ARXİV

11 Aprel 2015 - №12

Xarici xəbərlər

Rusiya universitetləri bir arada 

Aparıcı ali məktəblər onlayn-təhsili inkişaf etdirəcək 

Rusiyanın qabaqcıl universitetləri onlayn-təhsili  birgə inkişaf etdirmək məqsədilə  qeyri-kommersiya təşkilatı yaradıblar.  Bu barədə məlumatı Rusiyanın Təhsil və Elm Nazirliyinin mətbuat xidməti yayıb.  Nazirliyin  şura iclasında    müzakirə olunan başlıca  mövzu  əsas təhsil proqramlarının reallaşdırılması gedişində onlayn-kurslardan istifadə olunması modeli olub.  Şuranın üzvlərinin  fikrincə, kurslardan geniş istifadə olunması  universitetlərin birgə səyləri, şəbəkə çərçivəsində  mümkündür.   "Bundan başqa, universitetlərdə təhsil proqramlarından kənar onlayn-kursların mənimsənilməsi üzrə təlim nəticələrinin  təkrar qiymətləndirilməsi üçün normativ- hüquqi baza da yaradılacaq.  Bu,  tələbələrin mobilliyini artırmağı təmin edəcək  və onlara keyfiyyətli təhsil   seçmək üçün real hüquq  verəcək", - deyə nazirliyin mətbuat xidmətindən məlumat verilib. Bundan əlavə, Rusiyanın 8 aparıcı universitetinin  daxil olduğu " Rusiya Milli Açıq Təhsil Platforması" Assosiasiyasının təsis yığıncağı keçirilib. Aralarında M.V.Lomonosov adına Moskva Dövlət Universiteti, Sankt-Peterburq Dövlət Universiteti, Moskva Ali İqtisadiyyat  Məktəbi, Moskva Fizika-Texnika İnstitutunun da olduğu  8 nüfuzlu ali məktəbin  hər biri  yaxın 3 il ərzində onlayn-təhsilin inkişafına 50 milyon rubl sərf edəcək. Təhsil və elm naziri  Dmitri Livanovun sözlərinə görə, belə bir platformanın yaradılması  təhsil proqramlarının keyfiyyətinin yaxşılaşmasına xidmət edəcək.

"Mən bu vəzifənin ölkənin kifayət qədər maliyyə imkanlarına malik aparıcı universitetlərinin  üzərinə düşməsini  tamamilə düzgün hesab edirəm, məhz onlar yüksək keyfiyyətli təhsil kontenti üçün məsuliyyət daşıyır və daşımalıdırlar", - deyə nazir bildirib.   İlk kursların  2015-ci ilin sentyabrından tətbiqi planlaşdırılır.

Amerika təhsilində qalmaqal 

11 müəllim imtahanların nəticələrinin saxtalaşdırılmasında ittiham olunur 

ABŞ-ın  Corciya ştatının paytaxtı Atlantada  11 keçmiş müəllim  və digər  təhsil işçiləri  məktəb imtahanlarının nəticələrini saxtalaşdırmaqda təqsirli biliniblər.  Ölkənin prokurorluq orqanları ABŞ tarixində  ən iri təhsil qalmaqallarından biri  çərçivəsində  4 il əvvəl 35 müəllimə qarşı ittiham irəli sürüb.  2011-ci ildə keçirilən istintaqın məlumatına görə,  Atlantanın 56 bələdiyyə məktəbindən  40-da saxtakarlıq olub.

  Prokurorluqda qeyd edirlər ki, təhsil müəssisələrinin müdiriyyətləri  və müəllimlər  imtahan nəticələrinin yuxarı təhsili idarəetmə  orqanlarının qoyduğu normalara uyğun olduğunu göstərmək üçün testlərin nəticələrini saxtalaşdırmış və onları  qeyri-korrektə olunmuş formada tərtib ediblər.

