|
Fevralın 11-də ölkənin bəzi kütləvi
informasiya vasitələrində təhsil sahəsi ilə bağlı
yayılan məlumatlarla əlaqədar Təhsil Nazirliyinə
çoxsaylı suallar daxil olub. Nazirlik həmin sualları
ümumiləşdirərək onlara dair cavablar hazırlayıb. Təhsil
Nazirliyinin rəsmi internet saytında verilmiş həmin
cavabları təqdim edirik.
Sual: Son illərdə məktəb məzunlarının
nəticələri yüksəlir, yoxsa enir?
Cavab:
Son 3 ildə ölkədəki ümumtəhsil məktəblərindəki ümumi
orta və tam orta təhsil səviyyələri üzrə buraxılış
imtahanları Tələbə Qəbulu üzrə Dövlət Komissiyası
tərəfindən keçirilir. Gəlin onların nəticələrinə diqqət
yetirək.
2012-ci ildə 9-cu sinfi bitirərək müvəffəqiyyət qazanmış
(yəni, müsbət qiymət almış) məzunların sayı 50,27% idi
isə, 2013-cü ildə bu rəqəm 58,41%-ə, 2014-cü ildə
62,04%-ə yüksəlib.
2012-ci ildə 11-ci sinfi bitirərək müvəffəqiyyət
qazanmış məzunların sayı 68,9% idi isə, 2013-cü ildə
onların sayı 72,14%-ə, 2014-cü ildə isə 74,11%-ə qədər
artıb.
Beləliklə, TQDK-nın verdiyi rəqəmlər ümumi təhsildə
dinamikanın müsbətə doğru dəyişdiyini təsdiqləyir.
Sual: Qəbul imtahanlarında toplanan
balların ümumtəhsil məktəblərində tətbiq edilən 5 ballıq
sistemə (0-200 bal bərabərdir "2"-yə, 200-300 bal -
"3"-ə, 300-500 bal - "4"-ə, 500-700 bal - "5"-ə)
uyğunlaşdırılması əmsalı doğrudurmu?
Cavab:
Xeyr, belə bir yanaşmanın elmi əsasları yoxdur. Bu cür
müqayisənin hansı meyarlar əsasında aparılması da aydın
deyildir.
Sual: Qəbul imtahanlarının
nəticələrinin əvvəlcədən proqnozlaşdırılması mümkündürmü?
Cavab:
Yuxarı siniflərdə davamlı surətdə aparılan sınaq
imtahanlarının nəticələri belə proqnozların verilməsində
bir mənbə kimi çıxış edə bilər. |
