|
 23
aprel - Beynəlxalq Kitab Günü münasibəti ilə Azərbaycan
Respublikasının Prezidenti yanında Bilik Fondunun "İlboyu
bilik" proqramının "İmzalı görüş" layihəsinə start
verilib.
"İmzalı görüş"ün ilk qonağı Milli Məclisin deputatı,
yazıçı-publisist Aqil Abbas olub.
M.F.Axundov adına Azərbaycan Milli Kitabxanasında
keçirilən görüşdə kitabxananın direktoru, professor
Kərim Tahirov, respublikanın əməkdar mədəniyyət işçisi,
filologiya elmləri doktoru Vaqif Yusifli, Azərbaycan
Respublikası Mədəniyyət və Turizm Nazirliyinin şöbə
müdiri, şair, tərcüməçi Vaqif Bəhmənli, yazıçı-publisist
Rəşad Məcid, Bilik Fondunun əməkdaşları Xatirə Hüseynova,
Ramilə Qurbanlı, Ceyhun Musaoğlu və müxtəlif
universitetlərdən olan tələbələr iştirak ediblər.
Kitabxananın direktoru, əməkdar mədəniyyət işçisi Kərim
Tahirov gənclərin və yeniyetmələrin kitabxanalara cəlb
edilməsi məqsədilə Bilik Fondunun həyata keçirdiyi
layihənin əhəmiyyətindən danışıb. Milli Kitabxanada
tanınmış yazıçılarla gənclərin görüşlərinin mütəmadi
olaraq keçirildiyini bildirib.
Mədəniyyət və Turizm Nazirliyinin şöbə müdiri, şair
Vaqif Bəhmənli Aqil Abbas yaradıcılığından ana xətt kimi
keçən vətənpərvərlik, milli təəssübkeşlik və
yurdsevərlik keyfiyyətlərindən söhbət açıb. Yazıçının
"Evləri köndələn yar", "Batman qılınc", "Ən xoşbəxt adam"
və s. əsərlərində adi həyat hadisələrini ədəbiyyata
köçürmək bacarığını, əsərlərində Qarabağın şirin
ləhcəsini ustalıqla ədəbiyyata gətirdiyini bildirib.
Filologiya elmləri doktoru Vaqif Yusifli Qarabağ
haqqında, xüsusilə könüllü batalyonların ölüm-dirim
savaşından, elan olunmamış müharibənin gətirdiyi
bəlalardan, əliyalın, taleyin ümidinə buraxılmış
insanların yaşantılarından bəhs edən yazıçını sözü
deməyi bacaran qələm sahibi kimi dəyərləndirib. Onun "Qarda
açan qan çiçəyi", "Çadırda Üzeyir Hacıbəyli doğula
bilməz", "Qiyamət gecəsi", "Dolu" və s. əsərlərini
ədəbiyyatımızın uğuru adlandırıb.
Azərbaycan Yazıçılar Birliyinin katibi, "525-ci qəzet"in
redaktoru Rəşad Məcid Aqil Abbasın yolunun davamçısı
olaraq, ondan çox şey öyrəndiyini, sənətdə və həyatda
hər an onun köməyini, dəstəyini duyduğunu söyləyib. Onun
böyük ürəkli insan, səmimi dost olaraq insani
xüsusiyyətlərindən söhbət açıb.
Tələbələr yazıçının yalnız onlara paylanılan "Dolu"
kitabından deyil, bütün əsərlərindən onları
maraqlandıran suallara cavab alıblar.
Tədbir oxucularla müəllifin səmimi atmosferdə söhbəti
ilə davam edib. Sonda müəllif tələbələrə imzaladığı
kitabları verib.
Bilik Fondunun İnformasiya Təminatı sektoru |
