|
Fevral ayının 7-si Azərbaycanın Milli Qəhrəmanı Mübariz
İbrahimovun doğum günüdür. Bu münasibətlə Bakı şəhər 123
nömrəli tam orta məktəbdə tədbir keçirilib.
Tədbiri giriş sözü ilə məktəbin tarix müəllimi açaraq
qəhrəmanın keçdiyi şərəfli ömür yoluna qısa nəzər saldı.
Şagirdlərə örnək ola biləcək digər milli
qəhrəmanlarımızın da adlarını çəkdi.
Əfsanəyə çevrilmiş şücaəti, qeyri-adi cəsarəti ilə
yaddaşlara əbədi həkk olunan qəhrəman haqqında XI sinif
şagirdləri Aqil və Nurlanın hazırladıqları slaydlar
nümayiş olundu.
Sirac, Lamiyə, Bahar, Siddiqənin ifasında səslənən
şeirlər, Mahmud, Gülşən və Firəngizin ifa etdikləri
mahnılar tamaşaçıları duyğulandırdı.
Tədbirin ən təsirli məqamı Mübariz İbrahimov və anasına
həsr olunan səhnəcik oldu. Mübarizin rolunu canlandıran
İsmayıl və ana rolunda Zərifə bu işin öhdəsindən
məharətlə gəldilər.
Bundan başqa, Leyla, Səbuhə, Dövran və digər şagirdlər
də Mübariz İbrahimova olan sonsuz məhəbbət və
ehtiramlarını ifa etdikləri rollarla çatdırmağa
çalışdılar.
Ümumilikdə şagirdlərdə vətənpərvərlik ruhunu daha da
artıran, torpağa, Vətənə olan sevginin hər şeydən üstün
olduğunu onlara aşılayan ədəbi-bədii kompozisiyanın
sonunda bütün iştirakçılar şəhidlərin qanını yerdə
qoymayacaqlarına and içərək, "Mübariz olaq!!!" deyə bir
ağızdan səsləndilər.
Yekun sözü ilə çıxış edən məktəbin direktoru Səba
Həsənovanın vətəni sevmək, onu qorumaq, öz əməliylə
vətənə xidmət göstərmək haqqında dediyi sözlər tədbirin
təsir qüvvəsini bir az da artıraraq hər kəsi bir daha
dərindən düşünməyə vadar etdi.
Zülfiyyə NİFTALIYEVA,
Bakı şəhəri 123 nömrəli tam orta məktəbin tarix
müəllimi |
