|
Təhsil Nazirliyinin təşkilatçılığı ilə məktəblilərin
mini-futbol üzrə Bakı şəhər çempionatıına start
verilib. "Təhsil" Respublika İdman Mərkəzinin direktoru
Natiq Lahıcovdan aldığımız məlumata görə, yarışda Bakıda
yerləşən 305 ümumtəhsil məktəbindən 3660 nəfər VIII
sinif şagirdi iştirak edir. AFFA tərəfindən təyin
edilmiş hakimlərin idarə etdiyi yarışlar Bakı şəhərində
yerləşən 12, 42, 26, 94, 95, 106, 158, 182, 183, 190,
200, 245, 276, 285, 310 nömrəli tam orta məktəblərin
idman zalında keçirilir.
Rayondaxili yarışları əhatə edən və "Olimpiya" sistemi
üzrə keçirilən birinci mərhələnin oyunları martın 8-də
başa çatacaq. II mərhələdə yarışlar yarımqruplar üzrə
təşkil olunacaq. Sonuncu mərhələdə isə yarımqrupların
qalibləri qarşılaşacaqlar.
Çempionatın keçirilməsində məqsəd "Azərbaycan
Respublikasında 2005-2015-ci illərdə futbolun inkişafına
dair Dövlət Proqramı"ndan irəli gələn vəzifələri yerinə
yetirmək, Bakı şəhərində keçiriləcək I Avropa Oyunlarını
təbliğ etmək, məktəbli futbolçuların idman ustalıqlarını
artırmaq və yeniyetmələri sağlam həyat tərzinə cəlb
etməkdən ibarətdir.
|
