|
"Azərbaycan Respublikasında təhsilin inkişafı üzrə
Dövlət Strategiyası"nda təhsilin keyfiyyətinin
yaxşılaşdırılması, təhsili idarəetmə sisteminin yenidən
qurulması, kadr hazırlığının gücləndirilməsi, müəllim
peşəsinin nüfuzunun artırılması, müəllimin karyera
inkişafı və fəaliyyətinin stimullaşdırılması, müasir
təfəkkürlü Azərbaycan vətəndaşının yetişdirilməsi əsas
hədəflər kimi götürülüb. Strategiyanın reallaşdırılması
təhsilin məzmununun mənimsənilməsini təmin edən
səriştəli təhsilverənlərin formalaşdırılmasına, təhsildə
nəticələrə görə cavabdeh, şəffaf, səmərəli tənzimləmə və
idarəetmə mexanizmlərinin, müasir tələblərə uyğun və
ömürboyu təhsili təmin edən təhsil infrastrukturunun
yaradılmasına zəmin yaradacaqdır.
Sürətlə modernləşən Azərbaycanda təhsilin strateji
hədəfləri sırasında insan kapitalının inkişafına şərait
yaradan səriştəli təhsilverənlərə, ən yeni
texnologiyalara əsaslanan infrastruktura malik,
keyfiyyət səviyyəsinə görə dünyada öncül mövqe tutan
təhsil sisteminin formalaşdırılması ön planda durur.
Təhsil sahəsində çalışanların bilik, bacarıq və
kompetensiyalarının daim inkişaf etdirilməsini nəzərdə
tutan, müasir, innovativ təlim forma və üsullarını öz
işində tətbiq edən, təhsilin məzmununun səmərəli
mənimsənilməsinə nail olan səriştəli müəllimlərin
hazırlanmasına xidmət edən infrastruktur yaradılması
üçün mövcud reallığın təhlili, cari və perspektiv
hədəflərin müəyyənləşdirilməsi, maraqlı tərəflər
arasında səmərəli əməkdaşlığı təmin edən daimi və işlək
əlaqələrin qurulması bu gün hər bir təhsil
müəssisəsinin başlıca vəzifələrindəndir.
Ölkəmizdə pedaqoji kadrların əlavə təhsilini həyata
keçirən təhsil müəssisələri arasında Azərbaycan
Müəllimlər İnstitutu (AMİ) özünəməxsus yer tutur.
İnstitutda pedaqoji kadrların əlavə təhsilinin
təşkilində aşağıdakılara xüsusi diqqət yetirilir:
-əlavə təhsilin məzmununun daim yeniləşdirilməsi
əsasında çevik tədris-tematik planların tətbiq
olunması;
-maraqlı tərəflərlə (sifarişçi təhsil müəssisələri,
tədris-baza müəssisələri, elmi-tədqiqat, təhsil
müəssisələri , ayrı-ayrı vətəndaşlar və s.) qarşılıqlı
müqavilələrin bağlanılması;
-mövcud infrastrukturun maddi-texniki bazasının
zənginləşdirilməsi və müasir texnologiyalarla işləməyi
bacaran peşəkar təlimçi-mühazirəçi korpusunun
yaradılması;
-təlimçi-mühazirəçilərin seçilməsində Təhsil Nazirliyi
əməkdaşlarının, Təhsil Problemləri İnstitutunun,
AMEA-nın, ali məktəblərin, Bakı şəhərinin qabaqcıl
məktəb rəhbərlərinin və fənn müəllimlərinin iştirakının
təmin olunması;
- "dinləyici dinləyici qarşısında" məşğələlərinin
təşkil olunması;
- tədris-baza müəssisələri ilə əlaqələrin
səmərəliliyinin artırılması;
- təhsilin aktual məsələlərinin müzakirəsinə həsr
olunmuş konfrans, müzakirə, "dəyirmi masa" və
treninqlərin təşkil olunması və s.
2014-2015-ci tədris ilində Azərbaycan Müəllimlər
İnstitutu 150-dən artıq müəssisə ilə (rayon icra
hakimiyyəti, R(Ş)TŞ, kollec, peşə liseyi və məktəbi,
respublika tabeli lisey və gimnaziyalar, ali məktəblər)
qarşılıqlı müqavilə bağlamışdır. Tədris ilinin birinci
yarısında 23 kateqoriya üzrə 886 nəfər rəhbər və
digər pedaqoji kadr üçaylıq, ikiaylıq, 24 günlük, 12
günlük, 10 günlük və 6 günlük təlimlərə cəlb olunmuşdur.
Məşğələlərin səmərəliliyini və müasirliyini təmin etmək
üçün İKT ilə təchiz olunmuş 8 auditoriya, 1 treninq
mərkəzi, elektron lövhə ilə təchiz olunmuş 3 auditoriya
təlimçilərin və dinləyicilərin istifadəsinə verilmişdir.
