
görünür. Əslində, istər peşəsindən, istərsə də
xarakterindən irəli gələrək onun üçün şəxsi maraqlar
nəinki ikinci, bəlkə onuncu yerdədir. Başqalarının ən
xırda əlamətdar hadisəsini hamıdan əvvəl yada salan,
dəyərləndirən görkəmli ziyalı özünün ömür zirvəsinin 65
illik bayramını sanki unudub. Lakin ömür hər insana bir
dəfə verildiyi kimi, onun hər ili, xüsusən də 65 yaşı -
cavanlığın qocalığı, qocalığın cavanlığı ərəfəsi kimi
yad edilməli, bölüşülməli, qeyd edilib xatırlanmalı
hadisədir.
Bir çox ixtiraların müəllifi olan A.Fleminq demişdir ki,
mən ona görə xoşbəxtəm ki, müəllimimin qapısı daim mənim
üzümə açıq olmuşdur. Bu fikirlə mən tam razıyam. Ən azı
ona görə ki, Akif müəllim kimi alimin ən sevimli
doktorantıyam.
Pedaqogika elmimizin inkişafına bağlı illər bizdən
uzaqlaşıb tarixin səhifəsinə dönsə də, bizimlədir və
ümid edirik ki, 4 onillik qədər bir zaman kəsiyində
pedaqogika elminin təəssübünü çəkmiş, onu inkişaf
etdirmiş, eyni zamanda, mənəviyyatı, yüksək əxlaqi
keyfyyətləri ilə yüzlərlə alim-tədqiqatçıya yaxşı örnək
olmuş, bu gün də böyük enerji, yaradıcı ruhla fəaliyyət
göstərən tanınmış alim, professor Akif Abbasov bundan
sonra da böyük uğurlara imza atacaq.
Əziz elmi rəhbərim, Sizi 65 illik yubileyiniz
münasibətilə ürəkdən təbrik edir, yeni-yeni uğurlar
arzulayıram.
Müjkan MƏMMƏDZADƏ,
Təhsil Problemləri İnstitutunun doktorantı
|
