|
 Aprelin
22-də Bakıdakı 182 nömrəli tam orta məktəbdə dahi
ingilis şairi və dramaturqu Uilyam Şekspirin anadan
olmasının 451 illiyi ilə bağlı müəllim Elnurə Qasımova
ingilis dili fənnindən VIII "a" sinfində "Şekspirin
həyatı və yaradıcılığı" mövzusunda "açıq dərs" keçirib.
Bakı Şəhəri üzrə Təhsil İdarəsinin və Binəqədi Rayon
İcra Hakimiyyətinin nümayəndələrinin iştirakı ilə fərdi
və qruplarla iş formasında keçirilən dərsdə məqsəd
şagirdlərə Şekspirin həyatı və yaradıcılığı haqqında
məlumat vermək, dərsin mövzusu ilə bağlı olaraq
şagirdlərdə oxu, yazı, dinləmək, danışmaq bacarıqlarını
nümayiş etdirməkdən ibarətdir. Müəllim əvvəlcə
şagirdləri üç qrupa, "Otello", "Hamlet" və "Kral Lir"
adlı qruplara böldü. Hər üç qrupun şagirdləri onlara
ünvanlanan Şekspirin dövrü, həyatı, əsərləri haqqında
sualları məharətlə cavablandırdılar. İkinci tapşırıq
tədqiqata aid idi. Şekspirin məşhur "Romeo və Cülyetta"
əsərindən bir parça göstərildi. Şagirdlərə bu əsər
haqqında müxtəlif araşdırma sualları verilir, onların
bilik və bacarıqları müəyyənləşdirilirdi.
Sonra qruplara sərbəst, müstəqil və düzgün qərar qəbul
etmək üçün Şekspirin əsərlərindəki qəhrəmanlar haqqında
araşdırma sualları verildi. Qruplar öz işlərini təqdim
etdikdən sonra cavablar yoxlanıldı. Qarşılıqlı yoxlamaya
xüsusi diqqət yetirildi. Şagirdlər öz aralarında
bir-birlərini qiymətləndirdikdən sonra müəllim qruplar
arasında narazılıq yaranmasın deyə münsiflərdən -
dərsdə iştirak edən müxtəlif fənn müəllimlərindən
şagirdlərə obyektiv qiymət verməsini xahiş etdi.
Münsiflər heyəti tərəfindən obyektiv qiymətləndirmə
aparıldı. Sonra müəllim qiymətləndirmə cədvəlinə əsasən
I, II, III yerləri tutmuş qrupları müəyyənləşdirdi.
Dərsin müzakirəsi oldu. "Açıq dərs"də iştirak edən
qonaqlar geniş fikir mübadiləsi apararaq müəllim və
şagirdlər arasındakı münasibətlərə, şagirdlərin ingilis
dilində səlis danışıqlarına, müəllim yaradıcılığına,
texniki avadanlıqlardan yerli-yerində istifadə olunması
və digər məsələlərə dair fikirlərini söylədilər.
R.ZİYADOV,
"Azərbaycan müəllimi" |
