|
 Bu
günlərdə Bakıdakı 108 nömrəli tam orta məktəbdə
gənclərdə vətənpərvərlik hisslərinin aşılanmasına həsr
edilmiş tədbir keçirilib.
Əvvəlcə Azərbaycanın Dövlət himni səsləndirildi. Sonra
məktəbin direktoru Narınc Mehdiyeva tədbiri açaraq
dövlətimizin gənclərə göstərdiyi qayğıdan bəhs etdi.
Sabunçu Rayon İcra Hakimiyyəti başçısının Maştağa
qəsəbəsi üzrə nümayəndəsi Zülfüqar Cəfərov ötən əsrin
90-cı illərinin əvvəllərində ölkəmizdə yaranmış ağır
vəziyyətdən, Qarabağ döyüşlərində qəhrəmanlıq göstərən
igid əsgərlərimizdən, torpaqlarımızın müdafiəsi uğrunda
çiyin-çiyinə döyüşdüyü cəbhə yoldaşlarının
şücaətlərindən danışdı. Qeyd olundu ki, Maştağa
qəsəbəsindən Qarabağ müharibəsində 100-dən artıq gənc
iştirak etmiş, onlardan 35 nəfəri şəhidlik zirvəsinə
yüksəlmiş, 28 nəfər isə əlil olmuşdur.
Sonra məktəbin Azərbaycan dili və ədəbiyyat müəllimi
Aynurə İbrahimxəlilovanın hazırladığı bədii hissə
başladı. Məktəbin şagirdləri müxtəlif səhnəciklər
göstərdilər, şeirlər söylədilər, rəqs nömrələri nümayiş
etdirdilər. Müxtəlif beynəlxalq yarışlarda bayrağımızı
yüksəklərə qaldıran Azərbaycan idmançılarının erməni
rəqibləri üzərindəki qələbəsini əks etdirən səhnəciklər
təqdim olundu. İbtidai sinif müəllimi Xırdaxanım
Kazımovanın IV "a" sinif şagirdlərinin ifasında "Qəlbin
yağışı" mahnısının sədaları altında bal rəqsi tədbirə
xüsusi rövnəq verdi.
Yuxarı sinif şagirdlərinin böyük ingilis ədibi Vilyam
Şekspirin "Hamlet" əsərindən hazırladıqları səhnəcik
bugünkü gəncliyin öz sözünü hər bir dildə ifadə etmək
bacarığını bir daha sübut etdi. Ukraynada keçirilən
məktəblilərin ingilis dili sammitinin iştirakçısı olmuş
10-cu sinif şagirdi Jalə Əliyevanın ifasında monoloq
alqışlarla qarşılandı.
Tədbirin sonunda söz Azərbaycanın tanınmış hərbi diktoru,
vətənpərvərlik mahnılarının ifaçısı Şəmistan
Əlizamanlıya verildi. O, gənclərə torpaqlarımızın
bütövlüyü uğrunda mübarizədə həmişə ön sıralarda
olmağı, onlara həyatın kəşməkəşli yollarında, ilk
növbədə, təhsildə uğurlar arzuladı. Çıxışının sonunda
Ş.Əlizamanlının ifa etdiyi mahnılar iştirakçılarda xoş
əhvali-ruhiyyə yaratdı.
Samirə DADAŞOVA,
Bakıdakı 108 nömrəli tam orta məktəbin Azərbaycan dili
və ədəbiyyat müəllimi |
