|
Şagirdlər ulu öndər Heydər Əliyevin
irsini həvəslə öyrənirlər
 Biləsuvar
Rayon Təhsil Şöbəsindən verilən məlumatda bildirilir
ki, şəhərdəki Heydər Əliyev Mərkəzində "Heydər Əliyev
müstəqil Azərbaycanın memarı və qurucusudur" mövzusunda
növbəti "açıq dərs"keçirilib. Tədbirdə müstəqil
dövlətçiliyimiz tarixində ümummilli liderin əvəzsiz
xidmətlərindən danışılıb və iştirakçıları maraqlandıran
suallar cavablandırılıb.
"Açıq dərs"də Ağalıkənd kənd məktəbinin yuxarı sinif
şagirdləri iştirak ediblər. Məktəblilər məşğələdən əvvəl
ulu öndərin zəngin həyat və fəaliyyəti, eləcə də
Biləsuvara səfərlərini əks etdirən foto və sənədlərlə
tanış olublar.
"Heydər Əliyev müasir Azərbaycanın memarı və qurucusudur"
mövzusunda məruzə edən rayon icra hakimiyyəti
başçısının müavini Xəyalə Qəmbərova ulu öndərin həyat
yoluna nəzər salıb, görkəmli dövlət xadiminin liderlik
məharətindən, yorulmaz siyasi fəaliyyətindən danışıb.
Qeyd edilib ki, ümummilli lider Heydər Əliyev ölkə
həyatının bütün sahələrində quruculuğun, davamlı inkişaf
və islahatların müəllifidir. İqtisadiyyatın yenidən
qurulması, aqrar sahənin dirçəldilməsi, çevik və
balanslaşdırılmış xarici siyasət kursu, hüquqi və
demokratik dövlət quruculuğu bu dahi şəxsiyyətin adı və
titanik fəaliyyəti ilə bağlıdır.
Bildirilib ki, bu gün ümummilli liderin şah əsəri olan
müstəqil Azərbaycan dövləti Prezident İlham Əliyevin
liderliyi ilə dünyada böyük nüfuz qazanıb, müstəqil söz
sahibinə çevrilib.
Cəlilabad Peşə Liseyində maddi-texniki
baza gücləndirilib
 Cəlilabad
Peşə liseyində "Metodiki şura", umumtəhsil və ixtisas
fənn birləşmələri üzrə iki metodiki komissiya fəaliyyət
göstərir. Liseyin direktoru E.Sadıqovdan aldığımız
məlumatda bildirilir ki, metodiki komissiyaların
fəaliyyəti daim diqqət mərkəzində olur, "açıq dərs"lər
təşkil edilir və qabaqcıl müəllimlərin iş təcrübələri
öyrənilir. Tədris plan və proqramların tələblərinə cavab
verəcək "Avtomobillərin quruluşu", "Avtomobillərin
istismarı" laboratoriyaları, çilingər emalatxanası
yenidən qurularaq şagirdlərin istifadəsinə verilib.
Təhsil Nazirliyinin xətti ilə liseyə bir ədəd SKA-5 "Niva"
markalı kombayn, bir ədəd MTZ-80 markalı təkərli traktor,
qoşqu, toxumsəpən aqreqat, kotan və çiləyici, elektrik
qaz qaynaqçısı və təmirçi-çilingər ixtisasları üzrə
qrupların istifadəsinə 11 ədəd qaynaq aparatı, çilingər
işləri aparmaq üçün müxtəlif açar dəstləri, alətlər
verilib. Liseydə texniki fənlərlə yanaşı ümumtəhsil
fənləri də tədris edildiyi üçün tədris plan və
proqramlarına uyğun olaraq əyani-texniki təlim
vasitələri ilə təminat daha da yaxşılaşdırılıb.
