|
Təhsil Nazirliyinin təsis etdiyi "Bilik kuboku" uğrunda
intellektual yarışma dekabrın 14-də başa çatsa da,
breyn-rinq davam edib və dekabrın 21-də bu silsilədən
sonuncu oyun keçirilib. Bu oyun ilin çempionunu
müəyyənləşdirib. "Baku Crystal Hall"da baş tutan və AzTV
kanalı ilə yayımlanan oyunda Azərbaycan İntellektual
Klublar Assosiasiyası kubokunun qalibi "Kapital bank"
ilə "Bilik kuboku"nun sahibi "Romantik" ilin qalibi adı
uğrunda mübarizə aparıblar.
Komandalardan birinin 3 xal toplamasına qədər davam
etməsi nəzərdə tutulan oyun 5 görüşdən ibarət olub. Hər
görüş komandalardan biri 5 xal toplayana qədər davam
edib. Rəqiblər bir-birinə ciddi müqavimət göstəriblər.
Nəticədə ikinci və dördüncü görüşlərdən sonra hesab
bərabərləşib: 1:1 və 2:2. Qalibi müəyyənləşdirmək üçün
bir sualdan ibarət beşinci görüş keçirilib. Həmin sualı
daha tez cavablandıran "Kapital bank" komandası
breyn-rinq üzrə bu ilin Azərbaycan çempionu olub.
Çempionlara medallar təqdim edilib.
Yusif ƏLİYEV,
"Azərbaycan müəllimi" |
