|
Avstraliyanın Macquariye Universitetinin tələbəsi
Rüstəm Əkbərli ilə söhbət
Oruc MUSTAFAYEV,
"Azərbaycan müəllimi"
o.mustafayev@muallim.edu.az
 Rüstəm
Fəxrəddin oğlu Əkbərli 1990-cı il sentyabrın 1-də
Yardımlı rayonunda ziyalı ailəsində anadan olub. Orta
təhsilini həmin rayonun M.F.Axundov adına 1 nömrəli
məktəbində alıb. Bakı Dövlət Universitetinin beynəlxalq
münasibətlər fakültəsini fərqlənmə diplomu ilə bitirərək
bakalavr dərəcəsi alıb. Daha sonra Türkiyə
Cümhuriyyətinin təşkil etdiyi təqaüd proqramı
müsabiqəsini uğurla keçərək İstanbul Universitetində
təhsilini davam etdirib. Hazırda "2007-2015-ci illərdə
Azərbaycan gənclərinin xarici ölkələrdə təhsili üzrə
Dövlət Proqramı" çərçivəsində Avstraliyanın Sidney
şəhərində yerləşən Macquariye Universitetində beynəlxalq
biznes və beynəlxalq münasibətlər ixtisası üzrə magistr
təhsili alır. Beləliklə də rubrikamızın budəfəki qonağı
Rüstəm Əkbərlidir.
Orta məktəb illəri
Orta məktəb illərindən humanitar fənlərə üstünlük
vermişəm və təhsilimin ilkin güclu bazası üçün
Yardımlı rayonunun 1 nömrəli orta məktəbinin
müəllimlərinə borcluyam. Öz növbəmdə, müəllimlərin mənə
göstərdiyi bu etimada layiq olmağa çalışmış və orta
məktəbi əla qiymətlərlə bitirmişəm. Məktəbdə oxuduğum
illərdə rayon səviyyəsində keçirilən bir çox ictimai
tədbirlərdə fəal iştirak etmişəm. Musiqiyə xüsusi
həvəsim olduğu üçün Yardımlı rayon musiqi məktəbində tar
aləti üzrə təhsil almışam. Orta məktəb illərindən ən
böyük arzum respublikanın qocaman və nüfuzlu təhsil
müəssisəsi olan Bakı Dövlət Universitetində və xaricdə
güclü təhsil sisteminə malik olan universitetdə oxumaq
olub.
Universitet həyatı
Məhz orta məktəbdə aldığım güclü təhsil mənə sonradan
Bakı Dövlət Universitetinin beynəlxalq münasibətlər
ixtisasi üzrə ali təhsil almağıma imkan yaratdı. Orta
məktəbdə oxuduğum kimi universitetdə də əla qiymətlərlə
oxuyub ali məktəbi fərqlənmə diplomu ilə bitirdim. Eyni
zamanda universitet tələbə təşkilatının üzvü olaraq
kütləvi tədbirlərdə aparıcı rol oynamışam. Bakalavr
təhsili müddətində bir sıra beynəlxalq təlim və
seminarlarda iştirak etmiş, təhsilimi və dünyagörüşümü
artırmaq üçün bu təlimlərin əvəzsiz rol oynayacağına
inanmışam. Məhz bu səbəbdən tələbə mübadiləsi proqramı
çərçivəsində Amerika Birləşmiş Ştatlarına səfər etmişəm
və orada yaşayaraq öyrəndiklərimi bu sahədə atılan ilk
addımım kimi qeyd edə bilərəm.
Universiteti uğurla bitirdikdən sonra əmək fəaliyyətimə
Bakı Şəhər İcra Hakimiyyətinin Ticarət və Xidmət
Departamentində başlamışam. İşlədiyim müddətdə öz
ixtisasıma uyğun olaraq bir sıra beynəxalq təşkilatların
keçirdiyi təlim və tədbirlərdə iştirak etmişəm. Avropa
Komissiyası tərəfindən Rumıniyada təşkil olunan
"Gələcəyin iş adamları və beynəlxalq mədəni əlaqələr"
təlimində iştirak edərək Azərbaycanı layiqincə təmsil
etmişəm. Bununla yanaşı, Türkiyə dövləti tərəfindən
təşkil olunan müsabiqədən uğurla keçərək Türkiyə
Cümhuriyyətinin təqaüd proqramına qəbul edildim və
təhsilimi İstanbul Universitetində davam etdirdim.
İstanbul Universitetində oxuduğum müddətdə Boğaziçi
Universitetində keçirilən Marka Zirvə Toplantısı və "Branding"
təlimlərinə qatılmış və müvafiq sertifikat əldə
etmişəm. Bu ilin fevralında Avstriyanın paytaxtı Vyana
şəhərində Avropa Komissiyası tərəfindən keçiriləcək
tədbirdə iştirak edəcəyəm.
"Dövlət Proqramında iştirak etmək qərarına gəldim"
Təhsildə əldə etdiyim bütün bu nailiyyətlərlə
kifayətlənməyərək daha yüksək zirvələr qət etməyi
qarşıma məqsəd qoymuşdum və bu fikrimi reallaşdırmaq
üçün "2007-2015-ci illərdə Azərbaycan gənclərinin xarici
ölkələrdə təhsili üzrə Dövlət Proqramı"nda iştirak etmək
qərarına gəldim. Avstraliyanın təhsil sistemi və
Sidneydə yerləşən Macquariye Universiteti beynəlxalq
biznes və beynəlxalq münasibətlər ixtisası üzrə reytinq
cədvəlində ön sıralarda olduğu üçün həmin universitetə
müraciət edərək qəbul olundum. Sənədlərimi toplayaraq
Təhsil Nazirliyinin müvafiq komissiyasına müraciət etdim.
