|
 Təhsil
Problemləri İnstitutunda (TPİ) "Ümumi təhsilin milli
standartlarının yaradılması: tarixilik və müasirlik
müstəvisində" mövzusunda tədbir keçirildi. TPİ-nin
direktoru Qulu Novruzov öncə iştirakçıları salamlayaraq
bugünkü tədbirin əsas məqsədinin Azərbaycan
Respublikasında aparılan təhsil islahatlarından irəli
gələn mühüm bir məsələnin həlli ilə bağlı olduğunu
bildirdi. Qeyd olundu ki, ölkəmizdə 1999-cu ildən
başlamış təhsil islahatlarının 2013-cü ilə qədərki
mərhələsi artıq başa çatıb. "Azərbaycan 2020: gələcəyə
baxış" İnkişaf Konsepsiyasına uyğun olaraq, Azərbaycan
Prezidentinin 24 oktyabr 2014-cü il tarixli Sərəncamı
ilə "Azərbaycan Respublikasında təhsilin inkişafı üzrə
Dövlət Strategiyası" qəbul olunub. Bu strategiyanın
həyata keçirilməsi məqsədilə Fəaliyyət Planı təsdiq
olunub. Q.Novruzov çıxışında qeyd etdi ki, artıq həmin
Fəaliyyat Planının yerinə yetirilməsi istiqamətində
tədbirlər görülür. Bu tədbirlər Təhsil Nazirliyinin
hazırladığı və təsdiq etdiyi Tədbirlər Planı əsasında
həyata keçirilir. Həmin sənəddə 2015-ci ildə görüləcək
işlər icra vaxtı nəzərə alınmaqla göstərilmişdir.
Q.Novruzov ümumi təhsil pilləsi üzrə milli məzmun
standartlarını hazırlayacaq işçi qrupu üzvləri ilə
yanaşı, fənlər üzrə işçi qrupunun nümayəndələrinə ümumi
təhsilin milli məzmun standartlarının hazırlanması
məqsədilə rəy və təkliflərini də bildirdi.
TPİ-nin direktor müavini Ənvər Abbasov təqdimatla çıxış
etdi. Ə.Abbasov "Təhsil standartlarının yaradılması",
"Standart və kurikulum anlayışları", "Dövlət təhsil
standartlarına verilən tələblər", "Təhsil sahəsində
dövlət standartları", "Kurikulum anlayışı", "Dövlət
Strategiyasında vəzifələr", "Dövlət Strategiyasında
hədəflər", "Səriştəyə əsaslanan şəxsiyyətyönlü yeni
məzmunun yaradılması", "Dövlət Strategiyasında
"standart" və "kurikulum" anlayışlarına yeni münasibət"
və s. məsələlər barədə geniş məlumat verdi. İnstitutun
şöbə müdiri Bibixanım İbadova isə Azərbaycan
Respublikasında 12 illik ümumi təhsilin milli təhsil
standartlarının hazırlanmasına dair işçi qrupu ilə
keçiriləcək təlim kursunun proqramı ilə iştirakçıları
tanış etdi.
Tədbirdə çıxışlar oldu, rəy və təkliflər ətrafında
müzakirələr aparıldı.
TPİ-nin Beynəlxalq əməkdaşlıq və informasiya şöbəsi |
