|
İtaliyanın ölkəmizdəki fövqəladə və səlahiyyətli səfiri
cənab Campaolo Kutilo və Dante Alieghieri Cəmiyyətinin
Bakı təsisçisi Gülnarə Aslanbəyli Azərbaycan Turizm və
Menecment Universitetinin qonağı olublar. Tədbirdən
əvvəl səfir Campaolo Kutilo ATMU-nun rektoru, professor
Cəfər Cəfərovla görüşüb. Rektor qonağa ATMU-nun strateji
məqsəd və vəzifələrindən ətraflı danışıb. Ali təhsil
ocağının dünyanın bir sıra nüfuzlu ali məktəbləri ilə
ikitərəfli əlaqələrindən, ikili diplom proqramının
üstünlüklərindən də söz açılıb. ATMU ilə bağlanan
əməkdaşlıq haqqında müqavilənin fayda verəcəyinə
əminlik ifadə olunub.
Cənab səfir əməkdaşlıq haqqında müqavilənin iki ölkə
universitetlərinin inkişafında yeni bir mərhələnin
başlanğıcı kimi dəyərləndirib.
Onun sözlərinə görə, Azərbaycan öz turizm potensialını
təbliğ etmə yolunda böyük işlər görüb və müəyyən uğur
qazanıb. Hazırda Azərbaycanda italyan dilinə maraq
getdikcə artır, bu isə iki ölkə arasında əlaqələrin
hərtərəfli inkişaf etməsinin nəticəsidir.
Müqaviləyə uyğun olaraq Dante Alieghieri Cəmiyyəti
Azərbaycan Turizm və Menecment Universitetinə İtaliya
universitetləri ilə əməkdaşlıq əlaqələrinin
qurulmasında, Bakıya səfər edən italyan
universitetləri nümayəndələrinin ali məktəbdə
görüşlərinin təşkilində, ATMU tələbələrinin İtaliyada
fəaliyyət göstərən hotellərdə praktika keçmələri ilə
bağlı məsələlərdə yardım edəcək. Onu da qeyd edək ki, bu
ilin fevral ayından etibarən ATMU-da italyan dili
kursları fəaliyyətə başlayacaq.
Tədbirin sonunda əməkdaşlıq haqqında müqavilə
imzalanıb.
Mətbuat xidməti |
