|
Ötən il Təhsil Nazirliyinin İnformasiya şöbəsinin
Vətəndaşlarla iş bölməsinə 154226 müraciət daxil olub
Niyazi RƏHİMOV, "Azərbaycan müəllimi"
niyazisherifsoy@mail.ru
 Son
vaxtlar Təhsil Nazirliyinin strukturunda bir sıra
dəyişikliklər olmuşdur ki, bunlardan da biri İnformasiya
şöbəsinin tərkibində Vətəndaşlarla iş bölməsinin
yaradılmasıdır. 2013-cü ilin oktyabr ayında fəaliyyətə
başlayan bölməyə Vətəndaşların Qəbulu Mərkəzi, Telefon
Məlumat Mərkəzi ("qaynar xətt") və Kommutator xidməti
daxildir. Bölmənin fəaliyyəti ilə yaxından tanış olmaq
məqsədilə Təhsil Nazirliyində olduq, bölməyə rəhbərlik
edən Yaşar Zeynalovla söhbətləşdik.
Bildirdi ki, mərkəzlər Azərbaycan Respublikasının
Prezidenti cənab İlham Əliyevin "Dövlət orqanlarında
elektron xidmətlərin göstərilməsi haqqında" fərmanından
və "Vətəndaşların müraciətlərinə baxılması qaydası
haqqında" Azərbaycan Respublikasının Qanunundan irəli
gələn vəzifələrin icrası işinin səmərəliliyinin
artırılması məqsədlərinə xidmət edir. Müasir
avadanlıqlarla və sürətli kommunikasiya sistemləri ilə
təchiz edilmiş mərkəzlər Təhsil Nazirliyinin struktur
bölmələri və müvafiq təhsil qurumları ilə elektron
qaydada əlaqələndirilib. Mərkəzlər təhlil imkanına malik
informasiya sistemləri ilə təmin olunub. Mərkəzlərə
xüsusi təlim keçmiş əməkdaşlar cəlb olunub. Xidmət
səviyyəsinin və keyfiyyətin yüksəldilməsi üçün müasir
avadanlıqlar vasitəsilə video-audio nəzarət aparılır və
hər bir əməkdaşın fəaliyyəti xüsusi meyarlar əsasında
qiymətləndirilir. Telefon Məlumat Mərkəzinə və
Vətəndaşların Qəbulu Mərkəzinə daxil olan müraciətlərin
gündəlik statistikası aparılaraq təhlil edilir. Hər iki
mərkəzin fəaliyyəti üzrə toplanan statistik məlumatlar
əsasında müvafiq hesabatlar hazırlanır.
 Nəzərə
çatdıraq ki, Vətəndaşlarla iş bölməsi fəaliyyətə
başladıqdan sonra bu istiqamətdə səmərəlilik əvvəlki
illərdən fərqli olaraq xeyli artmış, vətəndaşlar rahat
və sərbəst şəkildə Təhsil Nazirliyinə müraciət etmək
imkanı qazanmışlar. Statistikaya nəzər salsaq görərik
ki, Təhsil Nazirliyinin İnformasiya şöbəsinin
Vətəndaşlarla iş bölməsinə 2014-cü il ərzində
vətəndaşlar tərəfindən 154226 müraciət daxil olmuşdur.
Belə ki, Telefon Məlumat Mərkəzinə 60856 zəng (2013-cü
illə müqayisədə 4,7 dəfə çox) və Kommutator xidmətinə
35000-ə yaxın zəng olunmuş, Vətəndaşların Qəbulu
Mərkəzində isə 58370 vətəndaşa xidmət göstərilmişdir:
ali təhsil üzrə (təhsil haqqının ləğvi, yaxud
azaldılması, köçürülmə, bərpa və s.) - 8668; beynəlxalq
əməkdaşlıq və xaricdə təhsil - 7883; ümumi təhsil
müəssisələrinə aid, şagirdlərin yerdəyişməsi - 4174;
müəllimlərin yerdəyişməsi, müəllimlərin işə qəbulu və
digər kadr məsələləri - 3880; orta ixtisas və ilk
peşə-ixtisas təhsilləri ilə bağlı - 1544; digər
məsələlər üzrə (xarici diplomların tanınması, qrif
verilməsi və s.) - 32221 müraciətlər daxil olmuşdur.
