|
Sumqayıtda Gənclər Günü qeyd edilib
Sumqayıt şəhər 10 nömrəli peşə liseyinin direktoru
Filman İsmayılov tərəfindən redaksiyamıza göndərilən
məktubda bildirilir ki, liseydə 2 fevral Gənclər Günü
münasibətilə tədbir keçirilib.Tədbirdə ulu öndər Heydər
Əliyevin gənclərə göstərdiyi qayğı və diqqət önə
çəkilib.
Sonra liseyin ictimai işlərində fəal iştirak edən,
nizam-intizamı və dərslərində müvəffəqiyyətləri ilə
fərqlənən 69-cu qrupun şagirdləri və istehsalat təlimi
ustası Tamara Baydullayeva pul mükafatı ilə
mükafatlandırılıb. Eyni zamanda qrup üzrə bir neçə
şagird isə Fəxri diplomla da təltif edilib.
Məktəblilər zabit heyəti ilə
görüşüblər
Lənkəran Şəhər Təhsil Şöbəsinin müdiri Ş.Əhmədova
tərəfindən redaksiyamıza daxil olan məktubda
bildirilir ki, R.Dadaşov adına Sütəmurdov kənd tam orta
məktəbində "N" saylı hərbi hissənin rəhbər zabit
heyəti ilə şagirdlərin görüşü keçirilib. Görüşdə
"Gənclərdə hərbi-vətənpərvərlik hisslərinin
aşılanması" mövzusunda məruzələr dinlənilib.
"Narkotik vasitələrin, psixotrop maddələrin və onların
prekursorlarının qanunsuz dövriyyəsinə və narkomanlığa
qarşı mübarizə" tədbirləri çərçivəsində rayon məktəbləri
arasında Debat turniri keçirilib və H.Səfərov adına
Kərgəlan kənd tam orta məktəbi turnirin qalibi olub.
Samuxda voleybol üzrə rayon
birinciliyi başa çatıb
Rayon təhsil şöbəsindən redaksiyamıza daxil olan
məktubda qeyd edilir ki, gərgin və maraqlı idman
mübarizəsi şəraitində keçən yarışda 2 nömrəli orta
məktəbin komandası I, Ziyadlı kənd orta məktəbinin
komandası II, Qarayeri qəsəbə 1 nömrəli orta məktəbinin
komandası isə III yerə çıxıblar. Samux Rayon İcra
Hakimiyyətinin başçısı Alı Qocayev qalib komandaların
üzvlərini təbrik edərək yarışın kubokunu, diplom və
qiymətli hədiyyələri onlara təqdim edib.
Məktəbdə narkomaniyaya həsr olunmuş
tədbir
Oğuz rayonunun Yaqublu kənd tam orta məktəbinin
müəllimi Rüxsarə Muğumovanın redaksiyamıza göndərdiyi
məktubda bildirilir ki, məktəbdə Oğuz Rayon Polis
Şöbəsinin rəhbərliyi və şöbənin aidiyyəti əməkdaşlarının
iştirakı ilə narkomaniya, erkən nikah, ekstremizm və
onların doğurduğu təhlükələrə həsr olunmuş maraqlı
tədbir keçirilib. Tədbirin əsas məqsədi ondan ibarət
olub ki, gənclərimiz narkomaniya, erkən nikah və
ekstremist cərəyanların doğurduğu təhdidləri aydın dərk
etsin və onlardan uzaq olsunlar.
Qonşu Zərrab kənd məktəbinin müəllim və şagirdlərinin, o
cümlədən kənd sakinlərinin iştirak etdiyi bu tədbirdə
narkomaniya, erkən nikah və ekstremizmin insanların
sağlamlığı və cəmiyyət üçün çox ciddi fəsadlara səbəb
olduğu qeyd edilib, uşaqların hüquq və vəzifələri
haqqında ətraflı çıxışlar olub.
Sonda hüquq-mühafizə işçiləri tərəfindən şagird, müəllim
və kənd sakinlərini maraqlandıran suallar
cavablandırılıb.
Məktəblilər ümummilli liderin irsini
öyrənirlər
Yevlax şəhərindəki Heydər Əliyev Mərkəzində rayonun
ümumtəhsil məktəblərinin XI sinif şagirdləri üçün
ümummilli liderimizin zəngin irsinin öyrənilməsi
məqsədilə növbəti "açıq dərs" keçirilib.
Yevlax Rayon Təhsil Şöbəsindən bildirilib ki, "Ulu
öndər Heydər Əliyev müstəqil Azərbaycanın memarı və
qurucusudur" mövzusunda keçirilən "açıq dərs"də Xaldan
kompleks tam orta məktəbinin şagirdləri iştirak ediblər.
Rayonun qabaqcıl tarix müəllimləri tərəfindən şagirdlərə
ümummilli lider Heydər Əliyevin həyat və fəaliyyəti,
zəngin irsi, dövlətimizin qorunması və
möhkəmləndirilməsində xidmətləri barədə geniş məlumat
verilib.