Videooyunlar şagirdlərin davranışına pis təsir edir 

Alimlər araşdırma aparıblar 

Alimlər müəyyən ediblər ki, gün ərzində 3  saat videooyunlarla məşğul olmaq uşaqların təhsil uğurlarına və davranışlarına mənfi təsir göstərir.  Böyük Britaniyanın Oksford Universitetinin alimlərinin  tədqiqatları gedişində məlum olub  ki, bu cür  uşaqlar tez-tez hiperaktivlik  nümayiş etdirir, müxtəlif münaqişə və davalarda iştirak edir və təhsilə maraqlı deyillər. Mütəxəssislər 12-13 yaşlı 200 məktəbli  arasında sorğu aparıblar. Bəzi valideynlər  iddia edirlər ki, videooyunlar uşaqların  müvəffəqiyyət dərəcəsini artıra  və sosial bacarıqlarını inkişaf etdirə bilər.  Lakin tədqiqatlar bunun tam əksini göstərib. Videooyunlara maraq göstərən  uşaqlar bu cür oyunlara maraq göstərməyən uşaqlardan heç də yaxşı oxumayıblar, onların  həmyaşıdları ilə ünsiyyətdə olmaq bacarıqları da yaxşı olmayıb.    Məlum  olub ki,  gün ərzində cəmi bir saat videooyunlara maraq göstərən uşaqlar özlərini yaxşı aparıblar və az hiperaktivdirlər.  Tədqiqatçılar valideynlərə uşaqlarının videooyunlara neçə saat vaxt ayırmalarını izləməyi tövsiyə ediblər. 

Finlandiyada maraqlı təcrübə 

Gənclər  məktəbdən sonra ali  məktəbə  getmək istəmir 

Finlandiyada getdikcə daha çox gənc orta məktəbi bitirdikdən sonra dərhal  ali məktəbə  daxil olmaqdan imtina edir və birillik fasilə  götürürlər.  Bu dövrdə onlar  ya işləyir, ya da səyahətə çıxırlar.  İqtisadi İnformasiya Mərkəzinin məlumatına görə, builki məzunların 25 faizi universitet təhsilinə qədər birillik fasilə götürməyə qərar verib.  Mərkəzin direktoru  Luisa Tenxunen-Ryotsalaeynen  məzunlar  arasında  birillik fasilənin populyarlıq  qazanmasını  onunla izah edir ki, tələbələrə  tədris prosesində ixtisaslarını  dəyişmək getdikcə çətinləşir.   "Gənclərə elə gəlir ki, məktəbi bitirdikdən sonra onlardan hansı ixtisası seçmələri  və hansı sahədə işləmələrini  dəqiq bilmələri tələb olunur.   Bu ona görə baş verir ki, tələbələr təhsil gedişində ixtisası necə dəyişməyin mümkünlüyü barədə məlumata malik olmurlar.  Bu qeyri-müəyyənlik isə məzunlara təzyiq göstərir".  Mərkəzin direktoru  qeyd edir ki,  birillik  fasiləyə daha çox qızlar əl atırlar. "Qızlar tam əmin olmaq istəyirlər ki, onların sonrakı qərarı tam düzgün olacaq, gələcəkdə nə olacağını bilmək istəyirlər".  Mərkəzin 4 min məzun  arasında apardığı  sorğunun nəticəsinə görə, onların yalnız 18 faizi  məktəbdən sonra hansı  istiqamətdə inkişaf edəcəklərini  özləri üçün müəyyənləşdiriblər.  Respondentlərin 70 faizi isə hələ məktəbin buraxılış sinfində oxuduğu dövrdə əmək bazarı barədə daha çox məlumat almaq istədiyini bildirib.  Finlandiyada VII-VIII sinif şagirdlərinə  1-3 həftə ərzində özlərini əsl işdə sınamaları üçün imkan yaradılır.  Buraxılış siniflərinin şagirdləri də bu praktikadan yararlanmaq  istədiklərini bildiriblər.