Telefon Məlumat Mərkəzinə və Vətəndaşların Qəbulu
Mərkəzinə daxil olmuş müraciətlərin (əsasən sorğu
xarakterli olub) əksəriyyəti dərhal cavablandırılıb və
operativ həll olunmuşdur. 11848 vətəndaş sorğularına
uyğun olaraq, elektron qaydada Təhsil Nazirliyinin
müvafiq məsul şəxslərinin qəbuluna yazılmışdır. Əlavə
olaraq, vəzifəli şəxslərin qəbuluna yazılmaq üçün e-poçt
vasitəsilə 531 müraciət, teleqram və məktublar
vasitəsilə 167 müraciət daxil olmuş və Təhsil
Nazirliyinin qəbul qaydalarına əsasən müvafiq cavablar
verilmişdir. Vətəndaşların Qəbulu Mərkəzində 13359 sənəd
(6275 ərizə, 6139 məktub, 945 digər sənədlər) qəbul
olunub və qeydiyyata alınmışdır. Şikayətlərin qeydiyyatı
proqramında isə 404 müraciət qeydiyyata alınmış və
araşdırılması üçün aidiyyəti şöbələrə, sektorlara,
idarələrə göndərilmişdir.
Vətəndaşların Qəbulu Mərkəzi
 Vətəndaşların
Qəbulu Mərkəzində 7 nəfər əməkdaş fəaliyyət göstərir.
Bunlardan 6-sı (6 masa), yəni vətəndaşları qəbul edərək
onları əlaqələndirən şəxslər, 1 nəfər isə (1 masa)
yardımçı, yəni vətəndaşlara prosedur qaydalarını izah
edən şəxsdir. Qəbul proseduru belədir: vətəndaş mərkəzə
daxil olur, monitordakı düyməni basaraq nömrə götürür və
öz növbəsini gözləyir. Növbəsinin çatdığını bildirən
siqnal səsindən sonra nömrəsi ekranda göstərilən masaya
yaxınlaşır. Müvafiq müraciətini bildirən vətəndaşın
sualları həmin masada əyləşən əməkdaş tərəfindən
cavablandırılır və ya vətəndaşa istiqamət verilir. Demək
olar ki, əksər müraciətlər yerindəcə cavablandırılır.
Bundan başqa, vətəndaş nazir müavinləri və şöbə
müdirləri ilə görüşmək istəyərsə, mərkəzin əməkdaşları
vətəndaşın məlumatlarını qəbul qeydiyyatı bazasına daxil
edir. Vətəndaşa qəbul gününün tarixi haqqında məlumat
verilir. Bununla da vətəndaş asanlıqla nazir müavinləri
və şöbə müdirləri ilə görüşmək imkanı əldə edir.
Yardımçı masada vətəndaşların sənədləri və məktubları
qəbul olunur. Həmin sənədlər qeydiyyata alındıqdan sonra
dəftərxanaya verilir, ordan da müvafiq şöbələrə və
şəxslərə göndərilir. Bundan başqa, vətəndaşlara mərkəzdə
ərizə yazmaq şəraiti də yaradılıb. Belə ki, bunun üçün
xüsusi masa və nümunələr təşkil olunmuşdur. Mərkəzə
müraciət edən vətəndaşlara metodiki və maarifləndirici
məlumatlar verilir, onlara müxtəlif növ hüquqi yardımlar
göstərilir. Azərbaycan, rus və ingilis dillərində
fəaliyyət göstərən mərkəz həftənin 5 günü saat 09:00-dan
18:00-dək fasiləsiz olaraq vətəndaşlara xidmət göstərir.
Telefon Məlumat Mərkəzi
Mərkəzdə 4 operator fəaliyyət göstərir. Zənglər çox
olduqda 4, az olduqda isə 3 operator onları qəbul edir.
Vətəndaşlar 146 nömrəsinə zəng etməklə operatorlarla
əlaqə saxlaya bilirlər. Mərkəzə olunan müraciət, şikayət
və təkliflər xüsusi məlumat bazasına daxil edilir,
elektron formada Təhsil Nazirliyinin müvafiq struktur
bölmələrinə yönəldilir. Müraciət, şikayət və təkliflər
araşdırıldıqdan sonra vətəndaşlara rəsmi cavab verilir.
Məlumat bazasında qeydlər aparılır və müraciətlər
bazanın arxivinə yönləndirilir. Bundan əlavə, məlumat
bazasında axtarış sistemi yaradılıb. Burada hər bir
vətəndaşın müraciətini və onun Təhsil Nazirliyinə
müraciətlərinin sayını axtarış meyarları əsasında tapmaq
mümkündür.
Kommutator xidməti
Kommutator xidmətində 2 nəfər fəaliyyət göstərir.
