|
Müəllimə qayğının daha bir nümunəsi
Gülşən ORUCOVA,
Bakı şəhəri 6 nömrəli məktəb-liseyin direktoru
 Azərbaycanın
iqtisadi və sosial həyatı son illər durmadan inkişaf
edir. Ölkə Prezidentinin dəstəyi və səyləri nəticəsində
respublikanın hər yerində geniş abadlıq və quruculuq
işləri aparılır. Son illər ölkəmizin sürətli
tərəqqisinə, aparılan iqtisadi islahatların uğurla
nəticələnməsinə yönəlmiş tədbirlərin, nəhəng layihələrin
həyata keçirilməsi sayəsində bütün sahələrdə ciddi
uğurlar əldə edilib. Təhsilin inkişafına göstərilən
dövlət qayğısı da göz qabağındadır. Möhtərəm
Prezidentimizin 30 sentyabr 2014-cü il tarixli
sərəncamları ilə 60 müəllimə "Əməkdar müəllim" fəxri
adı, 60 müəllimə isə "Tərəqqi" medalı verilib. 17
dekabr 2014-cü il tarixdə "Ən yaxşı müəllim"
müsabiqəsində müvəffəqiyyət qazandıqlarına görə
respublikanın 100 müəllimi 5000 (beş min) manat
məbləğində birdəfəlik pul mükafatı ilə
mükafatlandırılıb.
Ölkə başçısının bu il yanvarın 16-da imzaladığı
sərəncamla dövlət ümumi təhsil müəssisələrində çalışan
bilik və bacarıqlarının diaqnostik qiymətləndirilməsi
aparılan müəllimlərin əməkhaqqının 2 dəfə artırılması
isə bu diqqət və qayğının növbəti bir təzahürü oldu.
Möhtərəm Prezidentimiz müəllimlərin sosial vəziyyətinin
və güzəranının yaxşılaşdırılması ilə bağlı imzaladığı
həmin sərəncamla bir daha sübut etdi ki, Azərbaycan
təhsilinin, Azərbaycan müəlliminin ən böyük
himayədarıdır. Təhsilimizə və Azərbaycan müəlliminə
diqqət və qayğısına görə Azərbaycan Respublikasının
Prezidentinə təşəkkür dolu minnətdarlığımızı bildiririk.
Dünya iqtisadiyyatının hazırda böhran vəziyyətində
olduğu, neftin qiymətinin düşdüyü və respublikanın I
Avropa Oyunlarına hazırlaşdığı bir şəraitdə ölkə
başçısı tərəfindən atılmış bu addım hər cür alqışa
layiqdir. Əməyimizə verilən yüksək qiymətin müqabilində
biz də çaışacağıq ki, bu etimadı yeni-yeni
nailiyyətlərimizlə doğruldaq.
Pedaqoji kollektivimiz əməkhaqqı
artımını böyük rəğbətlə qarşılayıb
Fikrət XƏLİLOV,
Bakı şəhəri Heydər Əliyev adına liseyin direktoru,
əməkdar müəllim
 Dövlətimizin
gələcəyi bu gün parta arxasında oturan məsum, qayğısız,
hələ varlığının vacibliyini tam dərk etməyən
şagirdlərdən asılıdır. Həmin şagirdləri bir vətəndaş,
vətənpərvər, Azərbaycanın gələcəyi kimi yetişdirən isə
məhz müəllimlərdir. Respublikamızda müəllim zəhməti
daim yüksək qiymətləndirilmiş və müəllim cəmiyyətin
aparıcı qüvvəsi olmuşdur. Cəmiyyətimizdə baş verən bütün
həyati məsələlərdə müəllim birinci olaraq öz sözünü
demiş, xalqın önündə getmişdir. Bu baxımdan, bu gün
dövlətimizin siyasi xəttinin əsas prioritet
məsələlərindən biri də təhsil və elmdir. Azərbaycan
Respublikasının Prezidenti İlham Əliyevin böyük
uzaqgörənliklə dediyi "Biz maddi dəyərlərimizi, iqtisadi
potensialımızı insan kapitalına çevirməliyik" fikri buna
bariz nümunədir.
