|
Təhsil Nazirliyi, Səhiyyə Nazirliyinin İctimai Səhiyyə
və İslahatlar Mərkəzi, həmçinin "Ümidli Gələcək" Gənclər
Təşkilatının birgə layihəsi olan "Təhsil müəssisələrində
reproduktiv sağlamlığın tədrisi" mövzusunda növbəti
təlimlər keçirilib.
Mingəçevir, Gəncə və Şəki şəhərlərində keçirilən
təlimlərin məqsədi orta ümumtəhsil müəssisələrində
biologiya və həyat bilgisi fənlərini tədris edən
müəllimlərin zərərli vərdişlərdən qorunma, sağlam həyat
tərzi və reproduktiv sağlamlıqla bağlı səriştə və
kompetensiyalarının artırılmasıdır.
Müəllimlər insanın bioloji və psixososial inkişafı,
yeniyetmələrin riskli davranışlarının səbəbi və onu
tənzimləmə mexanizmləri, təhlükəsiz məktəb mühitinin
xüsusiyyətləri və bu kimi digər məsələlər barədə
mütəxəssislərin mühazirələrini dinləyib, praktik
məşğələlərdə iştirak ediblər. |