Müxtəlif elektron kitablar və tədris vəsaitləri
alınıb, laboratoriya işləri aparmaq üçün alət və
avadanlıqla təmin olunub. Fərdi sürüş dərsləri yol
nişanları ilə təchiz olunmuş və tədris proqramında
nəzərdə tutulmuş bütün tapşırıqları əhatə edən təlim
meydançasında (avtodromda) və kənd təsərrüfatı
texnikaları üzrə laboratoriya-praktiki dərslər isə
liseyin traktor poliqonunda keçirilir.
Astara məktəbliləri ulu öndərin ömür yoluna dair
eksponat və fotoşəkillərlə tanış olublar
Ümummilli lider Heydər Əliyevin zəngin irsinin
öyrənilməsi və təbliği məqsədilə Astara şəhərindəki
Heydər Əliyev Mərkəzində rayonun ümumtəhsil
məktəblərinin XI sinif şagirdləri üçün "açıq dərs"lər
davam etdirilir.
Təhsil şöbəsindən bildirilir ki, müasir Azərbaycan
tarixinin ümumtəhsil məktəblərində daha dərindən
öyrədilməsi məqsədilə keçirilən dərslərdə "Ulu öndər
Heydər Əliyev müstəqil Azərbaycanın memarı və
qurucusudur" və "Ümummilli lider Heydər Əliyevin
ideyaları müasir Azərbaycanın sosial-iqtisadi
inkişafının təminatçısıdır" mövzularında müzakirələrdə
məktəblilər fəallıq göstərirlər.
Rayonun tanınmış müəllimlərinin cəlb olunduqları "açıq
dərs"lərdə indiyədək 350-dən artıq şagird iştirak edib.
Şəhər tam orta məktəbinin 35 və Ərçivan qəsəbə tam orta
məktəbinin 25 XI sinif şagirdinin iştirak etdiyi
növbəti "açıq dərs"də ulu öndər Heydər Əliyevin həyat və
fəaliyyətinin müxtəlif aspektləri geniş təhlil edilərək,
şagirdlərə dahi şəxsiyyətin siyasi irsi, dövlətçilik
fəlsəfəsi, azərbaycançılıq məfkurəsi, xalqımız və
dövlətimiz qarşısında misilsiz xidmətləri barədə ətraflı
məlumatlar verilib.
Məktəbli gənclər mərkəzdə dahi şəxsiyyətin zəngin həyat
və fəaliyyətinə həsr olunmuş sənədli filmə baxıb, ulu
öndərin mənalı ömür yolunu əks etdirən eksponatlar və
fotoşəkillərlə tanış olublar.
Ağsuda "açıq dərs"lər davam edir
Ağsu şəhərindəki Heydər Əliyev Mərkəzində rayonun
ümumtəhsil məktəblərinin XI sinif şagirdləri üçün" açıq
dərs"lər davam edir.
Keçirilən növbəti dərsdə rayonun Muradlı, Ağabəyli,
Aratkənd, Bico, Cəlayir, Təklə və Ülgüc kənd tam orta
məktəblərindən 60 şagird iştirak edib.
Məktəblilər əvvəlcə Heydər Əliyev Mərkəzi ilə tanış
olublar. Burada onlara ulu öndərin həyat və
fəaliyyətinin müxtəlif dövrlərini əks etdirən
fotoşəkillər və digər sənədlər barədə geniş məlumat
verilib.
Dərs zamanı tarix müəllimi Vahid Xəlilov "Ulu öndər
Heydər Əliyev müstəqil Azərbaycanın memarı və
qurucusudur" mövzusunu tədris edib. Şagirdlər ümummilli
liderimizin xalqın təkidli tələbi ilə ikinci dəfə
hakimiyyətə gəlişini, o dövrdə ölkədəki gərginlik,
erməni təcavüzü, hakimiyyət uğrunda mübarizə və s.
barədə məlumatları böyük maraqla dinləyiblər.
Məktəblilər Azərbaycanda hüquqi və demokratik dövlət
quruculuğunun həyata keçirilməsi sahəsində ümummilli
liderimizin misilsiz xidmətləri barədə hərtərəfli
məlumatlandırılıblar.
