|
 Zərifə
Alxazova 1998-ci ildə Bakı şəhərində anadan olub.
2010-cu ildə Bülbül adına Orta İxtisas Musiqi Məktəbinin
skripka ixtisası üzrə -İlhamə Ağayevanın sinfinə daxil
olub. Hazırda XI sinif şagirdidir. Z.Alxazova respublika
və beynəlxalq müsabiqələr laureatıdır. 2013-cü ildə
Azərbaycan Respublikası Təhsil Nazirliyi tərəfindən
təşkil olunmuş ümummilli lider Heydər Əliyevin anadan
olmasının 90 illik yubileyinə həsr olunmuş II Respublika
müsabiqəsində I yerə layiq görülüb. Seçdiyi sənətin
sirlərinə daha dərindən yiyələnmək üçün o, 2013-cü ildə
Rusiyanın Həştərxan şəhərində keçirilən professor
S.Nesterovun "İstedadlı uşaqlar üçün yaradıcılıq
məktəbi"ndə ustad dərsləri alıb. 2014-cü ildə
İSESCO-nun, Azərbaycan Respublikasının Gənclər və İdman
Nazirliyinin dəstəyi, Bakı Musiqi Akademiyasının
iştirakı və Kainat Gənclər Mərkəzinin təşkilatçılığı ilə
Bakıda keçirilən "İslam Dünyasının Gənc klassik musiqi
ifaçılarının III Beynəlxalq müsabiqəsində Qran-pri
mükafatına layiq görülüb. 2014-cü il martın 18-də "ÜNS"
Yaradıcılıq səhnəsində İ.S.Bax Beynəlxalq festivalı
çərçivəsində konsert proqramında çıxış edib.
Gənc istedad Qara Qarayev adına Azərbaycan Dövlət Kamera
orkestrinin hazırladığı bir çox konsert proqramlarında
dünya bəstəkarlarının əsərlərini məharətlə ifa edərək
tamaşaçı alqışı qazanıb.
Öz üzərində səylə çalışan Zərifənin gələcəkdə gözəl
skripkaçı olacağına ümid bəsləyirik. |