Təhsil hər bir dövlətin, ölkənin, cəmiyyətin həyatının,
fəaliyyətinin mühüm bir sahəsidir. Cəmiyyət təhsilsiz
inkişaf edə bilməz. Bütün dövrlərdə olduğu kimi bu gün
də cəmiyyətin inkişafı təhsilin inkişaf səviyyəsi ilə
birbaşa əlaqədardır. Təhsilin aparıcı qüvvəsi isə
müəllimdir. Odur ki, ulu öndərimiz çox gözəl deyib: "Bizim
hər birimiz elmi dərəcəmizdən, biliyimizdən, təhsil
səviyyəmizdən asılı olmayaraq bütün nailiyyətlərimizə
görə məktəbə, müəllimimizə borcluyuq". Ulu öndərin
siyasətini bu gün layiqincə həyata keçirən ölkə
Prezidenti cənab İlham Əliyev daim müəllimlərin
qayğısına qalaraq onların maddi durumlarının daha da
yaxşılaşdırılmasını diqqət mərkəzində saxlayır. Ölkə
başçısının "Dövlət ümumi təhsil müəssisələrində çalışan
bilik və bacarıqlarının diaqnostik qiymətləndirilməsi
aparılan müəllimlərin dərs yükünün və əməkhaqqının
artırılması haqqında" imzaladığı 2015-ci il 16 yanvar
tarixli sərəncamı ilə müəllimlərin həftəlik dərs yükü
normasının 1.5 dəfə, aylıq vəzifə maaşlarının orta
hesabla 2 dəfə artırılması bu şərəfli peşə sahiblərinin
dövlətin diqqət mərkəzində olduğunu bir daha aşkarladı.
Əgər ümummilli liderimiz Heydər Əliyev "Hesab edirəm ki,
cəmiyyət haradan olursa-olsun, nədən olursa-olsun kəsib
təhsilə xərcləməli, gənc nəslin təhsilinə, müəllimə
kömək etməlidir" - demişdirsə, bu gün Prezident İlham
Əliyev həmin mövqeyi davam və inkişaf etdirərək deyir:
"Azərbaycanın dövlət büdcəsində təhsil xərcləri hərbi
xərclərdən sonra ikinci yerdədir. Əgər ölkəmiz müharibə
şəraitində olmasaydı, təhsil xərcləri birinci yerdə
olardı".
Təhsil işçilərinin vəzifə maaşlarının artırılması ilə
əlaqədar ölkə Prezidentinin sərəncamı ümummilli
liderimiz Heydər Əliyevin adını daşıyan liseyin pedaqoji
kollektivi tərəfindən böyük rəğbətlə qarşılandı. Bu
münasibətlə təşkil olunan tədbirdə kollektivimiz
müəllimlərə göstərilən dövlət qayğısından məmnun
olduğunu söylədi, bu diqqət və qayğıya görə ölkə
Prezidentinə minnətdarlığını bildirdi, bu qayğıya öz
əməli işləri ilə cavab verəcəyini vurğuladı.
Bu inam və etibarı öz işimizlə
doğrultmağa çalışacağıq
Aygün ƏHMƏDLİ,
Bakı şəhəri 287 nömrəli "Zəkalar" liseyinin direktoru,
əməkdar müəllim, biologiya üzrə fəlsəfə doktoru
 Təhsilin
inkişafı üzrə Dövlət Strategiyasının həyata
keçirilməsindən irəli gələn vəzifələrin həlli bu gün
dövlətimizin, təhsil sistemimizin qarşısında duran əsas
məsələlərdəndir. Dövlət Strategiyasının əsas
istiqamətlərinin həyata keçirilməsi ilə bağlı son
dövrlər bir sıra qərarlar qəbul olunub ki, bunların da
içərisində möhtərəm Prezidentimizin bu il yanvarın
16-da imzaladığı "Dövlət ümumi təhsil müəssisələrində
çalışan bilik və bacarıqlarının diaqnostik
qiymətləndirilməsi aparılan müəllimlərin dərs yükünün və
əməkhaqqının artırılması haqqında" sərəncamı xüsusi
əhəmiyyət kəsb edir.