Tərtərdə Heydər Əliyev Mərkəzində
keçirilən dərslərdə 755 şagird iştirak edib
Tərtər Rayon Təhsil Şöbəsindən verilən məlumatda
bildirilir ki, xalqımızın ümummilli lideri Heydər
Əliyevin zəngin irsinin öyrənilməsi və təbliği
məqsədilə şəhərdəki Heydər Əliyev Mərkəzində keçirilən
dərslərə rayon üzrə 710, Kəlbəcər rayonu üzrə isə 45
XI sinif şagirdi cəlb edilib. İndiyədək bu dərslər
çərçivəsində 52 ümumtəhsil məktəbindən 955 şagirdə dahi
rəhbərin həyat və fəaliyyətinin müxtəlif məqamları ilə
bağlı dolğun məlumatlar verilib.
Heydər Əliyev Mərkəzində keçirilən növbəti dərsdə şəhər
1 nömrəli və Dəmirçilər kənd tam orta məktəblərinin XI
sinif şagirdləri iştirak ediblər. Məktəblilər əvvəlcə
mərkəzdə dahi rəhbərin həyat və fəaliyyətini əks etdirən
eksponat və fotostendlərlə tanış olub, elektron
kitabxana və kompüter otağında ümummilli liderlə bağlı
məlumatlar əldə ediblər.
"Açıq dərs"də şagirdlər tarix müəllimi Seymur
İbrahimovun "Ulu öndərin təşəbbüsü ilə 1999-cu ildə
təhsil islahatlarının başlanması" mövzusunda
mühazirəsini dinləyib, dahi şəxsiyyətin keçdiyi şərəfli
həyat yolundan bəhs edən filmə baxıblar.
Lənkəran məktəbliləri üçün
maarifləndirici tədbir
 Fövqəladə
Hallar Nazirliyinin Cənub Regional Mərkəzinin
əməkdaşları iş planına uyğun olaraq Lənkəranın şəhər və
rayon məktəblərində "Fövqəladə hallarda özünü necə
aparmalı və yangın təhlükəsizliyi vərdişlərinə hamı əməl
etməlidir" mövzusunda tədbirlər həyata keçirir. Belə
bir tədbir bu günlərdə rayonun Kərgəlan kənd orta
məktəbində keçirilib. Tədbirdə şəhər təhsil şöbəsinin
əməkdaşları, müəllim və şagirdlər iştirak ediblər.
Tədbiri giriş sözü ilə açan Kərgəlan kənd orta
məktəbinin direktoru Heybət İsmayılov mövzunun
əhəmiyyətindən danışıb. Sonra FHN-nin regional
əməkdaşları şagird və müəllimləri maarifləndirmək
məqsədilə "Qaz cihazlarının istismarı zamanı
təhlükəsizlik qaydalarına ciddi riayət edilməlidir",
"Yanğınların baş vermə səbəbləri və yanğına qarşı
mübarizə metodları" və "Hansı hallarda 112 qaynar xətlə
əlaqə saxlamaq lazımdır?" mövzularında çıxış ediblər.
Eyni zamanda tədbir iştirakçılarını maraqlandıran
suallar cavablandırılıb.
Sonda Regional Mərkəz tərəfindən "Yanğına qarşı
təbliğat güşəsi" hədiyyə olaraq məktəbə təqdim edilib.
Ağcabədi məktəbliləri ulu öndərin
həyat və fəaliyyəti ilə tanış olublar
Xalqımızın ümummilli lideri Heydər Əliyevin zəngin
irsinin öyrənilməsi məqsədilə şəhərdəki Heydər Əliyev
Mərkəzində təşkil olunan növbəti "açıq dərs"də Yuxarı
Qiyaməddinli və Qaravəlli kənd tam orta məktəblərinin
şagirdləri iştirak ediblər.
