|
 Fevralın
26-da Təhsil Nazirliyinin tabeliyindəki "Tərəqqi"
texniki-humanitar liseyində Xocalı faciəsinin 23-cü
ildönümü ilə bağlı tədbir keçirildi. Liseyin müəllim və
şagirdləri faciə qurbanlarının xatirəsini hörmətlə yad
etdilər. Dövlət himninin ifasından sonra faciəyə həsr
olunmuş "Unutma, unutdurma" adlı videoslaydların
nümayişi oldu. Sonra II "b" sinif şagirdləri Xocalı
soyqırımına həsr olunmuş bədii kompozisiya təqdim
etdilər. Şagirdlərin pantomim janrında təqdimatları
tədbir iştirakçılarına acılı anlar yaşatdı. V "a" və V
"b" sinif şagirdləri Zeynəb, Fatimə, Selcan, Şəbnəm, IX
"a" sinif şagirdləri İlahə və Zülfiyənin ifa etdikləri
şeirlər isə sanki faciə qurbanlarına elegiya oldu.
IX sinif şagirdləri Zərnigar və Fidanın "O qızın göz
yaşları..." kompozisiyası da tədbirin ən maraqlı və
təsirli nömrəsi oldu.
Bir qrup şagird növbə ilə Xocalı faciəsi, onun başvermə
səbəbləri haqqında danışdı, faciənin acı statistikasını
yada saldı. Xocalı faciəsini tariximizin ən qanlı
səhifələrinin biri kimi xarakterizə edən şagirdlər onu
heç vaxt unutmayacaqlarını bildirdilər.
Tədbirdə yazıçı Hüseynbala Mirələmovun şagirdlər
tərəfindən səhnələşdirilmiş "Xəcalət" pyesi
iştirakçıların çox xoşuna gəldi. Pyesdə Xocalıdan qaçqın
düşmüş bir ailənin faciəsindən bəhs edilir.
Xocalı faciəsinin dünyaya soyqırımı kimi tanıdılması
istiqamətində ölkəmizdə aparılan işlərdən söz açan
şagirdlər Heydər Əliyev Fondunun vitse-prezidenti Leyla
Əliyevanın təşəbbüsü ilə həyata keçirilən "Xocalıya
ədalət!" kampaniyasının müsbət nəticələr verdiyini,
artıq dünyanın onlarca dövlətində Xocalı faciəsini
soyqırımı kimi tanıyan və onu pisləyən bəyanatlar qəbul
olunduğunu diqqətə çatdırdılar.
Sonda liseyin direktoru, əməkdar müəllim Məhbubə
Məmmədova çıxış edərək Xocalı faciəsinin xalqımızın ən
ağır dərdlərindən biri olduğunu və onun unudulmaması
üçün bugünkü şagirdlərin də üzərinə məsuliyyət yükü
düşdüyünü söylədi, tədbirin hazırlanmasında və
təqdimatında əməyi olan müəllim və şagirdlərə
minnətdarlığını bildirdi.
Yusif ƏLİYEV,
"Azərbaycan müəllimi" |
