|
 Fevralın
11-də Azərbaycan Respublikası Təhsil Problemləri
İnstitutunda "Əlavə təhsilin kurikulumunun yaradılması"
ilə bağlı təşkil olunan işçi qrupu ilə görüş keçirilib.
İnstitutun direktoru, hüquq üzrə fəlsəfə doktoru Qulu
Novruzov işçi qrupun üzvlərini salamlayaraq onlara
tapşırılan işin aktuallığından söhbət açıb. Direktor
bildirib ki, Azərbaycan Prezidenti İlham Əliyev
yanvarın 19-da "Azərbaycan Respublikasında təhsilin
inkişafı üzrə Dövlət Strategiyası"nın həyata keçirilməsi
ilə bağlı Fəaliyyət Planı"nın təsdiq edilməsi haqqında
Sərəncam imzalayıb. Dövlət strategiyasında
respublikamızın inkişaf konsepsiyasına uyğun olaraq,
davamlı, dayanıqlı və rəqabətqabiliyyətli inkişafı təmin
edən, insan kapitalının inkişafına önəm verən, insan
resurslarının yetişdirilməsini və idarə edilməsini
reallaşdıran müasir təhsil sisteminin yaradılmasının ön
plana çəkildiyini söyləyən Q.Novruzov sənəddə öz
əksini tapmış digər önəmli istiqamətlər barədə də geniş
məlumat verib. Qeyd edib ki, "Azərbaycan Respublikasında
təhsilin inkişafı üzrə Dövlət Strategiyası"nın həyata
keçirilməsi ilə bağlı Fəaliyyət Planı"nda təhsil
sisteminin bütün pillələrinin yeniləşməsi ilə bağlı
mərhələlərlə həyata keçiriləcək tədbirlər sistemi öz
əksini tapıb. Hazırda Təhsil Problemləri İnstitutu
olaraq başlıca vəzifəmiz bütün fəaliyyətimizi nəzərdə
tutulmuş tədbirlərin məqsədyönlü şəkildə həyata
keçirilməsinə yönəltməkdən ibarətdir. Direktor
dövlətimizin təhsil siyasətinin həyata keçirilməsində, o
cümlədən müəyyənləşdirilmiş strateji istiqamətlərin
məqsədlərinə nail olunması prosesində pedaqoji kadrların
mühüm rol oynadığını bildirib.
Sonra tədbirdə Əlavə təhsilin yeni yaradılacaq məzmunu
və təşkili barədə institutun əməkdaşı Afaq Əliyeva
məruzə ilə çıxış edib.
Görüşdə Təhsil Problemləri İnstitutunun direktor müavini
Ənvər Abbasov, institutun peşə-ixtisas təhsili
şöbəsinin müdiri Rəsul Əsgərov, ali təhsil
müəssisələrinin əməkdaşları, məktəb direktorları,
məktəbəqədər təhsil müəssisələrinin rəhbərləri,
müəllimlər, tərbiyəçilər çıxış ediblər.
Tədbirdə bir neçə istiqamət üzrə maraqlı, geniş
müzakirələr olub, təkliflər səsləndirilib.
Rəşad RAMAZANOĞLU,
"Azərbaycan müəllimi" |
