|
 Deyirlər,
xoş xəbər quş qanadlı olur. Tez bir zamanda insanların
könlünə yol açır. Leylanın da "Qran-pri" mükafatına
layiq görülməsi xəbərindən Bülbül adına Orta İxtisas
Musiqi Məktəbində tez xəbər tutdular. Məktəbin
fortepiano ixtisası üzrə müəllimi, əməkdar müəllim
Dilarə Mirzəquliyevanın, skripka üzrə müəllim Fatimə
İdyatulinanın sevincinə səbəb olub. Çünki Leyla onların
yetirməsi idi. Onlar istedadlı yeniyetmənin hər
uğurunu eşidəndə bax beləcə fəxarət hissi keçirirdilər.
Qeyd edək ki, 13 aprel 2015-ci il tarixində Estoniyanın
Tallin şəhərində gənc pianoçu, violin, violonçel
ifaçılarının "Young musician Tallin 2015" adlı
Beynəlxalq müsabiqəsi keçirilib. Müsabiqənin fortepiano
nominasiyasında Bülbül adına Orta İxtisas Musiqi
Məktəbinin VIII sinif şagirdi, beynəlxalq müsabiqələr
laureatı Leyla Zeynalova Azərbaycanı layiqincə təmsil
edib. Belə ki, o, həmin tədbirdə beynəlxalq
müsabiqənin "Qran-pri" mükafatına layiq görülüb. Bundan
başqa, münsiflər heyətinin qərarına əsasən o, dahi alman
bəstəkarı İ.S.Baxın əsərini yüksək səviyyədə ifasına
görə 2 xüsusi prizlə mükafatlandırılıb. Tallində
keçirilən bu müsabiqə müvafiq ixtisaslar üzrə ali təhsil
müəssisələrinə müsabiqədənkənar qəbul olunmağa əsas
verən dünya fənn olimpiadalarının, yüksək səviyyəli
beynəlxalq müsabiqələrin və yarışların siyahısına
daxildir.
Leyla Zeynalovanın builki uğurları bununla bitmir. O,
fevral ayında Estoniyanın Narva şəhərində keçirilən X
Beynəlxalq Şopen müsabiqəsində 10 Avropa ölkəsindən
olan 65 iştirakçı arasında öz yaş qrupu üzrə II yeri
tutub. Aprel ayında isə Gürcüstanın Mədəniyyət
Nazirliyinin təşkilatçılığı ilə keçirilən "Gələcəyin
ulduzları" adlı layihə çərçivəsində Tbilisi Dövlət
Konservatoriyasının "Grand Hall" zalında solo proqramla
çıxış edib.
2014-cü ildə festival və konsertlərdə, müxtəlif
nominasiyalı müsabiqələrdə qazandığı uğurlara görə ölkə
Prezidenti İlham Əliyevin müvafiq sərəncamı ilə adı
gənc istedadların "Qızıl kitabı"na daxil edilib və o,
xüsusi aylıq təqaüdə layiq görülüb.
Musiqi sənətində pillə-pillə yüksələn bu yeniyetməni
hələ qarşıda çoxlu qələbələr, mükafatlar, diplomlar,
fəxri adlar gözləyir.
...Bu sözləri onun qazandığı uğurlarında payı olan
sənət adamları - müəllimləri söylədi. |