Xidmətin əməkdaşlarının əsas vəzifəsi vətəndaşlarla
nazirliyin müxtəlif struktur bölmələrində fəaliyyət
göstərən əməkdaşlar arasında əlaqə yaratmaqdır. Belə ki,
vətəndaşlar müxtəlif mobil operatorlar vasitəsilə və
şəhər telefonlarından 012-599-11-55 nömrəsini yığmaqla
daxili nömrəni bilirlərsə birbaşa, daxili nömrəni
bilmirlərsə operatorlar vasitəsilə müxtəlif şöbələrlə
çox asanlıqla əlaqə saxlaya bilərlər. Mərkəzlərdən
fərqli olaraq burada saat 13:00-dan 14:00-dək fasilə
olur. Buna səbəb Təhsil Nazirliyinin struktur
bölmələrində həmin saatlarda fasilənin olmasıdır.
Vətəndaşlar
göstərilən xidmətdən razıdırlar
Vətəndaşlarla iş bölməsində olarkən qəbula gəlmiş bir
sıra vətəndaşlarla görüşdük. Bölmənin fəaliyyəti ilə
bağlı fikirlərini öyrəndik.
Şirin İsmayılov:
- Mən Salyan rayonundan gəlmişəm. Qardaşım İslam
İsmayılov "2007-2015-ci illərdə Azərbaycan gənclərinin
xarici ölkələrdə təhsili üzrə Dövlət Proqramı"
çərçivəsində Cənubi Koreyanın Kayst Universitetini
bitirib. Qardaşım hazırda hərbi xidmətdə olduğu üçün
onun diplomunun təsdiq olunması ilə bağlı Təhsil
Nazirliyinə müraciət etdim. Müraciətimə çox qısa
müddətdə, rahat şəkildə baxıldı və mənə diplomun təsdiq
olunması ilə bağlı sənədi nə vaxt götürəcəyim tarix
bildirildi. Bu gün həmin tarix olduğu üçün sənədi
götürməyə gəlmişəm. Gördüyünüz kimi, sənəd artıq
məndədir. Yaradılan şəraitə görə hər kəsə təşəkkürümü
bildirirəm.
İlhamə Mustafayeva:
- Ötən il noyabr ayının sonunda Təhsil Nazirliyinin şöbə
müdiri Fərzəli Qədirovun qəbuluna düşmək üçün
Vətəndaşların Qəbulu Mərkəzinə müraciət etdim. Mənə
yanvarın 5-də saat 16:00-da nazirlikdə olmağımı
bildirdilər. Bunun üçün mənə bildiriş verdilər. Şöbə
müdiri ilə görüşdüm və yerdəyişmə məsələsi ilə bağlı
problemim olduğunu bildirdim. Nəzərə çatdırım ki, mən
paytaxtın mərkəzi hissəsində yaşayıram. İş yerim isə
Abşeron rayonu Masazır qəsəbəsindədir. Yolum uzaq olduğu
üçün çətinlik çəkirəm. Fərzəli müəllim mənə diqqətlə
qulaq asdı və yerdəyişmə ilə bağlı prosedur qaydalarını
ətraflı izah etdi. İnşallah iyun ayında elektron ərizə
ilə Təhsil Nazirliyinə müraciət edəcəm. Belə bir
şəraitin yaradılması üçün Təhsil Nazirliyinin
rəhbərliyinə və kollektivinə xüsusi minnətdarlığımı
bildirirəm.
Oqtay Hüseynov:
- Biləsuvar rayonundan gəlmişəm. Qızım Könül Hüseynlinin
işi ilə bağlı, təxminən, bir ay bundan qabaq nazirliyə
müraciət etdim. Adımı qeydiyyata saldılar və bu gün
məsələ ilə bağlı şöbə müdiri ilə görüşdüm. Qeyd edim ki,
qızım ötən il Təhsil Nazirliyi tərəfindən keçirilən
müəllimlərin işə qəbulu ilə bağlı müsabiqədə iştirak
edərək 29 bal toplayıb. Ağsu rayonuna işə qəbul olunub.
Lakin körpə uşağı olduğu üçün orada işləmək onun üçün
çox çətindir. İş yerinin dəyişdirilib öz rayonumuza
verilməsini xahiş etdim. Çox sağ olsunlar, məni diqqətlə
dinləyib yerdəyişmə ilə bağlı qaydaları izah etdilər.
Mənə seçim edərkən müəyyən məsələləri öncədən nəzərə
almağı tövsiyə etdilər. Mehriban münasibət və
şəffaflığın yüksək səviyyədə olması üçün Təhsil
Nazirliyinin kollektivinə təşəkkürümü bildirirəm.
|