Dünyada baş verən proseslər nəticəsində yaranmış
əlverişsiz şəraitdə Prezidentin belə bir sərəncam
imzalaması dövlət başçısının müəllimlərə göstərdiyi
diqqət və qayğının, daim sadə insanların rifahı
haqqında düşünməsinin bariz nümunəsidir. Bununla yanaşı,
sərəncam həm də müəllimlərin biliyinə və səriştəsinə
görə əməkhaqqı sisteminin müəyyənləşdirilməsi ilə bağlı
Dövlət Strategiyasında yer almış hədəflərdən birinin
həyata keçirilməsi yönündə atılan mühüm bir addımdır.
Biz müəllimlərin maddi şəraitini yaxşılaşdırmaq məqsədi
ilə verilən bu qərara görə dövlətimizin başçısına dərin
minnətdarlığımızı bildiririk. Sərəncama əsasən
liseyimizin müəllimlərinin böyük əksəriyyətinin
əməkhaqqısı artacaq.
Fikrimcə, bu sərəncam həm də diaqnostik
qiymətləndirməyə cəlb olunmamış region müəllimlərinin də
təkmilləşmək üçün səy göstərəcəyinə stimul olacaq. Bu da
öz növbəsində təhsilin keyfiyyətinin artırılmasına mühüm
töhfə verəcəkdir.
Bütün təhsil işçiləri kimi "Zəkalar" liseyinin
kollektivi də təhsil sistemində gedən sürətli inkişafı
ölkəmizin nüfuzunun artması üçün əsas göstərici kimi
qəbul edir, təhsilə, xüsusilə müəllimlik peşəsinə cavan,
peşəkar, səriştəli kadrların cəlb olunacağına inanır və
ölkə Prezidentinin diqqətinə cavab olaraq daha yaxşı
işləməyə və təhsildə keyfiyyətin artırılmasına
çalışacağına söz verir.
Müəllim ordusuna verilən yüksək dəyər
Yuliya KƏRİMOVA,
Bakı şəhəri 23 nömrəli tam orta məktəbin direktoru
 Azərbaycan
Respublikasının Prezidenti cənab İlham Əliyevin 16
yanvar 2015-ci il tarixdə "Dövlət ümumi təhsil
müəssisələrində çalışan bilik və bacarıqlarının
diaqnostik qiymətləndirilməsi aparılan müəllimlərin dərs
yükünün və əməkhaqqının artırılması haqqında" imzaladığı
sərəncamın məktəblərin hazırkı durumuna böyük təsirini
gözləyirəm. Sərəncam dövlət başçısı tərəfindən müəllim
ordusuna yüksək dəyər verilməsi deməkdir. Amma biz,
təhsil işçiləri, başa düşməliyik ki, bu yalnız dəyər
deyil, həmçinin böyük bir etimad və müvafiq olaraq,
böyük məsuliyyətdir. Sərəncama görə, müəllimlərin maddi
şəraitinin yaxşılaşdırılması və dərs yükünün artırılması
məhz sınaq qiymətləndirmədə qənaətbəxş nəticə göstərən
müəllimlər üçün nəzərdə tutulub. İşinə məsuliyyətlə
yanaşan müəllim həm maddi, həm mənəvi cəhətdən
fərqləndirildi. Bir məktəb direktoru kimi, mənim üçün ən
mühum cəhət məhz budur. Müəllimlərin peşəkarlığı daim
dəyərləndirilməlidir, keyfiyyətli və məsuliyyətli iş ön
plana çəkilməlidir, digərləri bu işdən nümunələr
götürməlidir. Bu bizim sistemimizdə ilk presedentdir:
yaxşıya dorğu irəliləmək üçün motivasiya məhz iş yerində
yaradılmalıdır və həm maddi, həm də mənəvi aspektləri
əhatə etməlidir.
Haqqında danışdığımız sərəncam böyük və geniş əhatəli
işin başlanğıcıdır. Mən ümidvaram ki, bizim
məktəblərimiz və müəllimlərimiz bu böyük işdə
məsuliyyətlərini dərk edəcək və daha yüksək nəticə
göstərmək üçün çalışacaqlar.
|
