|
Bakıdakı 182 nömrəli tam orta məktəbdə bayram şənliyi
çox məzmunlu və maraqlı təşkil olunmuşdu. Məktəbin
həyətində hazırlanmış bayram şənliyində pedaqoji və
şagird kollektivi ilə yanaşı, Təhsil Nazirliyindən, Bakı
Şəhəri üzrə Təhsil İdarəsindən nümayəndələr, məktəb
direktorları və KİV təmsilçiləri də iştirak edirdilər.
Meydanda dairəvi düzülmüş şagirdlərin əlində xonçalar və
səmənilər var idi. Bayram tonqalının yanında xalçanın
üstündə oturmuş şagirdlər növbənöv şirnilər hazırlayıb
Novruz xonçalarını bəzəyirdilər.
Məktəbin akt zalında davam edən al-əlvan çiçəklərlə,
bayram xonçaları, rəngbərəng şamlar və səmənilərlə
bəzədilmiş mərasimə Azərbaycanın Dövlət himninin
sədaları altında üçrənglı bayrağımız gətirildi.
Məktəbin direktoru Zinyət Tağıyeva şənlik
iştirakçılarını Novruz bayramı münasibəti ilə təbrik
etdi. Sonra Azərbaycan xalqının minilliklər boyu qoruyub
saxladığı mənəvi sərvəti - Novruz bayramının tarixi,
adət-ənənələri, mərasimləri barədə məlumat verdi.
Bildirdi ki, onları yaşatmaq, nəsillərdən-nəsillərə
ötürmək hər bir azərbaycanlının borcudur.
Tədbirin aparıcıları ilaxır çərşənbə, Novruzla bağlı
xalqımızın həyatında yüz illərlə yaşayan
adət-ənənələrdən söz açdılar.
Tədbirdə iştirak edən qonaqlar çıxışlarında Novruz
bayramının milli köklərə bağlılığından və tarixindən
danışdılar.
Sonra meydan Kosa ilə Keçələ verildi. Novruzun əsas
atributlarından olan Kosa və Keçəl məzhəkəli oyunları,
məzəli çıxışları ilə hamının diqqətini cəlb etdi. Onlar
Novruz bayramı münasibəti ilə tədbir iştirakçılarını
təbrik edərək, xalqımıza həmişə bayram əhvali-ruhiyyəli
günlər arzuladılar.
Məktəbin istedadlı şagirdlərinin ifasında bədii proqram
nümayiş olundu. Bahar qızın meydana gəlişi, təmsil
etdiyi fəslin şəninə söylədiyi şeir və mahnılar,
şagirdlərin ifaları, milli adət-ənənələrimizə aid
oyunlar, müxtəlif idman nömrələri bayram
iştirakçılarında xoş ovqat yaratdı.
Tədbirin sonunda şagirdlər və qonaqlar bayram tonqalının
ətrafında yallı getdilər.
Rəşad RAMAZANOĞLU,
"Azərbaycan müəllimi" |
