|
Rusiya hökuməti milli təhsil strategiyasını təsdiqlədi
Sənəd uşaqların həyati maraqlarını əhatə edir
Rusiya hökuməti uşaqlar üçün milli fəaliyyət
strategiyasının həyata keçirilməsi planını təsdiq edib.
"Uçitelskaya qazeta"nın məlumatına əsasən, tədbirlər
planı uşaqların həyatı üçün rahat və təhlükəsiz mühitin
yaradılmasına yönəlib. RF hökumətinin saytında
2015-2017-ci illər üçün milli strategiyanın mühüm
müddəalarının həyata keçirilməsi üzrə sərəncam
yerləşdirilib. Strategiya planına həyata keçirilməsi
nəzərdə tutulan 81 tədbir daxildir. Nazirlər
Kabinetinin açıqlamasında qeyd olunur ki, tədbirlər
planı Rusiyada uşaq hüquqlarının müdafiəsi sahəsində
vəziyyətin təhlili və nəticələr nəzərə alınmaqla tərtib
olunub.
Planda ailə siyasəti sahəsində qanunvericilik aktlarının
təkmilləşdirilməsi, uşaqlı ailələr arasında yoxsulluğun
azaldılması, uşaqlar üçün təhlükəsiz və komfortlu ailə
mühitinin formalaşdırılması, keyfiyyətli təhsilin
əlyetərliyinin təmin olunması, istedadlı uşaqların və
gənclərin axtarılması və onların dəstəklənməsi, əlavə
təhsilin inkişaf etdirilməsi, uşaqlar üçün informasiya
təhlükəsizliyinin təmin olunması, uşaqların istirahəti
və sağlamlığının təşkilinin yeni modelinin
formalaşdırılması, uşaqların ictimai həyatda iştirakının
genişləndirilməsi və onların maraqlarını əks etdirən
qərarların qəbul olunması, yeniyetmələrə qarşı zorakılıq
hallarının qarşısının alınması nəzərdə tutulur.
Qızlar riyaziyyat sahəsində oğlanlardan üstündür
Araşdırmalar bunu sübut edir
ABŞ-ın Missuri Universitetinin alimləri tərəfindən
aparılmış tədqiqatların gedişində məlum olub ki, dünya
ölkələrinin 70 faizində qızlar riyaziyyat və təbiət
elmləri sahəsində oğlanlara nisbətən daha çox uğur
qazanıblar. Tədqiqatlarda standart imtahanların PISA
qiymətləndirməsinin nəticələri və məlumatları nəzərə
alınıb. "Müəyyən olunub ki, hətta qadınların
hüquqlarının məhdudlaşdırıldığı bir sıra ölkələrdə belə
qızlar oxu, riyaziyyat, təbiət elmləri sahəsində
oğlanları üstələyirlər",-deyə alimlər bildirirlər.
Bununla belə, texnoloji kompaniyaların işçiləri
arasında qadınların sayının az olması da sual doğurur.
Alimlər hesab edirlər ki, bunun səbəbini tədris
texnologiyalarının özündə axtarmaq lazımdır, çünki
qızların əksəriyyəti bəzi arqumentlərə görə texniki
ixtisaslardan imtina edirlər. Tədrisin konsepsiyasını
dəyişmək kifayətdir ki, texniki təhsil hamı üçün
maraqlı olsun. Misal üçün, Kaliforniya Universiteti
kompüter elmləri üzrə yeni kursların təqdimatını
keçirib, burada əsas ağırlıq layihə işlərinə verilib.
Nəticədə bu kurslara yazılan qızların sayı oğlanların
sayından çox olub.
Ukrayna
ali təhsil sistemində köklü dəyişikliklər olacaq
Universitetlər Amerika standartlarına keçir
Ukraynanın Təhsil və Elm Nazirliyi ölkənin ali təhsil
sistemində köklü dəyişikliklərin həyata keçirilməsini
nəzərdə tutan layihə hazırlayıb. "Uçitelskaya
qazeta"nın məlumatına əsasən, "2020-ci ilədək ali
təhsil sahəsində islahatlar Strategiyası" layihəsinə
müvafiq olaraq Ukrayna ali məktəblərində tələbələr üçün
büdcə yerləri və ixtisasların sayı kəskin şəkildə
azalacaq. Ukrayna ali məktəbi isə bütövlükdə Amerika
ali təhsil standartlarına tam uyğun olacaq.
Strategiyanın layihəsində göstərilir ki, bu sənədin
hazırlanması ABŞ-ın Beynəlxalq İnkişaf Agentliyinin
(USAID) və ABŞ hökumətinin dəstəyi ilə ərsəyə gəlib.
Layihənin icrasına 2017-ci ildən başlanılacaq.
Nazirlik ali məktəblərdə tədris olunan ixtisasların
sayını 150-dən 60-80-ə qədər azaltmaq niyyətindədir.
Yaxın ixtisasların birləşdirilməsi nəzərdə tutulur
ki, bunun da nəticəsində pedaqoji heyətin ixtisarı
qaçılmaz olacaq. "Ölkə iqtisadiyyatı üçün zəruri olan
ixtisaslar qalacaq. Bəzi yaxın ixtisaslar
birləşdiriləcək. Lakin hələ ki, konkret siyahı yoxdur,
bu məsələ ali məktəb rəhbərləri ilə müzakirə ediləcək",
- deyə Ukrayna Təhsil və Elm Nazirliyinin ali təhsil
departamentinin direktor müavini Nikolay Fomenko
bildirib. Bundan başqa, ali məktəblərin dövlət
maliyyələşdirilməsi sisteminin tamamilə dəyişdirilməsi
nəzərdə tutulur. İndi dövlət yalnız milli
təhlükəsizlik, müdafiə, polis, pedaqogika kimi ölkə üçün
ən zəruru olan mütəxəssislərin hazırlanmasını
maliyyələşdirəcək. Bu zaman tələbə, universitet və
bank arasında üçtərəfli müqavilə imzalanacaq.
