|
 Bu
yaxınlarda təhsil sahəsində növbəti bir yeniliyə imza
atıldı. Təhsil nazirinin müvafiq əmrınə əsasən I sinfə
şagird qəbulunun elektron sistem vasitəsilə həyata
keçirilməsinə start verildi. Yeniliyin tətbiqindən
təxminən 1 ay keçir. Prosesin necə getdiyini öyrənmək
üçün ümumtəhsil müəssisələrindən birində - Bakı şəhəri
276 nömrəli tam orta məktəbdə olduq.
Məktəbin direktoru Bəhram Şiriyev bizimlə söhbət zamanı
bildirdi ki, məktəbdə qeydiyyat komissiyası yaradılıb.
Binəqədi rayonu üzrə fəaliyyət göstərən 2 alternativ
sənəd qəbulu komissiyasından biri də məhz bu ümumtəhsil
müəssisəsində yerləşir. Hər iki komissiyanın normal
fəaliyyət göstərməsi üçün 2 otaq ayrılıb. Elektron sənəd
qəbulu həftənin I-VI günləri saat 9:00-dan 16:00-a qədər
aparılır. Bütün bunlarla bağlı məlumat xarakterli
elanlar və 2015-2016-cı tədris ilində dərs deyəcək I
sinif müəllimlərinin siyahısı məktəbin məlumat lövhəsinə
vurulub ki, bu da valideynlərin operativ
məlumatlandırılmasına kömək edir.
Direktor əlavə etdi ki, tətbiq olunan yenilikdən
valideynlər çox razıdırlar. Belə ki, onlar I siniflərə
qəbulun elektron sistem vasitəsilə aparılmasının daha
rahat və əlverişli olduğunu bildirirlər.
Qeydiyyat komissiyasına valideynlər məhz övladlarının
bu təhsil ocağında I sinfə qəbulu ilə bağlı müraciət
edirlər. Bu günə qədər 53 valideynin övladının I sinfə
qəbulu ilə bağlı elektron sənəd qəbulu aparılıb, 6
nəfər isə özü onlayn olaraq qeydiyyatdan keçib.
Alternativ sənəd qəbulu komissiyasında isə
valideynlərin müxtəlif məsələlərlə bağlı müraciətləri
olur. Bu komissiyanın üstünlüklərindən biri
valideynlərin övladlarının yaşadıqları ərazidən uzaqda
yerləşən istədikləri məktəbə qəbulu üçün elektron ərizə
ilə müraciətlərini reallaşdıra bilmələridir. Burada
qeydiyyatdan keçməyə gələn valideynlərə 5 məktəbi seçib
siyahıya əlavə etmək, uşağının təhsil almasını arzu
etdiyi məktəbi müəyyənləşdirdikdən sonra isə onlardan
yalnız birinə sorğu yerləşdirmək hüququ verilir.
6 yaşı tamam olmayanlarla bağlı da valideynlərin
müraciətləri olur. Belələrinə müvafiq qaydalar bir daha
izah olunur.
Alternativ sənəd qəbulu komissiyası rayonda yerləşən
bütün məktəblərə nəzarət etmək imkanına malikdir. Bu
günə qədər rayonun ərazisində yerləşən məktəblərə
valideynlər tərəfindən təxminən 500-ə yaxın elektron
ərizə ilə müraciət olunub
Samirə KƏRİMOVA,
"Azərbaycan müəllimi"
Foto Rəşad ZİYADOV |