Müsahibə çox obyektiv və şəffaf keçirildi, digər
tələbələrlə olduğu kimi, məni də diqqət və qayğı ilə
qəbul edərək ixtisasıma uyğun suallar verdilər. Təhsil
Nazirliyinin veb səhifəsində qəbul olunmuş tələbələr
siyahısında adımı görərkən sevincimim hədd-hüdudu yox
idi. Müsahibənin şəffaf və obyektiv keçirilməsində
yaradılan şəraitə görə təhsil nazirimizə təşəkkürümü
bildirirəm.
Avstraliyada tələbəlik həyatı
Ümumiyyətlə, Avstraliya cənub yarımkürəsində yerləşdiyi
və iqlim şəraiti bizim ölkənin iqlim şəraitinin əksinə
olduğu üçün tədris ili fevral ayında başlayıb noyabr
ayının sonunda bitir. Dərslər çox səmimi, sərbəst və
özünə inam şəraitində təşkil olunub. Professor-tələbə
münasibətinin səmimiyyəti dərsdənkənar özünü daha yüksək
şəkildə büruzə verir. Məsələn, professorların tələbələri
yeməyə dəvət etməsi, müəllimlərin tələbələrlə birgə
dərsə velosipedlə gəlib-getmələri və s. Fənlərin seçimi
və dərs cədvəlinin təşkili zamanı tələbələrin təklifləri
nəzərə alınır. Dərslər tələbələrlə sorğu-sual və müəyyən
hadisələrin analizi və fikir mübadiləsi əsasında
aparılır. Lakin dərslərin belə səmimi şəkildə təşkilinə
baxmayaraq, professor-müəllim heyəti tədris prosesində
çox ciddi və tələbkardir. Avstraliyanın təhsil sistemi
öz mükəmməlliyi ilə beynəlxalq səviyyədə tanındığı üçün
universitetdə bizdən əlavə digər ölkələrdən-Almaniyadan,
İtalityadan, Cənubi Amerika ölkələrindən, Çindən və
digər ölkələrdən gələn minlərlə tələbə təhsil alır.
Oxuduğum universitetdə tələbələrin dərsləri daha yaxşı
mənimsəməsi və yüksək nailiyyətlər əldə etməsi üçün hər
cür şərait mövcuddur. 126 hektar ərazini əhatə edən və
yaşıllıqla əhatə olunmuş universitet şəhərciyində hər
bir tələbənin yüksək təhsil alması üçün lazım olan bütün
şərait yaradılmışdır. Buna 5 mərtəbədən ibarət kitabxana,
üçmərtəbəli idman zalı, müxtəlif ölkələrin mətbəxini
təmsil edən yeməkxana, oxu zalları ilə yanaşı istirahət
otaqları, tamamilə elektronlaşmış universitet-tələbə
məlumat mübadiləsi sistemi, hər bir tələbənin istənilən
vaxt limitsiz olaraq internetə sərbəst qoşulmaq imkanı
və sair daxildir.
Oxuduğum universitetdə bir çox ölkələrdən tələbələrin
olması Azərbaycan haqqında məlumatları daha çox insanla
bölüşməyə şərait yaradır. Universitetdə hazırda təhsil
aldığım ixtisas Azərbaycanı daha yaxşı tanıtmağım üçün
öz müsbət töhfəsini verir. Belə ki, dərs müddətində
təqdimat mövzusu seçərkən Azərbaycanla, o cümlədən
regionla bağlı aktual mövzulara üstünlük verirəm.
Azərbaycanın Avstraliyadakı səfirliyi tərəfindən Sidney
şəhərində təşkil olunmuş tədbirlərdə digər azərbaycanlı
tələbələrlə birgə fəal olaraq Qarabağ həqiqətləri
haqqında məlumat verilməsındə iştirak etmişik.
İxtisasımla yanaşı, universitetdə "Global Liderlik
Proqramı" çərçivəsində təşkil olunan treninqlərdə
iştirak etmiş və orada ölkəmiz haqqında məlumatları
proqram iştirakçılarına çatdırmışam.
Gələcək planlar
Ən böyük arzum, "2007-2015-ci illərdə Azərbaycan
gənclərinin xarici ölkələrdə təhsili üzrə Dövlət
Proqramı" çərçivəsində xaricdə təhsil almaq baş tutdu.
Bu proqramın qəbuluna və minlərlə azərbaycanlı gəncə
nüfuzlu xarici universitetlərdə təhsil almaq imkanı
yaratdığına görə Azərbaycan Respublikasının Prezidenti
cənab İlham Əliyevə təşəkkürümü və minnətdarlığımı
bildirirəm. Mən də öz növbəmdə universiteti yüksək
qiymətlərlə bitirmək, savadlı bir kadr kimi yetişərək
ölkəmizin inkişafı naminə xidmət etməyi qarşıma məqsəd
qoymuşam. Vətənə yaxşı mütəxəssis kimi dönməliyəm. |