Şagirdlər ümummilli liderin keçdiyi şərəfli həyat yolunu
əks etdirən sənədli filmə baxıb, ulu öndərlə bağlı
eksponatlarla, fotoşəkillər və kitablarla tanış olublar.
Mayın sonunadək davam edəcək "açıq dərs"lərdə rayonun 40
ümumtəhsil məktəbindən 1085 nəfər XI sinif şagirdi,
həmçinin Ağdam və Kəlbəcər rayonlarının Yevlaxda
fəaliyyət göstərən 8 köçkün məktəbinin şagirdləri
iştirak edəcəklər.
Xaçmazda "açıq dərs"lər keçirilib
Xaçmaz rayonundakı Heydər Əliyev Mərkəzində Azərbaycan
xalqının ümummilli lideri Heydər Əliyevin zəngin irsinin
daha dərindən öyrənilməsi məqsədilə keçirilən növbəti
"açıq dərs"in iştirakçıları rayonun Mürşüdoba və Müşkür
kənd tam orta məktəblərinin XI sinif şagirdləri olublar.
Xaçmaz Rayon Təhsil Şöbəsindən bildiriblər ki, "açıq
dərs"ə qatılan 40 şagirdə "Ulu öndər Heydər Əliyev
müstəqil Azərbaycanın memarı və qurucusudur" və "Ümummilli
lider Heydər Əliyevin ideyaları müasir Azərbaycanın
sosial-iqtisadi inkişafının təminatçısıdır" mövzularında
mühazirələr oxunub.
Ötən ilin noyabr ayından başlayan dərslərə bu vaxtadək
Xaçmaz rayonunun ümumtəhsil məktəblərində təhsil alan
1522 şagird qatılıb. Eyni zamanda, Xaçmaz şəhərindəki 2
nömrəli tam orta məktəbdə yaradılmış Heydər Əliyev adına
İdeoloji Mərkəzdə, eləcə də Xudat şəhərindəki Heydər
Əliyev Muzeyində də "açıq dərs"lər keçirilib.
Daha sonra "açıq dərs"də Xaçmaz şəhərindəki 1 nömrəli
tam orta məktəbin tarix müəllimi Bəxtiyar Əmirli müasir
müstəqil Azərbaycan Respublikasının qurucusu, dünya
şöhrətli siyasi xadim Heydər Əliyevin xalqımız
qarşısındakı xidmətlərindən danışıb. Ulu öndərin zəngin
irsinin gənclərimiz tərəfindən dərindən öyrənilməsinin
vacibliyi şagirdlərin diqqətinə çatdırılıb.
Şagirdlər dərs prosesində ümummilli liderin keçdiyi
şərəfli həyat yolunu, Azərbaycana rəhbərliyinin hər iki
dövrünü əks etdirən fotoşəkillərdən ibarət stendlərə
baxıblar. Şagirdlər üçün dahi rəhbərin yorulmaz
fəaliyyətindən bəhs edən sənədli film nümayiş olunub.
"Heydər Əliyev müasir Azərbaycanın
qurucusu və memarıdır" mövzusunda "açıq dərs"
 Lerik
rayonunun Heydər Əliyev Mərkəzində 3 nömrəli tam orta
məktəbin XI sinif şagirdləri üçün "Heydər Əliyev müasir
Azərbaycanın qurucusu və memarıdır" mövzusu üzrə "açıq
dərs" keçirilib. Dərsdən əvvəl müəllimlər və şagirdlər
ulu öndər Heydər Əliyevin abidəsini ziyarət ediblər.
Dərs zamanı şəhər 2 nömrəli məktəbin tarix müəllimi,
Lerik RTŞ-nın metodisti Qafur Xosiyev Heydər Əliyevin
Azərbaycan xalqı qarşısındakı misilsiz xidmətlərindən,
dövlət quruculuğu sahəsində gördüyü işlərdən söz açıb.
Sonra məktəblilər Heydər Əliyev şəxsiyyəti, ulu öndərin
Azərbaycan xalqının həyatında qoyduğu silinməz izlər,
milli mənafeyə əsaslanan məqsədyönlü siyasəti haqqında
müəllimlərindən və dərsliklərdən əldə etdikləri
biliklərini nümayiş etdiriblər.
Tədbir diskussiya şəklində başa çatıb.
Ağstafada xalq şairi Hüseyn Arifin 90
illik yubileyi keçirilib
 Ağstafa
Rayon Təhsil Şöbəsinin aparıcı məsləhətçisi Əli
Əliyevdən aldığımız məktubda bildirilir ki,
A.Abdullayev adına 2 nömrəli şəhər tam orta məktəbində
xalq şairi Hüseyn Arifin anadan olmasının 90 illiyi
münasibətilə yubiley tədbiri keçirilib.
Rayon təhsil şöbəsinin müdiri Fərhad Vəliyev çıxış
edərək bildirib ki, şairin əsas qayəsi vətənə
məhəbbətin, mənəvi-əxlaqi zənginliklərin təbiət
gözəllikləri ilə vəhdətdə tərənnümündən ibarət olan
yaradıcılığı bu gün də gənc nəslin tərbiyəsində öz
əhəmiyyətini qoruyub saxlayır. Doğma Azərbaycan
təbiətinin möhtəşəm gözəlliyinə vurğunluq onun
poeziyasında bədii təcəssümünü tapmışdır.