Şagirdlər əvvəlcə ulu öndərin şəhərin mərkəzi
meydanındakı abidəsini ziyarət edərək, önünə tər
çiçəklər qoyub, Heydər Əliyev Mərkəzində ümummilli
liderin keçdiyi şərəfli həyat yolunu, Azərbaycana
rəhbərliyinin hər iki dövrünü, Ağcabədi rayonuna
səfərlərini əks etdirən fotoşəkillərlə, böyük şəxsiyyət
haqqında yazılmış kitablarla, qəzet, jurnal və rəsmi
sənədlərlə tanış olublar.
"Heydər Əliyev və müasir Azərbaycanın sosial-iqtisadi
inkişafı" mövzusunda keçirilən dərsdə slaydlardan
istifadə etməklə şagirdlərə ulu öndər Heydər Əliyevin
həyat və fəaliyyəti, Azərbaycanın inkişafı üçün gördüyü
mühüm işlər barədə ətraflı məlumat verilib.
Şəhər 4 nömrəli tam orta məktəbin tarix müəllimi
Nəzriyyə Mehdiyevanın mühazirəsində bildirilib ki, ulu
öndər Heydər Əliyevin müdrik siyasəti nəticəsində digər
sahələrdə olduğu kimi, iqtisadiyyatda da genişmiqyaslı
islahatlar həyata keçirilib, Azərbaycan nüfuzlu
beynəlxalq təşkilatlara üzv olub, irimiqyaslı regional
layihələrin iştirakçısına çevrilib. Qazanılmış
nailiyyətlər sonrakı illərdə ölkə iqtisadiyyatının
davamlı və dayanıqlı inkişafı üçün möhkəm zəmin yaradıb.
Bu gün ulu öndər Heydər Əliyevin siyasi xəttinin
Prezident İlham Əliyev tərəfindən qətiyyətlə davam
etdirilməsi nəticəsində ölkəmizin iqtisadiyyatı, o
cümlədən regionların və sahibkarlığın inkişafı davamlı
xarakter alıb.
Mayın sonunadək davam edəcək "açıq dərs"lərdə rayonun 62
ümumtəhsil məktəbinin on birinci siniflərinin 1681 nəfər
şagirdi, həmçinin Laçın və Xocavənd rayonlarının köçkün
məktəblərinin şagirdləri iştirak edəcəklər.
Gəncədə keçiriləcək növbəti turda 98
şagird iştirak edəcək
Gəncə məktəbliləri 47-ci Beynəlxalq Kimya Olimpiadasında
Azərbaycanın milli komandasında təmsil olunmaq üçün
ciddi hazırlaşırlar.
Gəncə Şəhər Təhsil İdarəsinin rəisi Zakir Hüseynovdan
aldığımız məlumatda bildirilir ki, X-XI sinif
şagirdlərinin qatıldıqları müsabiqənin artıq şəhər üzrə
birinci mərhələsi başa çatıb.
Bu mərhələdə 49 ümumtəhsil məktəbindən 78 nəfər şagird
iştirak edib və onlardan 39-u zona turuna vəsiqə alıb.
Zona turu fevralın 15-də Gəncədə keçiriləcək və həmin
turda 9 rayondan 91 şagird iştirak edəcək. Bu mərhələdə
şagirdlərə test və açıq tipli suallar təqdim olunacaq.
İştirakçılara 30 sualın cavablandırılması üçün 4 saat
vaxt veriləcək.
Qaliblər cari ilin iyun ayında Bakıda keçiriləcək yekun
turunda iştirak etmək hüququ qazanacaqlar.
Magistr və doktorantlar təhsillərini
Türkiyədə davam etdirəcəklər
Azərbaycan Dövlət Aqrar Universitetinin magistr və
doktorantları Kənd Təsərrüfatı Nazirliyinin və BMT-nin
Ərzaq və Kənd Təsərrüfatı Təşkilatının (FAO) dəstəyi ilə
təhsillərini Türkiyədə davam etdirmək imkanı qazanıblar.
ADAU-nun prorektoru Nizami Seyidəliyev bildirib ki,
hazırda bununla bağlı sənədlərin qəbuluna başlanılıb.
Doktorantların təhsili 3 il, magistrlərin təhsili isə 2
il müddətinə nəzərdə tutulub.
