|
 Fevralın
17-də Bakı Modern Məktəbində 21 fevral Beynəlxalq
Ana dili Gününə həsr edilmiş "Ana dilimizi sevək,
sevdirək" adlı ədəbi-bədii kompozisiya keçirildi.
Kompozisiya məktəbin 3 A1 sinfinin şagirdləri tərəfindən
hazırlanmışdı. Tədbirin keçirilməsində məqsəd
şagirdlərdə kiçik yaşlarından nitq mədəniyyəti
formalaşdırmaq, onlarda şifahi nitq bacarıqlarını
inkişaf etdirmək, fikirlərini sərbəst ifadə etmək,
səlis, düzgün danışmaq, dinləyərək anlama, danışıq
zamanı fikirləri tamamlama kimi bilik, bacarıq,
vərdiş aşılamaq idi.
Hər bir xalq öz dili ilə yaranır. Ancaq xalqın dilini
yaşatmaq, inkişaf etdirmək və dünya mədəniyyəti
səviyyəsinə qaldırmaq onun qabaqcıl adamlarının, elm,
bilik xadimlərinin fəaliyyəti nəticəsində mümkün olur.
Ana dilini bilməmək, ana dilini qiymətləndirməmək,
şübhəsiz ki, xalq qarşısında böyük qəbahətdir.
Kiçikyaşlılar sinif rəhbəri Sevinc Əliyevaya məxsus
xüsusi hazırlanmış ssenari ilə çıxış etdilər.
Canlandırılan səhnəciklər onların özlərini ifadə edə
bilmə bacarığını yüksək dərəcədə göstərirdi.
Tədbirdə Milli Məclisin üzvü Nizami Cəfərov, Təhsil
Nazirliyinin Məktəbəqədər təhsil sektorunun müdiri
Nərminə Alnağıyeva, Qiymətləndirmə və innovasiya
şöbəsinin əməkdaşı Namiq Nağıyev, pedaqogika üzrə
fəlsəfə doktoru, dosent Bibixanım İbadova, filoloq Sevil
Yusifova, Bakı Şəhəri üzrə Təhsil İdarəsi ümumitəhsil
sektorunun baş məsləhətçisi Tural Mirzəliyev, İctimai
Televiziyanın əməkdaşı Orxan Cabbarlı iştirak
edirdilər.
Tədbir yüksək səviyyədə hazırlanmışdı. İKT-dən, müasir
avadanlıqlardan, Veb 2 və Veb 3 alətlərindən istifadə
edilərək Azərbaycan dili standartları reallaşdırılmışdı.
Qonaqarı valeh edən keçmişlə müasir dövrün sintezi,
müasir yanaşmaların nümayişi, Azərbaycan dilinin
rəngarəngliyi, gözəlliyinin xüsusi və yeni yazılmış
səhnəciklər üzrə nümayiş etdirilməsi oldu.
Videoreportajlar, İçərişəhər, Şirvanşahlar sarayında
çəkilərək nümayiş etdirilən səhnəciklər zamanı
şagirdlərin istedadlarının, 7-8 yaşlı kiçik
məktəblilərin potensial imkanlarının hər vasitə ilə üzə
çıxarıldığının şahidi olduq. Şagirdlərin "Azərbaycan
dilimizi sevirik, onu hər yerdə, hər zaman yayacaq,
inkişaf etdirəcəyik " demələri, bunu söyləyərkən qürur
və iftixar hissi keçirmələri hamı tərəfindən
bəyənildi. Bu səhnələri görmək çox qürurverici idi.
Kiçik yaşlarından şagirdlərdə vətənpərvərlik, dövlətə,
dilə, bayrağa olan sevginin yüksəkliyini, ifadə
etdikləri hər fikirdə özünü büruzə verən mübarizlik
nümunələri ilə fəxr etməmək mümkün deyildi.
Tədbirdə inteqrasiyanın hərtərəfli gözlənilməsi,
əlaqələndirmələr qüsursuz idi. Şagirdlərin dünya
alimlərinin, müdriklərin ana dili haqqında fikirlərini
özlərinə məxsus bacarıqla ifadə etmələri dilimizin
gözəlliyi, zənginliyindən istifadənin bariz nümunəsi
idi.
Yeri gəlmişkən qeyd edək ki, BMM-nın müəllimi Sevinc
Əliyevanın tədbirlərində, "açıq dərs"lərində hər zaman
diqqət etdiyi bir xüsusiyyət var: yaradıcı olmaq, yeni
ideyaları irəli sürmək, özünəməxsus ssenarilər yazmaq və
onları qeyri-adi şəkildə ortaya çıxarmaq. Bu tədbirdə
də məhz belə oldu. Tədbir zamanı kurikulum
təlimlərində təcrübəsindən istifadə edilən, Azərbaycan
dilini Kanadanın Toronto vilayətində yayan, bizi orada
təmsil edən həmvətənimiz Yeganə Cəfərovanın təbrikləri
də videogörüntü ilə qonaqlara və körpə balalarımıza
çatdırıldı. Bundan başqa, bir neçə şəhərdə dilimizi
yayan, xarici vətəndaşlara öyrədən həmkarlarımızın da
təbrikləri eşidildi.
Bakı Modern Məktəbinin ibtidai sinif müəllimi,
2011-2012-ci tədris ili üzrə "Ən yaxşı müəllim"
müsabiqəsinin qalibi, Təhsil Nazirliyinin bir çox
layihələrində öz təcrübəsini həmkarları ilə paylaşan,
"Mədəd-Azərbaycan" təşkilatının xətti ilə mentorluq
layihəsi üzrə fəaliyyətini həyata keçirən ilk
mentorlardan biri olan Sevinc Vaqif qızı Əliyeva,
Bibixanım İbadovanın söylədiyi kimi, yenə bir ilkə imza
atdı. Təhsilimizin inkişaf etdiyini, müəllim istəyərsə,
hər bir şeyin mümkünlüyünü nümayiş etdirdi.
Tədbirin sonunda şagirdlərə Bakı Modern Məktəbinin
direktoru Gülarə Əfəndiyeva və qonaqlar tərəfindən fəal
iştiraklarına görə diplomlar təqdim edildi.
Yusif ƏLİYEV,
"Azərbaycan müəllimi" |
