|
Bakıdakı 160 nömrəli klassik gimnaziyada "Kitabi-Dədə
Qorqud" eposunun tədqiqatına həsr olunmuş tədbir
keçirilib. Tədbirdə Təhsil Nazirliyinin nümayəndəsi
Elnur Əlizadə, Sosialist Əməyi Qəhrəmanı, Səbail rayon
Veteranlar Şurasının sədri Ömər Ağayev, Bakı Şəhəri
üzrə Təhsil İdarəsinn baş məsləhətçisi Böyükağa
Əhmədov, Səbail Rayon İcra Hakimiyyətinin baş
məsləhətçisi Şəfayət Həmidov və digərləri iştirak edib.
Tədbiri gimnaziyanın direktoru, əməkdar müəllim Faina
Ələkbərova açaraq qonaqları salamlayıb və tədbirin
əhəmiyyətindən söz açıb.
Məktəbin dil-ədəbiyyat müəllimi Tamilla Cəlilova
"Kitabi-Dədə Qorqud" dastanı haqqında ətraflı məlumat
verərək bildirib ki, bu dastan Azərbaycan xalq
ədəbiyyatının ən qədim yazılı abidəsidir. Ənənəyə görə
"Kitabi-Dədə Qorqud"da dastanların müəllifliyi Dədə
Qorquda aid edilir. XIV əsr tarixçilərindən Aybək
əd-Dəvadari və Fəzlullah Rəşidəddin Dədə Qorqudun
Məhəmməd peyğəmbər zamanında yaşadığını və türklər
tərəfindən elçi sifəti ilə onun yanına göndərildiyini
yazıblar. Dastanın müqəddiməsində də Dədə Qorqudun
Məhəmməd peyğəmbər zamanında yaşadığı qeyd edilir.
Sonra şagirdlərdən Fidan Quliyevanın "Dastanda
qəhrəmanlıq motivləri", Kəramət Vüsalın "Dastanda
vətənpərvərlik", Mübariz Abdullayevin "Dastanda milli
kamillik və mənəviyyat" mövzularında məruzələri
dinlənilib.
Məktəblilərin ifasında "Kitabi-Dədə Qorqud"a həsr olunan
şeirlər dinlənilib, milli rəqslər və səhnəciklər
təqdim olunub. Maraqlı keçən tədbir qonaqlarda xoş
ovqat yaradıb.
Sonda "Kitabi-Dədə Qorqud" dastanı barədə videoçarx
nümayiş edilib.
Sifai SƏFƏROVA,
"Azərbaycan müəllimi" |
