|
 Respublika
Bədən Tərbiyəsi və İdman Mərkəzinin kütləvi idman
tədbirlərinin təqvim planına əsasən, 2015-ci il tədris
ilinin birinci yarısında respublika ümumtəhsil və ilk
peşə-ixtisas təhsili müəssisələrinin şagirdləri arasında
VIII Spartakiada keçirilib. 8 idman növü üzrə keçirilən
yarışlar 4 mərhələdə təşkil olunub. Birinci mərhələdə
məktəbdaxili, ikinci mərhələdə rayondaxili, üçüncü
mərhələdə zona, dördüncü mərhələdə isə respublika final
yarışları keçirilib. Aprelin 1-16-da Bakı şəhərində VIII
Spartakiadanın final yarışları olub. Final oyunları
çərçivəsində Bakı-I, Bakı-II, Qax, İmişli, Gəncə,
Lənkəran, Mingəçevir, Qazax, Şirvan, Sabirabad, Salyan,
Sumqayıt, Şəmkir, Şamaxı, Şəki, Masallı, Tovuz, Zərdab,
Qusar, Kürdəmir, Goranboy, Gədəbəy, Ağstafa, İsmayıllı,
Cəlilabad və başqa rayonların komandaları mübarizə
aparıblar.
Final yarışlarında 35 rayondan 1600 məktəbli (730 qız) 8
idman növündə bacarığını nümayiş etdirib. Ümumi komanda
hesabında şəhərlər arasında Bakı Şəhəri üzrə Təhsil
İdarəsi birinci, Mingəçevir Şəhər Təhsil Şöbəsi ikinci,
Sumqayıt Şəhər Təhsil Şöbəsi və Şəki Şəhər Təhsil Şöbəsi
üçüncü yerə layiq görülüblər.
Rayonlar arasında Cəlilabad Rayon Təhsil Şöbəsi I,
Sabirabad Rayon Təhsil Şöbəsi II, Qusar və Qazax rayon
təhsil şöbələri III pillədə qərarlaşıblar. İlk
peşə-ixtisas təhsili müəssisələri arasında I yerə 7
saylı Bakı Peşə Liseyi layiq görülüb. İkinci və üçüncü
yerləri, müvafiq olaraq, 12 və 5 saylı Bakı Peşə
liseyləri tutublar. Bütün qalib məktəblilər Respublika
Bədən Tərbiyəsi və İdman Mərkəzi tərəfindən kubok,
diplom və xatirə hədiyyələri ilə mükafatlandırılıblar. |
