|
 20
Yanvar faciəsi qurbanlarının xatirəsi ölkəmizin hər
yerində olduğu kimi, Bakıdakı 51 nömrəli tam orta
məktəbdə də yad edildi. Əvvəlcə məktəbin 4 "a" sinif
şagirdlərinin hazırladığı ədəbi-bədii kompozisiya
nümayiş etdirildi. Sonra məktəbin direktor müavini
Kifayət Məmmədova və ibtidai sinif müəllimi Səkinə
İbadova qanlı Yanvar faciəsinin canlı şahidləri kimi
sovet ordusunun əliyalın insanların başına gətirdikləri
müsibətlərdən danışdılar. Vurğulandı ki, məktəblilər də,
bütün xalqımız da azadlıq və müstəqilliyimiz uğrunda
şəhid olmuş insanların xatirəsini həmişə əziz tutur,
şanlı tariximizi heç vaxt yaddan çıxarmırlar.
4 "a" sinif şagirdləri Züleyxa Əliyeva, Mütalib Əsgərov,
Nəriman Şirinli, Hökümə Babayeva və başqaları faciə
qurbanlarının xatirəsinə həsr edilmiş şeirlər
söylədilər.
Sonra məktəbin böyük zalında tədbir davam etdirildi.
Direktor Lətafət Səmədova bildirdi ki, 20 Yanvar
Azərbaycanda hüzn günü olmaqla bərabər həm də
müstəqillik uğrunda ayağa qalxmış xalqımızın qəhrəmanlıq
salnaməsidir. Bu şanlı səhifəni gələcək nəsillərə
çatdırmaq isə biz müəllimlərin, şagirdlərin də ümdə
vəzifəsi olmalıdır. İnformasiya blokadasında olan
Azərbaycanın ağır günlərində ümummilli lider Heydər
Əliyev yanvarın 21-də ölkəmizin Moskvadakı daimi
nümayəndəliyinə gələrək, xalqla birgə olduğunu bildirdi,
20 Yanvar faciəsinin hüquqa, demokratiyaya, humanizmə
zidd olduğunu, mərkəzin və o zamankı respublika
rəhbərlərinin günahı üzündən yol verilmiş kobud siyasi
səhv adlandıraraq bütün dünyaya bəyan etdi.
Sonra müəllimlərdən Rahilə Əsgərova, İlhamə Muradova,
Təranə Sadıqova və Tofiqə Məcidovanın hazırladıqları
slayd və məktəblilərin ifasında ədəbi-bədii kompozisiya
göstərildi. Şagirdlərdən Mələk Müzəffərova, Dilşad
Rəsulova, Ləman Abdullazadə, Nicat İsmayılov, Asəf
Əliyev və başqalarının səsləndirdikləri şeir nümunələri,
ifa etdikləri mahnılar toplaşanları bir daha həmin
günlərə qaytardı.
Sonda bir daha qeyd olundu ki, yanvar faciəsindən
illər, qərinələr ötəcək, əsrlər keçəcək, lakin onların
qəhrəmanlığı heç vaxt xalqımızın yaddaşından
silinməyəcək.
Qabil YUSİFOĞLU |
