|
 Azərbaycanlı
şagirdlərin dünyanın müxtəlif ölkələrində keçirilən
beynəlxalq bilik yarışlarında iştirak etmələri və
vətənə medallarla qayıtmaları sevindirici haldır.
Azərbaycan təhsilinin daha bir yetirməsi, Bakıdakı
"İstək" liseyinin X sinif şagirdi Məmməd Əliyev də
Argentinada keçirilmiş XI Beynəlxalq Təbiət Elmləri
Olimpiadasında (IJSO 2014-International Junior Science
Olympiad) ölkəmizi uğurla təmsil edib. Gəlin onunla
yaxından tanış olaq.
Məmməd Əliyev 1999-cu il sentyabrın 19-da Gəncə
şəhərində anadan olub. İlk təhsilinə 4 nömrəli tam
orta məktəbdə başlayıb. VII sinifdə Gəncə Özəl Türk
liseyinə qəbul olunub. Liseydə oxuduğu müddətdə
biologiya fənninə olan marağı nəticəsində
müəllimlərinin dəstəyi ilə beynəlxalq biologiya
olimpiadasına hazırlaşmağa qərar verib.
VIII sinifdə liseylərarası biologiya olimpiadasında
birinci yeri tutub və qızıl medalla təltif olunub.
Nəticədə Bakıdakı "İstək" liseyində oxumaq hüququ
qazanıb. Beləliklə də Bakıda təcrübəli müəllimlərin
köməyi ilə elmi bilgilərini daha da genişləndirmək şansı
əldə edib. 2014-cü ilin aprel ayında Azərbaycan
Respublikası Təhsil Nazirliyinin keçirdiyi beynəlxalq
biologiya olimpiadası üzrə seçmə imtahanında II yeri
tutaraq komandanın 4 üzvündən biri olub. Nəticədə ötən
ilin 5-13 iyul tarixlərində İndoneziya Respublikasında
keçirilmiş beynəlxalq biologiya olimpiadasında
Azərbaycanı təmsil edib.
Məmməd bizimlə söhbətində Argentinanın Mendoza
şəhərində keçirilmiş Beynəlxalq Elm olimpiadası barədə
təəssüratlarını bölüşdü:
- Beynəlxalq olimpiada 3 fəndən - kimya, fizika,
biologiyadan ibarət idi. Bu olimpiadada 40-a yaxın ölkə
- Rusiya, Çin, Hindistan, Almanya, Cənubi Afrika və s.
iştirak edirdi. Müxtəlif ölkələrdən olan 200-ə yaxın
iştirakçının bilikləri 100 balla qiymətləndirilirdi. 10
gün davam edən olimpiada 3 mərhələdə keçirildi. Birinci
mərhələ fizika, kimya və biologiya fənlərinin hər
birindən 10 sual olmaqla 30 sualdan ibarət idi. Müsabiqə
fizika, kimya, biologiya fənlərindən açıq sualları əhatə
edən nəzəri və bu fənlərə aid laboratoriya işlərinin
yerinə yetirilməsini nəzərdə tutan praktik mərhələdən
ibarət oldu. Bu mərhələdə komanda şəklində laboratoriya
işləri yerinə yetirilirdi. 60 bal nəzəri biliklər,
qalan 40 bal isə laboratoriya qabiliyyət imtahanı üçün
verilirdi. Bürünc medal 65 baldan başlayırdı. Mən isə 74
balla bürünc medala layiq görüldüm.Vətənimi layiqincə
təmsil etməyə nail olduğum üçün çox xoşbəxtəm.
Qeyd edək ki, Beynəlxalq Təbiət Elmləri Olimpiadası
2004-cü ildən keçirilir. 2009-cu ildə Bakıda təşkil
edilmiş 6-cı Beynəlxalq Təbiət Elmləri Olimpiadasında 50
ölkə iştirak edib. Bu, Beynəlxalq Təbiət Elmləri
Olimpiadasının tarixində ən böyük göstərici hesab
olunur. Sevindirici haldır ki, bu günə qədər "İstək"
liseyinin şagirdləri beynəlxalq fənn və layihə
olimpiadalarında 630-dan çox qızıl, gümüş və bürünc
medallar qazanıblar.
Oruc MUSTAFAYEV,
"Azərbaycan müəllimi" |