İKT ilə təchiz olunmuş auditoriyaların əksəriyyəti
internetə qoşulmuşdur.
Əlavə təhsilin təcrübi əhəmiyyətini təmin etmək üçün
Təhsil Nazirliyinin təcrübə və elmi-tədqiqat bazaları
kimi instituta təhkim etdiyi təhsil müəssisələrində
təcrübə və stajkeçmənin təşkilinə xüsusi diqqət
yetirilir. Cari tədris ilində Azərbaycan Müəllimlər
İnstitutu ilə Qafqaz Universiteti arasında imzalanmış
memoranduma uyğun olaraq ixtisasartırma təhsili
dinləyiciləri Qafqaz Universitetində təcrübə
mübadiləsində olub, maraqlı təqdimat və mühazirələrdə
iştirak ediblər. Bakı şəhərinin qabaqcıl ümumtəhsil
məktəblərində, ilk peşə-ixtisas təhsili müəssisələrində
təşkil edilən təcrübə məşğələlərinin də səmərəliliyi
artır.
Dinləyicilər qarşısında institutun professor-müəllim
heyəti ilə yanaşı, Milli Məclisin üzvləri professor Musa
Qasımlı, professor Rasim Musabəyov, Təhsil Nazirliyinin
nümayəndələri Faiq Şahbazlı, Afət Süleymanova, akademik
Vaqif Abbasov, professor Əhməd Qəşəmoğlu (AMEA),
akademik Vasim Məmmədəliyev, professor Hikmət Əlizadə,
dosent Solmaz Sadıqova (Bakı Dövlət Universiteti),
professor Fuad Məmmədov (Azərbaycan Respublikasının
Prezidenti yanında Dövlət İdarəçilik Akademiyası),
polkovnik Fuad Əliyev (Daxili İşlər Nazirliyinin İnsan
Alverinə Qarşı Mübarizə Baş İdarəsi), professor Ramiz
Əliyev, dosent İlham Əhmədov (Azərbaycan Dövlət Pedaqoji
Universiteti), Vidadi Bağırov, dosent Sərvər Qurbanov
(Qafqaz Universiteti), dosent Akif Əliyev, Ceyhun
Məmmədyarov, Elxan Cəfərov (Təhsil Problemləri
İnstitutu), professor Çingiz Bədəlov (Bakı Slavyan
Universiteti), dosent Vidadi Bəşirov (Azərbaycan Dillər
Universiteti), Şahin Rəcəbov (Valideyn-Müəllim
Assosiasiyası), Tamilla İsmixanova (Respublika Elmi
Pedaqoji Kitabxanası), Şahnaz Tahirova (Milli Kitabxana)
mühazirə oxumuşlar.
İxtisasartırma təhsilinə gələn dinləyicilərin asudə
vaxtlarının səmərəli təşkili məqsədilə onların Heydər
Əliyev Mərkəzində, Azərbaycan Dövlət İncəsənət
Muzeyində, Xalq Təhsili Muzeyində məqsədli
ekskursiyaları təşkil olunmuşdur. İnstitutun mehmanxana
tipli yataqxanası, kitabxana və oxu zalı, bufet və
yeməkxanası da dinləyiciləri razı salır.
Tədris ilinin birinci yarısının nəticələri institutda
geniş müzakirə edilmiş, qazanılmış təcrübə və yol
verilmiş nöqsanlar təhlil olunmuş, perspektivlər
müəyyənləşdirilmişdir.
"Azərbaycan Respublikasında təhsilin inkişafı üzrə
Dövlət Strategiyası"nın həyata keçirilməsi ilə bağlı
Fəaliyyət Planının təsdiq edilməsi barədə" Azərbaycan
Respublikası Prezidentinin 2015-ci il 19 yanvar tarixli
Sərəncamı respublikanın təhsil ictimaiyyəti kimi
institutumuzda da işgüzar əhvali-ruhiyyəni
canlandırmışdır. İnanırıq ki, Azərbaycan Respublikasının
gələcək taleyində təhsilin çəkisinin önəmli rolunun
artdığı indiki dövrdə Azərbaycan Müəllimlər İnstitutu
öz potensial imkanlarından daha da səmərəli istifadə
edəcək, səriştəli və peşəkar təhsilverənlərin
formalaşmasında əhəmiyyətli rol oynayacaqdır.
Rahim ƏZİZOV,
Azərbaycan Müəllimlər İnstitutunun əlavə təhsil
üzrə prorektoru,
pedaqogika üzrə fəlsəfə doktoru,
Nazir MƏMMƏDOV,
əlavə təhsil fakültəsinin baş metodisti |
