|
 Mayın
19-da Azərbaycan Dövlət Mahnı Teatrında təhsil
nazirinin əmrinə əsasən, ilk peşə və orta ixtisas
təhsili müəssisələrinin şagird və tələbələri arasında
keçirilən ifa üzrə Respublika müsabiqəsinin yekun
konserti olub. Tədbirdə Təhsil Nazirliyinin
Məktəbdənkənar fəaliyyətin təşkili şöbəsinin müdir əvəzi
Vasif Məmmədov, həmin şöbənin əməkdaşları - Maral
Salmanova, Fəqan Hüseynov, peşə və orta ixtisas təhsili
müəssisələrinin rəhbərləri və valideynlər iştirak
ediblər.
Öncə aparıcılar müsabiqənin keçirilməsində əsas
məqsədin şagird və tələbələrin asudə vaxtlarının
səmərəli və mənalı təşkil edilməsi, xüsusi istedada
malik olan gənclərin üzə çıxarılması, gənclərin ifa
mədəniyyətlərinin yüksəldilməsi, eyni zamanda musiqiyə,
şeirə, rəqsə məhəbbət hisslərinin aşılanması, Azərbaycan
bəstəkarlarının əsərlərinin, xalq mahnılarının və milli
rəqslərin öyrənilməsi olduğunu söyləyiblər.
Sonra ifa üzrə Respublika müsabiqəsinin yekun
konsertinə start verilib. 4 mərhələdə keçirilən
müsabiqədə Azərbaycan Milli Konservatoriyasının
tərkibində Musiqi Kollecinin, Bakı Kompüter, Şəki
Musiqi, Gəncə musiqi, Ağdaş Dövlət Humanitar, Sumqayıt
musiqi, Bakı Humanitar, Şuşa Humanitar, Göyçay Dövlət
İdarəetmə və Texnologiya, Azərbaycan Dövlət Pedaqoji
kolleclərinin və digər təhsil müəssisələrinin tələbə və
şagirdləri iştirak ediblər. Təsnif və xalq
mahnıları, şeir, rəqs nominasiyaları üzrə keçirilən
müsabiqədə şagirdlər və tələbələr öz istedad və
bacarıqlarını məharətlə nümayiş etdiriblər.
Sonda qaliblər Təhsil Nazirliyinin diplom və qiymətli
hədiyyələri ilə mükafatlandırılıblar.
Sifai SƏFƏROVA,
"Azərbaycan müəllimi" |