Yevlaxda şagirdlər ümummilli liderin
həyat yolunu əks etdirən sənədli filmə baxıblar
Rayon təhsil şöbəsindən verilən məlumatda qeyd edilir ki,
Azərbaycan xalqının ümummilli lideri Heydər Əliyevin
irsinin daha dərindən öyrənilməsi məqsədilə rayonun
orta məktəblərinin XI sinif şagirdləri üçün "açıq
dərs"lərin keçirilməsi qrafikə uyğun davam etdirilir.
Azərbaycan tarixinin Heydər Əliyev dövrü məktəblilərdə
böyük maraq oyadır. Mayın sonunadək davam edəcək "açıq
dərs"lərdə rayonun 40 ümumtəhsil məktəbindən 1085 XI
sinif şagirdi, həmçinin Ağdam və Kəlbəcər rayonlarının
Yevlax rayonunda fəaliyyət göstərən 8 köçkün məktəbinin
şagirdləri iştirak edəcəklər.
Heydər Əliyev Mərkəzində keçirilən növbəti dərslərdə
Gülövşə və Havarlı kənd məktəblərinin şagirdləri iştirak
edib. "Ulu öndər Heydər Əliyev müstəqil Azərbaycanın
qurucusu və memarıdır" mövzusuna həsr olunan "açıq
dərs"də Nemətabad kənd tam orta məktəbinin tarix
müəllimi Nuridə Fərzəliyeva şagirdlərə mövzu ilə bağlı
ətraflı məlumat verib. Şagirdlər ümummilli lider Heydər
Əliyevin keçdiyi şərəfli həyat yolunu əks etdirən
sənədli filmə baxıb, eksponat, foto və kitablarla tanış
olublar.
Beyləqanda "Narkomaniya ilə mübarizədə
səylərimizi birləşdirək" adlı tədbir keçirilib
"Beyləqan Gənclərinin Maarifləndirilməsi və Sosial
İnkişafı" İctimai Birliyinin (İB) və peşə məktəbinin
birgə təşkilatçılığı ilə keçirilən tədbirdə rayon polis
şöbəsinin əməkdaşları, mərkəzi xəstəxananın, rayon icra
hakimiyyətinin, İB-nin nümayəndələri, peşə məktəbinin
müəllim və tələbələri iştirak ediblər.
Çıxış edənlər tədbirin əhəmiyyətini yüksək
qiymətləndirib, narkomaniyanın cəmiyyətimiz üçün
fəsadlarından danışıblar. Vurğulanıb ki, narkomaniyaya
qarşı cəmiyyətin bütün üzvləri mübarizə aparmalı, uşaq
və gənclər arasında maarifləndirmə tədbirləri mütəmadi
xarakter almalıdır. Diskussiya şəklində keçən tədbirdə
iştirakçıları maraqlandıran suallar cavablandırılıb.
Sonda "Narkomaniyaya yox deyək!" adlı sənədli film
göstərilib.
Şəmkirdə Gənc Müəllimlər Birliyinin
üzvləri ilə görüş
Şəmkir Rayon Təhsil Şöbəsindən verilən məlumatda
bildirilir ki, rayonda yeni yaradılmış Gənc Müəllimlər
Birliyinin üzvləri ilə görüş keçirilib.
Görüşdə çıxış edənlər ölkəmizdə gedən sosial-iqtisadi
inkişafdan, o cümlədən təhsil sistemində aparılan
islahatların verdiyi bəhrələrdən danışıblar. Rayonda
təhsilin müasir tələblər səviyyəsinə yüksəlməsi üçün
yeni yaradılmış Gənc Müəllimlər Birliyi üzvlərinin
üzərinə düşən vəzifələr diqqətə çatdırılıb.
Görüşdə gənc müəllimlər çıxış edərək yeni yaradılmış
qurumun fəaliyyətini günün tələbləri səviyyəsində qurmaq
üçün arzu və təkliflərini bildiriblər.
Şakir CƏFƏROV,
"Azərbaycan müəllimi" |
