|
Aprelin 17-18-də Qafqaz Universitetində ümummilli lider
Heydər Əliyevin anadan olmasının 92-ci ildönümünə həsr
olunmuş gənc tədqiqatçıların III beynəlxalq elmi
konfransı keçirilib.
Konfransın ilk iş günündəki
açılış mərasimində ulu öndərin xatirəsi bir dəqiqəlik
sükutla anılıb, Azərbaycanın Dövlət himni səsləndirilib.
Konfrans iştirakçıları ümummilli liderin həyat və
fəaliyyətindən bəhs edən filmi izləyiblər.
Mərasimdə çıxış edən Qafqaz Universitetinin rektoru,
professor Ahmet Saniç konfrans iştirakçılarını
salamlayaraq rəhbərlik etdiyi ali məktəbin elmin
inkişafına və bu inkişafa xidmət edən dünya alimlərinin
apardıqları tədqiqatlardan əldə etdikləri nəticələrin
yüksək səviyyədə müzakirəsinə böyük önəm verdiyi üçün
hər il beynəlxalq konfranslar keçirdiyini bildirib.
Qeyd olunub ki, həmin konfranslar içərisində
ümummilli lider Heydər Əliyevin əziz xatirəsinə həsr
olunan və onun doğum günü ərəfəsində üç ildir ki,
ənənəvi davam edən gənc tədqiqatçıların beynəlxalq elmi
konfransı xüsusi əhəmiyyət kəsb edir. Rektor diqqətə
çatdırıb ki, bunun bir səbəbi müasir Azərbaycan
dövlətinin memarı və qurucusu olan ulu öndər Heydər
Əliyevin və onun layiqli davamçısı Prezident İlham
Əliyevin gənclərə və onların hərtərəfli inkişafına
verdikləri xüsusi önəmdirsə, digər mühüm səbəb
günü-gündən çiçəklənən, öz stabilliyi və sürətli
inkişafı ilə təkcə Qafqaz regionunda deyil, bütün dünya
miqyasında önəmli yer tutan Azərbaycan dövlətinin əldə
etdiyi böyük nailiyyətləri gənclərin dilindən eşitmək və
onları dünya ictimaiyyətinin nəzərinə məhz gənclərin
dili ilə çatdırmaqdır. Çıxışının sonunda konfransın
təkcə Azərbaycan gənclərinin deyil, xarici ölkələrin
gənc tədqiqatçılarının da böyük marağına səbəb oldugunu
deyən rektor onun işinə uğurlar arzulayıb.
BDU-nun elm və innovasiyalar üzrə prorektoru, AMEA-nın
müxbir üzvü, professor Aydın Kazımzadə də konfrans
iştirakçılarına səmərəli iş arzulayıb. Çıxışında
konfransın əhəmiyyətini yüksək dəyərləndirən prorektor
ulu öndər Heydər Əliyevin hələ ölkəmizdə hakimiyyətdə
olduğu ötən əsrin 70-ci illərində elmin, təhsilin
inkişafına böyük diqqət yetirdiyini, son illər yüksək
inkişaf və tərəqqiyə çatmağımızda məhz o illərdə atılmış
addımların mühüm rolu olduğunu vurğulayıb.
Təşkilat Komitəsinin adından çıxış edən dosent Babək
Abbasov bildirib ki, məqsədi dünyanın müxtəlif
universitet, akademiya və elmi-tədqiqat institutlarında
fəaliyyət göstərən gənc tədqiqatçıları bir araya
gətirmək, əldə olunan elmi nailiyyət və təcrübələri
paylaşmaq, problemləri təhlil etmək olan konfransa
Azərbaycan, ABŞ, Böyük Britaniya, Çin kimi ölkələrdən
1300 məruzə tezisi daxil olub. Müvafiq
qiymətləndirmədən sonra onlardan 966-sı seçilərək
konfransın proqramına daxil edilib və iki cilddən ibarət
kitab şəklində çap olunub.
Sonra konfrans 21 istiqamət üzrə yaradılmış 5 bölmədə
işini davam etdirib.
Yusif ƏLİYEV,
"Azərbaycan müəllimi" |
