|
 Sədəf
Budaqova
ilk təhsilini Laçın rayonundakı 11 nömrəli tam orta
məktəbdə, musiqi təhsilini isə Xırdalan şəhər uşaq
musiqi məktəbinin xanəndəlik sinfində alıb. Muğam və
təsniflərimizin sirlərini xalq artisti Gülyaz
Məmmədovadan öyrənib. 2011-ci ildə Azərbaycan Dövlət
filarmoniyasında dövlət müstəqilliyinin bərpasının
iyirminci ildönümünə həsr olunmuş konsertdə onun ifa
etdiyi "Heyratı" ritmik muğamı alqışlarla qarşılanıb.
Həmin il "Kainat" Gənclik Mərkəzinin təşkil etdiyi III
Beynəlxalq Uşaq Muğam festivalı finalçılarının yekun
konsertində muğamsevərlərə xoş ovqat bəxş edərək
qran-pri mükafatına layiq görülüb. Ümummilli lider
Heydər Əliyevin anadan olmasının 90 illik yubileyi
münasibətilə keçirilən müsabiqədə I, dahi vokalçı
Bülbülün anadan olmasının 115 illiyinə həsr olunmuş
müsabiqədə III yerləri qazanıb.
İstedadlı tələbə Sədəf Budaqova Azərbaycan Milli
Konservatoriyasının tərkibində Musiqi Kollecinin
xanəndəlik ixtisası üzrə IV kurs tələbəsidir. Arzusu
gələcəkdə milli musiqimizin sirlərinə yiyələnmək və onu
dünya miqyasında təbliğ etməkdir.
Qeyd edək ki, S. Budaqova IV Respublika V Muğam
müsabiqəsinin iştirakçısıdır.
Sifai
SƏFƏROVA,
"Azərbaycan müəllimi" |
