|
Şəhər təhsil şöbəsinin müdir əvəzi Rəna Dəmirovadan
aldığımız məlumatda bildirilir ki, təhsil şöbəsinin
Fəaliyyət Planına uyğun olaraq dərs ili ərzində
keçiriləcək seminarların, bilik yarışlarının, inşa və
rəsm müsabiqələrinin qrafiki hazırlanaraq təhsil
müəssisələrinə verilib.
Məktəblərdə XI sinif şagirdlərinə dərsdənkənar vaxtlarda
müstəqil Azərbaycan Respublikasının tarixinə aid
seçilmiş mövzuların tədris olunması nəzərdə tutulub.
Qrafik üzrə ümumtəhsil məktəblərinin qabaqcıl tarix
müəllimləri tərəfindən Heydər Əliyev Mərkəzində Heydər
Əliyev irsinin öyrənilməsi ilə əlaqədar dərslər
keçirilir.
İstedadlı şagirdlər aşkara çıxarılır və onlara daim
qayğı göstərilir. Ümumtəhsil məktəblərində şagirdlərin
biliyini möhkəmləndirmək məqsədi ilə müxtəlif bilik
yarışları və tədbirlər keçirilir.
Goranboy rayonunda 8 məktəb arasında keçirilən "Zirvə"
adlı bilik yarışmasında İ.Nəsimi adına 1 nömrəli tam
orta məktəbin XI sinif şagirdlərindən ibarət komandası I
yeri tutaraq Gəncədə keçirilən yarışmaya qatılıb.
47-ci Beynəlxalq Kimya olimpiadasında iştirak edəcək
namizəd şagirdlərin seçilməsi ilə əlaqədar şəhər
mərhələsində İ.Nəsimi adına 1 nömrəli tam orta məktəbin
11 şagirdi iştirak edib və 6 şagird növbəti mərhələdə
iştirak etmək hüququ qazanıb.
Məktəblərdə metodiki işlərin təşkilinə xüsusi
tələbkarlıqla yanaşılır, fənn müəllimləri
metodbirləşmələrə cəlb edilir. Qabaqcıl təcrübələrin
öyrənilməsi və yayılması ön plana çəkilir. Müəllimlərin
yaradıcılıq axtarışlarını öyrənmək və qabaqcıl
təcrübələrini yaymaq məqsədi ilə "açıq dərs"lər
keçirilir. Qarşılıqlı dərsdinləmə yüksək səviyyədə
aparılır.
Naftalan şəhər İ.Nəsimi adına 1 nömrəli tam orta
məktəbdə şəhərin 3 ümumtəhsil məktəbinin 9, 10, 11-ci
sinif şagirdləri ilə Bakı Avropa Oyunları Əməliyyat
Komitəsinin təşviqat qrup üzvlərinin görüşü keçirilib.
Görüş diskussiya şəklində başa çatıb. |
