|
 20
Yanvar gecəsi şəhid olanların, xalqımızın qəhrəmanlıq
tarixini yazanların həyatı gələcək nəsillər üçün
örnəkdir. Ümummilli liderimiz Heydər Əliyevin dediyi
kimi: "O ayrı-ayrı insanlara edilən qəsd, təcavüz
deyildir. Bütün Azərbaycan xalqına, Azərbaycan
millətinə, Azərbaycan ölkəsinə edilən hərbi təcavüz idi.
Bu təcavüz nəticəsində həlak olanlar xalq
qəhrəmanlarıdır".
Bu fikirləri Naxçıvan Özəl Universitetində 20 Yanvar
faciəsinin 25-ci ildönümü ilə əlaqədar elmi-praktik
konfransda universitetin rektoru, professor İsmayıl
Əliyev səsləndirib. Rektor bildirib ki, Qanlı Yanvar
faciəsinə ilk hüquqi-siyasi qiymət ulu öndərimiz
tərəfindən, o, Naxçıvan Muxtar Respublikası Ali
Məclisinin Sədri işləyərkən verildi. İkinci dəfə
hakimiyyətə gəldikdən sonra məhz Heydər Əliyevin
təşəbbüsü və qayğısı ilə Şəhidlər xiyabanında "Əbədi
məşəl" abidəsi ucaldıldı. 20 Yanvar faciəsi xalqımızın
iradəsini, mənliyini sındıra bilmədi. Azərbaycan
xalqının yaşamaq hüququnu onun əlindən ala bilmədi. Bu
yara, bu zərbə nə qədər ağır olsa da Azərbaycan xalqının
qəddi əyilmədi, əksinə xalqımız başını daha qürurla
tutaraq verdiyi qurbanları nəticəsində öz müstəqilliyini
əldə edib onu qorudu, möhkəmləndirdi. Bu gün də müstəqil
Azərbaycan qürurla irəliləyir, inkişaf edir, yüksəlir.
Konfransda müxtəlif mövzularda çıxışlar dinlənilib.
Sonda tələbələr 20 Yanvar şəhidlərinə həsr edilmiş
şeirləri bədii qiraət edib, faciə ilə bağlı slayd
nümayiş olunub.
Nuray ƏSGƏROVA,
NÖU-nun Mətbuat xidməti |
