|
 Hacıqabul
şəhər İlqar Ələkbərov adına 1 nömrəli tam orta məktəbin
məktəbdənkənar və sinifdənxaric işlər üzrə təşkilatçısı
Adilə Salmanovanın redaksiyamıza göndərdiyi məktubda
bildirilir ki, şagirdlərin hərbi-vətənpərvərlik
tərbiyəsi günün vacib tələbidir.
Məktəbdə şagirdlərin hərbi-vətənpərvərlik tərbiyəsini
gücləndirmək məqsədilə Dövlət himninin öyrədilməsi,
dövlət rəmzlərinin müqəddəsliyi hissinin hər bir şagirdə
aşılanması ön plana çəkilir.
Bu məqsədlə RTŞ tərəfindən ötən həftə
"Hərbi-vətənpərvərlik həftəsi" keçirilib. Məktəbdə
gecələr, sərgilər, görüşlər, müsabiqələr və "dəyirmi
masa"lar təşkil edilib. Hərbi-vətənpərvərlik mövzusunda
keçirilmiş "dəyirmi masa"da Azərbaycanın Milli
Qəhrəmanı Mübariz İbrahimov və zabit Fərid Əhmədovun
xatirəsi anılıb. "Dəyirmi masa"da hər iki şəhidin
mənəvi-psixoloji hazırlığı, dözümlülüyü, döyüşçü
həmrəyliyi, səngər dostluğu haqqında geniş məlumat
verilib. Xalqımızın və dövlətimizin hər iki şəhidə və
onların ailəsinə diqqət və ehtiramı şagirdlərin qəlbində
böyük rəğbət hissi doğurub.
"Qəhrəmanlar ölmürlər" mövzusunda qələmə alınmış inşa
yazılarında Azərbaycan əsgərinin mübarizliyindən,
dönməzliyindən, vətənə sədaqətindən böyük məhəbbətlə
söhbət açılıb. Hərbi-vətənpərvərlik mövzusunda qələmə
alınmış əsərlərin müzakirəsi məktəbin kitabxanasında
keçirilib.
"Bu günün şagirdi sabahın əsgəridir" adı altında
keçirilmiş görüş də şagirdlər tərəfindən maraqla
qarşılanıb. Görüşdə əsgəri xidmətdən məzuniyyətə gəlmiş
Elşən Zərbəliyev öz təəssüratlarını şagirdlərlə bölüşüb.
Əsgər qeyd edib ki, vətənpərvərlik hissi insanı Vətən
yolunda misilsiz qəhrəmanlığa ruhlandırır, yüksək
vətəndaşlıq, qeyrət, döyüşkənlik, məğrurluq hissi
aşılayır. O, uşaqlara vətənini, xalqını, dilini, dinini
sevməyi və vətən borcunu ləyaqətlə yerinə yetirməyi
arzulayıb.
Şəhər 1 nömrəli tam orta məktəbdə dərsdənkənar vaxtlarda
Azərbaycan Silahlı Qüvvələrinin tarixi, azərbaycanlı
generalların, milli qəhrəmanların, ad-san qazanmış əsgər
və zabitlərin döyüş yolu, qəhrəmanlıq nümunələri
diqqətlə öyrənilib şagirdlərə təbliğ edilir. Bu mövzuda
şagirdlərlə Azərbaycan tarixindən bilik yarışları
keçirilib. "7 sual - 7 cavab" viktorinasında şagirdlər
Azərbaycan tarixinə, mədəniyyətinə, Konstitusiyasına,
hərb tarixinə aid olan sualları böyük həvəs və coşqu ilə
cavablandırıb, yüksək bilik nümayiş etdiriblər.
Məktəbdə aparılan hərbi- vətənpərvərlik tərbiyəsinin
nəticəsi olaraq şagirdlər əminlik ifadə ediblər ki,
Azərbaycan Prezidenti, Silahlı Qüvvələrin Ali Baş
Komandanı İlham Əliyevin apardığı uğurlu daxili və
xarici siyasətin nəticəsində tezliklə torpaqlarımız
düşmən tapdağından azad olacaq, qaçqınlarımız öz doğma
yurd-yuvalarına qayıdacaqlar. |
