|
 Bakı
şəhərindəki 46 nömrəli Məktəbdənkənar Tərbiyə İşi
Mərkəzində "Qlobal problemlər və iqlim dəyişiklikləri"
mövzusunda "dəyirmi masa" keçirilib. "Dəyirmi masa"da
100-dən çox uşaq iştirak edib.
Tədbirin keçirilməsində məqsəd uşaqları qlobal
problemlərlə tanış etmək, bu problemlərin həllində
onların rolunun nədən ibarət olduğunu anlatmaq olub.
"Dəyirmi masa"da Hidrometeorologiya
Elmi-Tədqiqat İnstitutunun rektoru, professor Rza
Mahmudov, "Yaşıl paket"in Azərbaycan proyektinin
əlaqələndiricisi, "Davamlı İnkişaf Cəmiyyəti" İctimai
Birliyinin sədri Fikrət Cəfərov, Respublika Ekoloji
Tərbiyə və Təcrübəçilik Mərkəzinin direktor əvəzi Lalə
Dadaşova, şair-publisist Şəhla Gündüz və 44 nömrəli
Ekoloji Tərbiyə və Təcrübəçilik Mərkəzinin direktoru
İradə İsmayılova iştirak ediblər.
Tədbirdə uşaqlarla iqlim dəyişməsi, ozon qatının
dağılması, turşulaşma, dəniz və okeanlar haqqında
sual-cavab aparılıb. Eyni zamanda, mərkəzin şagirdləri
tərəfindən təbiət mövzusunda səhnəciklər göstərilib,
şeir parçaları səsləndirilib, ekologiya ilə bağlı
maarifləndirici videoçarx nümayiş etdirilib.
Tədbirdə iştirak edən qonaqlar mövzu haqqında ətraflı
məlumatlar veriblər. "Dəyirmi masa"da ictimai
quruluşundan asılı olmayaraq, bütün ölkələrin ekoloji
böhranla qarşılaşdığı vurğulanıb, bəşəriyyətin insanlıq
vəzifəsi olaraq ətraf mühiti mühafizə etməli olduğu qeyd
edilib. Sonda tədbirdə çıxışları ilə fərqlənən uşaqlara
diplomlar təqdim edilib.
Rəşad RAMAZANOĞLU,
"Azərbaycan müəllimi" |