Büdcə vəsaitlərinə qənaət olunması məqsədilə adi
təqaüdlərin ləğv olunması nəzərdə tutulub. Strategiyaya
əsasən, təqaüd yalnız ali məktəbin daxili reytinqi üzrə
ən yaxşı tələbələrə ödəniləcək. Təqaüd yaşayış
minimumuna bərabər məbləğdə dövlət tərəfindən tələbənin
təhsil alması və yaşamaq haqqını təmin edəcək. Daha bir
yenilik xarici müəllimlərlə bağlıdır. Universitetlərin
hər bir kafedrasında ən azı bir əcnəbi müəllim
işləməlidir. 2020-ci ildə isə Ukrayna ali məktəblərində
hər beş müəllimdən biri əcnəbi olmalıdır.
Massaçusets Texnologiya İnstitutundan daha bir yenilik
MTİ tədris kurslarını açıq istifadəyə çıxarır
Bütün dünyada tədris texnologiyaları sahəsində məşhur
olan Amerikanın Massaçusets Texnologiya İnstitutu
(MTİ) öz mühazirə materiallarını açıq istifadəyə
çıxarır. MTİ-nin tədris materialları pulsuzdur.
Universitet öz ideyalarını tələbələrin açıq
istifadəsinə çıxarmaqla keyfiyyətli və praktik təhsil
verməyi nəzərdə tutub. Universitetin saytında təhsil
kursları üçün pulsuz pəncərə (http://ocw.mit.edu/index.htm)
açılıb. Resursda mühazirə və seminarların materialları
mətn, videoçarxlar və audioyazılar şəklində
yerləşdirilib. Biliklərdən istifadə etmək üçün ingilis
dilini yaxşı bilmək vacibdir.
Dünyanın ən yaşıl universitetlərinin reytinqi açıqlanıb
 Məqsəd
ekoloji problemləri diqqətdə saxlamaqdır
İndoneziya Universitetinin hazırladığı reytinqdə (UI
Green Metric Ranking of World Universities 2014) məqsəd
akademik ictimaiyyətin diqqətini ekoloji problemlərin
həllinə yönəltməkdir. Tərtibçilər dünyanın 62
ölkəsində 360 ali məktəbi gözdən keçiriblər. Reytinq
tərtib olunarkən universitet kampuslarının təbii mühitə
münasibəti, enerjidən istifadə və onun iqlimə təsiri,
kampus ərazisində kağızlardan istifadənin azaldılması
siyasətinə, su resurslarından rasional qaydada istifadə
olunması, ali məktəb ərazisində nəqliyyatdan (ictimai,
şəxsi avtomobillər və ya velosiped) istifadə, ekoloji
problemlər üzrə tədris kurslarının təşkili, ekoloji
problemlərin öyrənilməsinə yönəlik tədqiqatçılıq
fondlarının olması, ekoloji problemlərə dair dərc
olunmuş elmi məqalələrin sayı və s. təhlil olunub.
Beləliklə də dünyanın ekoloji cəhətdən ən təmiz
universitetlərinin ilk onluğunda aşağıdakı ali məktəblər
yer alıb: 1.University of Nottingham ( Böyük
Britaniya), 2.University College Cork ( İrlandiya),
3.Nottingham Trent University (Böyük Britaniya),
4.University of California, Davis (ABŞ), 5.University
of Oxford (Böyük Britaniya), 6.University of Bradford
(Böyük Britaniya), 7.University of Connecticut (ABŞ),
8.Universitat fur Bodenkultur Wien (Avstriya),
9.University of California, Berkeley (ABŞ),
10.Northeastern University (ABŞ).
İspaniyalı qadın uşaqlara 10 milyon avro hədiyyə edib
 Bütün
vəsait təhsilə xərclənəcək
İspaniyalı yaşlı qadın Virciniya Peres Buendiya 10
milyon avroluq varidatını uşaqlara hədiyyə edib. Bu
günlərdə paytaxt Madrid şəhərində vəfat etmiş qadın
ailəsi olmadığına görə uzun illər un istehsalından əldə
etdiyi 10 milyon avronu doğulduğu kəndin uşaqlarının
təhsilinə xərclənməsini vəsiyyət edib. Yaşlı qadın 86
yaşında öz mənzilində vəfat edib. Onun meyiti ölümündən
bir ay sonra aşkar olunub. Şəhər hakimiyyət orqanları
hesab edir ki, qadın ürək tutmasından dünyasını dəyişib.
Şəhər meri mərhumun səxavətli hədiyyəsindən çox
təəccüblənib. Qoca qadın bütün mirasını kasıb
ailələrdən olan və təhsildə uğurları ilə seçilən
gənclər üçün qoyub. Qadın istəyib ki, onların öz
təhsillərini davam etdirmələri üçün şansları olsun.
"The Local " qəzetinin yazdığına görə, V.Buendiya çox
sadə və tənha həyat sürüb. "Lakin o göstərib ki, böyük
ürəyi var. O, öz şəhərinin gələcəyi haqqında düşünüb"
- deyə şəhər meri bildirib.
Oruc MUSTAFAYEV,
"Azərbaycan müəllimi"
xarici mətbuat materialları əsasında |
