|
 Təhsil
müəssisələrinin müstəqilliyinin artırılması, tələbə,
müəllim,valideyn və digər maraqlı tərəflərin təhsil
prosesinə cəlbi təhsilin keyfiyyətinin yüksəldilməsinin
ən səmərəli istiqamətlərindəndir. Bu sahənin
prioritetliyi Azərbaycan Müəllimlər İnstitutunda (AMİ)
rəhbər pedaqoji kadrlarla - R(Ş)TŞ-nin metodistləri və
respublikanın müxtəlif bölgələrini əhatə edən məktəb
direktorlarının iştirakı ilə keçirilən növbəti seminarda
müzakirə olunub.
Seminarı AMİ-nin əlavə təhsil üzrə prorektoru,
pedaqogika üzrə fəlsəfə doktoru Rahim Əzizov açaraq
mövzunun müasirliyindən, təhsildə həyata keçirilən
innovasiyaların əhəmiyyətindən danışıb.
AMİ-nin təhsildə innovasiyalar və araşdırmalar
mərkəzinin müdiri Dilguşə Süleymanova "Təhsildə
idarəetmənin ictimailəşməsi təhsilin keyfiyyətinin
dayanıqlı yüksəlişinin təminatı kimi" mövzusunda
təqdimatla çıxış edib. Müzakirə edilən məsələ ilə
əlaqədar Siyəzən RTŞ-nin metodisti Gündüz Əhmədli, Qusar
RTŞ-nin metodisti Nazirə Ağalarova, Ağcabədi rayonu 7
nömrəli tam orta məktəbin direktoru Polad Musayev,
Şirvan şəhər 2 nömrəli tam orta məktəbin direktoru Əminə
Əliyeva, Sumqayıt şəhər 35 nömrəli tam orta məktəbin
direktoru Nüşabə Seyfullayeva, Şəmkir rayonu Yuxarı
Seyfəli kənd məktəbinin direktoru Nuşiravan Moyləyev
çıxış ediblər. Çıxışlarda maraqlı fikirlər söylənilib,
praktik nümunələr gətirilib. Əlavə təhsil üzrə dekan
müavini X.Nağızadə seminar iştirakçıları ilə dialoq
quraraq VMA-ların təhsilə xidmətini xüsusilə vurğulayıb,
valideynlərlə məsuliyyəti bölüşməyin keyfiyyətə təsir
edəcəyinə tam əminliyini bildirib.
Nazir MƏMMƏDOV,
AMİ-nin əlavə təhsil fakültəsinin baş metodisti |
