|
Yanvarın 16-da Azərbaycan Müəllimlər İnstitutunun Şamaxı
filialında 20 Yanvar faciəsinin 25-ci ildönümünə həsr
olunmuş anım tədbiri keçirildi. Filialın
professor-müəllim və tələbə heyətlərinin iştirakı ilə
təşkil olunmuş tədbir Şamaxı şəhərində şəhidlərin
xatirəsinə yaradılmış Şəhidlər xiyabanında keçirildi.
Tədbir iştirakçıları öncə şəhidlərin məzarı üzərinə
qərənfillər düzdülər.
Tədbir şəhidlərin xatirəsinin bir dəqiqəlik sükutla yad
edilməsi ilə başladı.
Tədbiri AMİ-nin Şamaxı filialının direktoru Tünzalə
Yusifova giriş sözü ilə açaraq bildirdi ki, 20 Yanvar
hadisəsi sovet imperiyasının millətimizə qarşı
törətdiyi tarixi faciədir. 1990-cı il yanvarın 19-dan
20-nə keçən gecə sovet imperiyasının xüsusi hazırlıqlı
ordusu tərəfindən planlı şəkildə Azərbaycan xalqına
qarşı törədilən faciə xalqın yaddaşında silinməz iz
qoydu.
Qeyd edildi ki, ümummilli liderimiz Heydər Əliyev
Moskvada xüsusi nəzarət altında ola-ola, özünün və ailə
üzvlərinin həyatını açıq təhlükə qarşısında qoyaraq
hadisələrdən dərhal sonra, 1990-cı il yanvarın 21-də
Azərbaycanın Moskvadakı daimi nümayəndəliyinə gəldi,
təcavüzə kəskin etirazını bildirdi, faciəni
törədənlərin, şəxsən Mixail Qorbaçovun ünvanına kəskin
ittihamlar söylədi, qoşunların Bakıdan çıxarılmasını
tələb etdi.
Tədbirdə çıxış edənlər 20 Yanvar faciəsinin
dəhşətlərindən söz açdılar.
Tələbələrin hazırladığı şeir kompozisiyası sonda bütün
tədbir iştirakçılarını kövrəltdi. |
