|
Yanvarın 16-da Azərbaycan Müəllimlər İnstitutunun
Mingəçevir filialında "Açıq qapı - valideyn günü"
keçirilib.
Valideynlər, kütləvi informasiya vasitələri və
ictimaiyyətin nümayəndələrinin iştirak etdikləri
tədbiri filialın direktoru, dosent Rasim Şükürov açaraq
imtahan sessiyasının ali məktəb həyatında mühüm və
məsuliyyətli bir dövr olduğunu diqqətə çatdırıb.
Direktor ali məktəblə valideynlər arasında sıx əlaqənin
olmasını təhsil müəssisəsində şəffaf və obyektiv mühitin
yaradılmasına daha geniş imkanlar açdığını qeyd edib və
belə əlaqələrin vacibliyini vurğulayıb.
Filologiya və təhsildə psixoloji xidmət fakültəsinin
dekanı, dosent H.Qədimova və pedaqoji fakültənin dekanı
N.Zeynalov imtahanların gedişi haqqında geniş məlumat
veriblər. Fakültə dekanları imtahan sessiyasında hər
hansı bir çatışmazlığın olmamasını ona mütəşəkkil
hazırlığın aparılması ilə əlaqələndiriblər.
Sonra valideynlərə söz verilib. Azərbaycan dili və
ədəbiyyatı müəllimliyi ixtisası üzrə II kurs tələbəsi
Svetlana Nəsiblinin valideyni Maarif Nəsibov, həmin
ixtisas üzrə III kurs tələbəsi Aysel İsgəndərovanın
valideyni İlqar İsgəndərov, riyaziyyat və informatika
müəllimliyi ixtisası üzrə III kurs tələbəsi Ana
Kərimovanın valideyni Kərim Kərimov imtahanların yüksək
səviyyədə təşkil olunduğunu, tələbələrin, o cümlədən də
burada təhsil alan övladlarının, nəvələrinin
qiymətləndirilməsində obyektivlik və şəffaflığın təmin
edildiyini bildirib, valideynlərə yaradılan şəraitə görə
filial rəhbərliyinə təşəkkür ediblər. Valideynlər həmin
gün keçirilən imtahanlarda və tələbələrin cavablarının
yoxlanılması prosesində iştirak ediblər.
Filialın direktoru, pedaqogika üzrə fəlsəfə doktoru,
dosent R.Şükürov sonda tələbələrin öyrəndikləri
bilikləri dəyərləndirməyə imkan verən imtahan
sessiyasının təkcə ali məktəblər üçün deyil, eyni
zamanda bütün ictimaiyyət üçün önəmli bir proses, burada
aşkarlıq və şəffaflığı gözləməyin nə qədər vacib
olduğunu qeyd edib. Bildirib ki, biz təkcə bu gün deyil,
bütün imtahan sessiyasını aşkarlıq və obyektivlik
şəraitində keçirməyə çalışırıq. Bütün görülən işlərin
əsas məqsədi dövlətimizin həyata keçirdiyi təhsil
siyasətini uğurla reallaşdırmaqdır.
Namaz MANAFOV,
AMİ-nin Mingəçevir filialının xarici dillər
kafedrasının müdiri, dosent |
