|
 Mayın
6-da Bakı Dövlət Universitetinin nəzdində fəaliyyət
göstərən "Gənc istedadlar" liseyində universitetin tarix
fakültəsi ilə birlikdə ümummilli lider Heydər Əliyevin
anadan olmasının 92-ci ildönümü münasibətilə "Müasir
Azərbaycan ulu öndər Heydər Əliyev ideyaları işığında"
mövzusunda elmi-nəzəri konfrans keçirildi. Tədbirdə
liseyin müəllim-şagird kollektivi ilə yanaşı, BDU-nun
müəllimləri, qonaqlar da iştirak edirdilər.
Konfransı giriş sözü ilə BDU-nun Elm və innovasiyalar
üzrə prorektoru, AMEA-nın müxbir üzvü, professor Aydın
Kazımzadə açaraq Heydər Əliyev şəxsiyyətindən, bu dahi
insanın Azərbaycan xalqının yaddaşında qurucu və
xilaskar dövlət xadimi, ümummilli lider kimi qalmasından
danışdı. Bildirdi ki, zəngin və şərəfli ömür yolu
keçmək, fenomenal keyfiyyətləri ilə milyonların qəlbində
ölməzlik məşəli yandırmaq, millətinə azadlıq hissini
bütün varlığı ilə yaşatmaq xoşbəxtliyi çox az liderlərə
nəsib olur. Tanrı belə şəxsiyyətlərə həm də xilaskarlıq
missiyası verir. Bu baxımdan, ulu öndər Heydər Əliyev
bütöv bir xalqın tarixinin yüksək zirvəsində özünə əbədi
yer qazanmış dahi şəxsiyyətdir.
Sonra BDU-nun Azərbaycan tarixi kafedrasının dosenti
Nuru Məmmədov "Ümummilli lider Heydər Əliyev müstəqil
Azərbaycan Respublikasının memarı və qurucusudur", tarix
fakültəsinin III kurs tələbəsi Saday Zəkiyev "Bakı
Dövlət Universiteti Azərbaycan xalqının milli
sərvətidir", "Gənc istedadlar" liseyinin VIII sinif
şagirdləri Leyla Abdullayeva "Heydər Əliyev və
Azərbaycan təhsili", İsmayıl Məmmədli "Heydər Əliyev və
ana dilimiz", Orduxan Qəhrəmanzadə isə "Heydər Əliyev və
Azərbaycan gəncliyi" mövzularında çıxış etdilər.
"Gənc istedadlar" liseyinin direktoru, professor Qasım
Hüseynov çıxışında qeyd etdi ki, misilsiz idarəetmə
istedadına malik olan ümummilli liderimiz Heydər Əliyev
Azərbaycana rəhbərlik etdiyi bütün dövrlərdə quruculuğun,
sosial-iqtisadi inkişafın, ictimai-siyasi sabitliyin,
dövlətçiliyin təminatçısı olmuş, ən ağır vaxtlarda
Azərbaycanın mənafeyi naminə xilaskarlıq missiyasını
yerinə yetirmişdir. Ulu öndər Heydər Əliyevin xalqımıza
əmanət qoyduğu müstəqil Azərbaycan Prezident İlham
Əliyevin müdrik rəhbərliyi ilə gələcəyə doğru inamla
addımlayır.
Sonda şair Oqtay Zəngilanlının ulu öndər Heydər Əliyevə
həsr olunmuş bir neçə şeiri səsləndirildi. |
