|
 Təhsil
Problemləri İnstitutunda Elmi Şuranın yeni tərkibinin
təsdiq edilməsi, institut üzrə elmi vəzifələrə
seçkilərin keçirilməsi və qarşıda duran vəzifələrə həsr
olunmuş növbəti iclası keçirilib. İnstitutun
direktoru, hüquq üzrə fəlsəfə doktoru Qulu Novruzovun
rəhbərliyi ilə keçirilən şurada yeni tərkib elan olunub.
Elmi Şuranın gündəlik məsələlərinə müvafiq olaraq
"Azərbaycan müəllimi" qəzetinin 17 oktyabr 2014-cü il
tarixli nömrəsində dərc edilmiş müsabiqə elanına əsasən
institut üzrə elmi vəzifələrə seçkilər keçirilib. Gizli
səsvermə yolu ilə aparılan seçkidə səs sayına görə
institut üzrə elmi vəzifələrə namizədlər müəyyən
olunub.
Elmi Şuranın gündəliyinə əsasən pedaqogika üzrə fəlsəfə
doktoru proqramı üzrə müdafiəyə təqdim olunacaq
doktorant və dissertantların siyahısı səsləndirilib.
Onlardan bir neçəsinin vaxtından tez müdafiəyə hazır
olduqları xüsusi vurğulanıb. Şuranın elmi katibi Akif
Abbasov bəzi doktorant və dissertantların mövzularında,
indeksində, elmi rəhbərində aparılacaq dəqiqləşdirmələr
barədə məlumat verib.
Qulu Novruzov respublikamızda təhsilə göstərilən yüksək
dövlət qayğısından, bu sahənin davamlı olaraq dinamik
inkişafından söz açıb. Direktor bildirib ki, Prezident
İlham Əliyev çıxışında xalqın gələcəyini təyin edən əsas
amillərdən birinin elmin inkişafında gördüyünü söyləyib.
Təhsilə və elmə ölkəmizdə həqiqətən də çox yüksək
diqqət və qayğı göstərilir. Qeyd edilib ki, elm və
təhsil sahəsində aparılan belə uğurlu siyasətin
nəticəsidir ki, Təhsil Problemləri İnstitutuna da
dəyərli töhfə verilir. İnstitutun direktoru dövlətimizin
təhsilə göstərdiyi bu münasibətin, Azərbaycanın
beynəlxalq aləmdə aparıcı dövlətlər sırasına qoşulmasına
zəmin yaratdığını da xüsusi olaraq vurğulayıb.
Şurada yekun hesabat olaraq institutun direktoru
görülmüş işlər barədə geniş məlumat verib, institut
tərəfindən 2014-cü ildə aparılan tədqiqatlara dair
toplanmış materiallar və onların vəziyyəti, uğurla
keçirilmiş beynəlxalq konfrans və yerli tədbirlər, çap
olunmuş metodiki vəsaitlər və kitablar, monoqrafiyalar
və s. nəşr olunmuş və nəşrə hazır çap məhsulları barədə
danışıb.
İnstitutun elmi-pedaqoji kadr hazırlığı şöbəsinin müdiri
Hümeyir Əhmədov 2014-2015-ci tədris ilində fəlsəfə
doktoru proqramı üzrə doktoranturaya qəbul,
dissertanturaya təhkim olunma və elmlər doktoru proqramı
üzrə doktoranturaya qəbulun nəticələri, 2014-cü ilin
dekabr ayında təhsil müddəti başa çatmış fəlsəfə doktoru
proqramı üzrə təhsil alan doktorantlar barədə hesabat
verdi.
Yeni tərkibi təsdiq olunmuş Şurada qərara alınıb ki,
institutun bəzi əməkdaşları və doktorantları tərəfindən
hazırlanmış əsərləri nəşrə verilsin. Qarşıdan gələn
yeni tədris ili üçün daha səmərəli və aktual
problemlərin həlli yolları araşdırılsın və müzakirəyə
verilsin. Elm sahəsində çalışanların əməyi müvafiq
olaraq dəyərləndirilsin.
Beynəlxalq əməkdaşlıq və informasiya şöbəsi |
