|
Gəncə Dövlət Universitetinin pedaqoji təcrübədə olan
tələbələri öz vəzifələrini yerinə yetirməklə bərabər,
olduqları məktəblərin kollektivi ilə birlikdə bu tədris
ocaqlarında keçirilən tədbirlərin hazırlanmasında da
yaxından köməklik göstərir, təcrübəli müəllimlərdən
öyrənirlər. Filologiya fakültəsinin Azərbaycan dili və
ədəbiyyatı ixtisasının Gəncə şəhər Məhəmməd Füzuli adına
22 nömrəli tam orta məktəbdə pedaqoji təcrübədə olan II
kurs tələbələrinin fəaliyyəti bu baxımdan xüsusilə
təqdirəlayiqdir.
Bu günlərdə tələbələr məktəbin şagird kollektivi ilə
birgə "Fəsillərin gözəli yaz" adlı tədbir hazırlamışlar.
Tədbirdə şagirdlər şeirlər söyləmiş, mahnılar ifa
etmişlər. Tələbələr isə hazırladıqları Məcid Şamxalovun
"Qaynana" tamaşasını nümayiş etdiriblər. Təcrübəçi
tələbələrdən Ruzanə Cəfərova (qaynana), Şahmalı Həsənov
(Ayaz), Nazlı Xəlilova (Afət), Pərvanə İsmayılova (Sevda),
Cavid Sadıqov (İlqar), Aytən Xasaylı (Sədaqət) öz
rollarını məharətlə ifa ediblər. Tələbələrin özlərinə
məxsus ifa tərzləri, obrazyaratma qabiliyyətləri,
ifaçılığa qarşı məsuliyyət hissləri tamaşanın uğurlu
alınmasına və dəfələrlə alqışlanmasına səbəb olmuşdur.
Tamaşanın sonunda filologiya fakültəsinin dekanı,
professor Mübariz Yusifov və Məhəmməd Füzuli adına 22
nömrəli məktəbin direktoru Abdulla Kərimov tədbirdə
iştirak edən şagird və tələbələrə öz təşəkkürlərini
bildirmişlər. Qeyd olunmuşdur ki, belə tədbirlər orta
məktəblə ali təhsil müəssisəsi arasında daha möhkəm
əlaqələrin və bağlılığın yaranmasına, şagird və
tələbələrin kollektivçilik ruhunda tərbiyəsinə, onlarda
yaradıcılıq qabiliyyətlərinin inkişafına, müsbət
mənəvi keyfiyyətlərin aşılanmasına şərait yaradır.
Maqbet ƏHMƏDOV,
GDU-nun Mətbuat xidmətinin rəhbəri |