Tədbirdə söz alan Azərbaycan Yazıçılar Birliyi Qazax
filialının sədri Barat Vüsal bildirib ki, Hüseyn Arif
təbiəti bu qədər sevdiyi üçün onu çox qayğıkeşliklə
qorumağa çağırırdı. Şairin fikrincə, təbiət ona zülm
edənlərdən öc alır, bunun aqibəti acı olur. Söz
ustadının bu ruhda düşüncələri bu gün ekoloji tərbiyə
üçün nə qədər ibrətamizdir.
Şairlərdən Mustafa Rasimoğlu, Saqif Qaratorpaq və
digərləri H.Arifin yaradıcılıq yoluna bir daha nəzər
salaraq onunla bağlı xatirələrini söyləyiblər.
Görkəmli şair haqqında xalq şairləri Mirvarid Dilbazi,
Nəriman Həsənzadə, Zəlimxan Yaqub, xalq yazıçısı İsmayıl
Şıxlı və digər ziyalıların fikirlərini şagirdlər tədbir
iştirakçılarının diqqətinə çatdırıblar.
Şuşa şəhər 3 nömrəli tam orta məktəbdə
fənn aylığı elan edilib
 Şuşa
şəhər 3 nömrəli tam orta məktəbin direktoru Elmira
Əliyevanın redaksiyamıza göndərdiyi məlumatda
bildirilir ki, təhsil müəssisəsi 1992-ci ildən
Bakıdakı Q.Abbasov adına 284 nömrəli tam orta məktəbin
binasında fəaliyyət göstərir. Məktəbdə 200-ə yaxın
şagirdin təlim-tərbiyəsi ilə 29 müəllim məşğul olur.
Bu günlərdə Şuşa şəhər 3 nömrəli tam orta məktəbdə fənn
aylığı elan edilib. Məktəbin Azərbaycan dili və
ədəbiyyat müəllimlərinin təşkilatçılığı ilə "Azərbaycan
dili haqqında görkəmli şəxsiyyətlərin fikirləri" və
"Səməd Vurğunun yaradıcılığı" mövzularında bilik yarışı
keçirilib. Məqsəd şagirdlərin intellektual
səviyyələrini öyrənmək və dünyagörüşlərini
genişləndirməkdir.
Yarışda VII-X sinif şagirdləri ayrı-ayrı komandalarla
iştirak ediblər. Bilik yarışında VII sinfin "Zirvə"
komandası qalib gəlib. Şagirdlərdən Elnurə Talıblı,
Elcan Vəliyev, Zeynəb Zeynalova, Seymur Əlizadə yarışda
fəal iştirak ediblər.
Eyni zamanda məktəbin Azərbaycan dili və ədəbiyyat
müəllimi Səmayə Abdullayevanın rəhbərliyi ilə IX sinif
şagirdləri Mirzə Fətəli Axundov adına Azərbaycan Dövlət
Milli Kitabxanasına ekskursiyaya gediblər. Burada
şagirdlər kitabxananın şöbələri ilə yaxından tanış
olublar.
Cəlilabad Rayon Təhsil Şöbəsində
şagirdlər və fənn müəllimləri ilə görüş olub
 Cəlilabad
Rayon Təhsil Şöbəsinin metodkabinet müdiri N.Babayev
redaksiyamıza göndərdiyi məktubda bildirir ki,
respublika fənn olimpiadaları təşkilat komitəsinin
qərarı ilə respublika mərhələsinin yarımfinal turunda
iştirak edəcək şagirdlər müəyyənləşdirilib. Həmin
şagirdlər və onların fənn müəllimləri ilə RTŞ-da görüş
keçirilib və qarşıda duran vəzifələrdən danışılıb.
Qalib şagirdlər RTŞ-da və Cəlilabad şəhər 1 və 8 nömrəli
məktəb-liseylərində, eləcə də şəhər 2 nömrəli və
Göytəpə şəhər 1 nömrəli tam orta məktəblərində fəaliyyət
göstərən olimpiada mərkəzlərində keçirilən tədbirlərə
cəlb ediliblər.
Olimpiada mərkəzlərində keçirilən məşğələlərin cədvəli
təsdiqlənib və məktəb rəhbərlərinin nəzərinə çatdırılıb.
Məqsəd qalib şagirdləri Respublika mərhələsinin
yarımfinal turuna daha mükəmməl hazırlamaq və nəticədə
məktəblilərin fənn olimpiadalarının final mərhələsində
və 47-ci Beynəlxalq Kimya Olimpiadasının yekununda
maksimum nəticələr göstərməsinə nail olmaqdan
ibarətdir.
Səhifəni hazırladı:
Şakir CƏFƏROV, "Azərbaycan müəllimi"
sh.cafarov@muallim.edu.az |
