|
*
Yanvarın 10-da Azərbaycan Prezidenti İlham Əliyevin
sədrliyi ilə Nazirlər Kabinetinin 2014-cü ilin
sosial-iqtisadi inkişafının yekunlarına və qarşıda duran
vəzifələrə həsr olunan iclası keçirilib.
*Prezident
İlham Əliyev yanvarın 14-də Azərbaycanın xalq şairi,
tanınmış dramaturq, ədəbiyyatşünas və ictimai xadim,
SSRİ-nin və Azərbaycan Respublikasının Dövlət
mükafatları laureatı, Azərbaycan Milli Elmlər
Akademiyasının həqiqi üzvü, professor Bəxtiyar Mahmud
oğlu Vahabzadənin anadan olmasının 90 illiyi ilə bağlı
sərəncam imzalayıb. Sərəncamda Azərbaycan
Respublikasının Mədəniyyət və Turizm Nazirliyinə
Azərbaycan Milli Elmlər Akademiyası və Azərbaycan
Respublikasının Təhsil Nazirliyi ilə birlikdə,
Azərbaycan Yazıçılar Birliyinin təkliflərini nəzərə
almaqla, xalq şairi Bəxtiyar Vahabzadənin 90 illik
yubileyinə həsr olunmuş tədbirlər planı hazırlayıb
həyata keçirmək tapşırılıb.
*
Azərbaycan Respublikasının Prezidenti İlham Əliyev 14-15
yanvar tarixlərində Türkiyə Respublikasında dövlət
səfərində olub. Yanvarın 15-də Prezident İlham Əliyevin
və Türkiyə Respublikasının Prezidenti Rəcəb Tayyib
Ərdoğanın təkbətək görüşü olub. Həmin gün Ankarada
Azərbaycan Respublikasının Prezidenti İlham Əliyevin və
Türkiyə Respublikasının Prezidenti Rəcəb Tayyib
Ərdoğanın iştirakı ilə Türkiyə-Azərbaycan Yüksək
Səviyyəli Strateji Əməkdaşlıq Şurasının dördüncü iclası
keçirilib. İclasdan sonra ölkə başçısı İlham Əliyevin
və Türkiyə Respublikasının Prezidenti Rəcəb Tayyib
Ərdoğanın iştirakı ilə sənədlərin imzalanması mərasimi
olub. Sənədlərin imzalanması mərasimindən sonra
prezidentlər mətbuata bəyanatla çıxış ediblər. Səfər
çərçivəsində Prezident İlham Əliyev yanvarın 14-də
Türkiyə Respublikasının Baş naziri Əhməd Davudoğlu ilə
də görüşüb.
*
Dövlət başçısı İlham Əliyev yanvarın 14-də Avropa
İttifaqının Cənubi Qafqaz üzrə xüsusi nümayəndəsi
Herbert Salberin başçılıq etdiyi nümayəndə heyətini
qəbul edib.
*
Yanvarın 13-də Azərbaycan Respublikasının Prezidenti
İlham Əliyev Sumqayıt şəhərinə səfər edib. Ölkə başçısı
Sumqayıta səfəri çərçivəsində Nəsimi adına şəhər
mədəniyyət və istirahət parkında aparılan yenidənqurma
işləri ilə tanış olub, bir sıra sosial və iqtisadi
yönümlü obyektlərin açılışlarında iştirak edib.
*
Prezident İlham Əliyev yanvarın 12-də 2015-ci ilin
Azərbaycan Respublikasında "Kənd təsərrüfatı ili"elan
edilməsi haqqında sərəncam imzalayıb. |
