|
 Yanvarın
16-dan başlayaraq Şamaxı rayonunun ümumtəhsil
məktəblərində və məktəbdənkənar müəssisələrində 20
Yanvar hadisələrinə həsr olunmuş stendlər, guşələr
yaradılmış və məktəb divar qəzetləri buraxılmışdır.
Rayonun bütün ümumtəhsil məktəbləri bu vacib tədbirə
qoşulmuş, şagirdlərin hərbi-vətənpərvərlik və Vətənə
məhəbbət tərbiyəsinə xüsusi diqqət ayırmışlar.
20 Yanvar faciəsinə həsr edilmiş tədbirləri daha yüksək
səviyyədə keçirən Şamaxı Avropa və THT liseylərində,
şəhər 1, 2, 3, 6, 9, 10 nömrəli Şəhriyar, Sabir,
Mədrəsə, İnşaatçı, Y.Məmmədəliyev qəsəbə, Məlhəm,
Əngəxaran, Muğanlı, Nağaraxana, Qonaqkənd, Göylər 2
nömrəli, Məlikçobanlı, Kərkənc, Meysəri, Avaxıl,
Çuxuryurd, II Cabanı, Mirikənd, Qəleybuuqurd, Saqiyan,
Şiravan kənd tam orta, Şərədil, Böyük Xınıslı və Sis
kənd ümumi orta məktəblərində keçirilən silsilə
tədbirlərdə milli faciə kimi yaddaşımızda dərin kök
salmış 20 Yanvarın mahiyyəti barədə geniş məlumat
verilmişdir.
Bu zaman günahsız insanlara qarşı törədilmiş qanlı
cinayətin dəhşətlərini, totalitar sovet rejiminin
yırtıcı mahiyyətini geniş şəkildə şagirdlərə
çatdırmaqla, onlarda Vətəni sevmək, Vətənin azadlığı,
toxunulmazlığı naminə mübarizlik ruhunun
gücləndirilməsi, qan yaddaşının təzələndirilməsi kimi
vacib dəyərin aşılanması əsas yer tutmuşdur.
Yanvarın 16-da şəhər məktəblərinin iştirakı ilə
keçirilən Şamaxı Mədəniyyət sarayında 20 Yanvar
faciəsinə həsr edilmiş tədbir öz möhtəşəmliyi ilə
fərqlənmişdir.
İctimaiyyət nümayəndələrinin, müəllimlər və şagirdlərin
iştirak etdiyi tədbirlərdə çıxış edən rayon təhsil
işçiləri və ziyalılar Azərbaycanın azadlığı və ərazi
bütövlüyü uğrunda mübarizə tarixinə qəhrəmanlıq səhifəsi
kimi daxil olmuş 20 Yanvar haqqında geniş danışmış,
xüsusən ulu öndər, dünya şöhrətli dahi şəxsiyyət Heydər
Əliyevin həmin vaxt bu dəhşətli qırğını elə Moskvada
cəsarətlə ifşa etməsi, xalqın haqq səsini bütün dünyaya
çatdırması kimi tarixi faktları tədbir iştirakçılarının
nəzərinə çatdırmışlar.
"Qan yaddaşı" günü münasibətilə məktəblərdə
vətənpərvərlik mövzusunda bədii qiraət gecələri
keçirilmiş, şeirlər söylənmiş, kompozisiya və tamaşalar
göstərilmiş, inşa-yazı, rəsm müsabiqələri və idman
tədbirləri təşkil olunmuşdur.
Ədalət MƏMMƏDOV,
Şamaxı RTŞ Metodkabinetinin müdiri |
