|
 Azərbaycan
Respublikası Rabitə və Yüksək Texnologiyalar Nazirliyi,
AMEA-nın İdarəetmə Sistemləri və İnformasiya
Texnologiyaları institutları, Qafqaz Universiteti və
"İstək" liseyinin birgə təşkilatçılığı ilə məktəblilər
arasında "VIII İnformatika layihə olimpiadası"nın final
mərhələsi keçirilib.
Qeyd edək ki, 2008-ci ildən etibarən müntəzəm təşkil
olunan olimpiada orta məktəb şagirdlərinin İKT sahəsində
bilik və bacarıqlarının təkmilləşdirilməsinə yönəldilmiş
yarışdır. Olimpiadaya "Proqramlaşdırma", "Veb səhifə",
"Qısa film", "Animasiya" və "Robot" kateqoriyaları üzrə
ümumilikdə 70 layihə təqdim edilib ki, onlardan da 40-ı
final mərhələsinə vəsiqə qazanıb. Yarışmada Bakı
məktəbliləri ilə yanaşı, Gəncə, Lənkəran, Quba və digər
bölgələrdən olan şagirdlər də iştirak edib.
Olimpiadanın Qafqaz Universitetində keçirilən açılış
mərasimində çıxış edən universitetin rektoru Ahmet Saniç
bildirib ki, informasiya texnologiyaları üzrə peşəkar
kadrların hazırlanmasında dəyərli töhfələrini verən
universitet gənclərin yeni elmi biliklərə cəlb edilməsi,
kadr hazırlığı səviyyəsinin artırılması məqsədilə
müxtəlif səpgili müsabiqə və olimpiadalara ev sahibliyi
edir. Bu baxımdan, informatika üzrə yarışlarda iştirak
edən istedadlı gənclərin seçilməsinə və onların ölkəmizi
beynəlxalq yarışlarda layiqincə təmsil etməsinə təkan
verən olimpiadalar xüsusi rola malikdir.
 Bu
gün ölkəmizdə İKT sahəsində yeni layihələrin işlənib
hazırlanmasına böyük önəm verildiyini dilə gətirən AMEA
İdarəetmə Sistemləri İnstitutunun direktoru, akademik
Telman Əliyev bu istiqamətdə innovativ təfəkkürə malik
gənclərin rolundan danışıb. Onun sözlərinə görə,
olimpiadada təqdim olunan yüksək səviyyəli layihələr
ölkəmizdə böyük elmi potensiala malik istedadlı
gənclərin yetişməsinin göstəricisidir. Alim bu kimi
olimpiadaların keçirilməsinin gələcəyin peşəkar
kadrlarını aşkara çıxarmaq baxımından böyük əhəmiyyət
kəsb etdiyini vurğulayaraq olimpiadaya təqdim olunan
layihələrin gələcəkdə layihə müəllifləri tərəfindən
AMEA-nın institutlarında davam etdirilməsinin
mümkünlüyünü söyləyib.
Ölkəmizdə İKT sahəsinin inkişafının dövlət siyasətinin
prioritet istiqamətlərindən biri olduğunu vurğulayan
AMEA İnformasiya Texnologiyaları İnstitutunun
Tədris-İnnovasiya Mərkəzinin rəhbəri Rəsmiyyə Mahmudova
bu sahədə bir sıra qanunların və dövlət proqramlarının
qəbul edildiyini, bütün sferalarda müasir
texnologiyaların tətbiq edilməsi, şəbəkə
infrastrukturunun inkişaf etdirilməsi, hər kəsin
informasiya və biliklərə əlyetərliyinin təmin edilməsi
istiqamətində məqsədyönlü işlər görüldüyünü qeyd edib.
Şagirdlərdə kiçik yaşlarından etibarən İKT-yə marağın
yaradılması baxımından bu kimi olimpiadaların
keçirilməsinin böyük əhəmiyyətə malik olduğunu deyən
R.Mahmudova olimpiadada iştirak edən şagirdlərin
gələcəkdə bu sahənin mütəxəssisləri kimi Azərbaycanın
inkişafı naminə böyük töhfələr verəcəyinə əminliyini
ifadə edib.
Sonra şagirdlər hazırladıqları layihələri olimpiadanın
münsiflər heyətinin qarşısında nümayiş etdiriblər.
Təqdim olunmuş layihələr hər bir kateqoriya üzrə
ayrı-ayrılıqda müəyyən olunmuş kriteriyalar əsasında
qiymətləndirilib və qaliblər müəyyən olunub. Sonda
qaliblərə qiymətli hədiyyələr, medallar və sertifikatlar
təqdim olunub.
Y.ƏLİYEV,
"Azərbaycan müəllimi" |
